Loma 12 - O Mikanda Ikola

O ku di lumbila kua Nzambi. O mauhete moso ma tu bhana

¹ Uila kiki nga mi diondo-phe, jiphange, mu jihenda ja Nzambi, di bhakudienu o mikutu ienu kua muène, kuma sata ia muenhu, mua di lumbu mu kikalakalu kiê, mu akua ujitu kua Nzambi. Kuma iú uene o ubhhezelu ua kilunji ua ni fuama.

² Ki mu kaiele o funza ia mu ngongo mumu, maji ehelenu Nzambi a mi kitule kiengi, katé kilunji kienu kieza ku ubhe. Phala mu tongolole ioso o vondadi ia Nzembi, iauabha, ia ujitu, iatenena, i mu uabhela kiambote.

³ Mu kukumbidila o kiadi kia ngi bhana Nzambi mu ujitu uê, ngʼ ambela kala muthu mudienu, kuila: Muthu ka di fike ima ia mu tundu. Maji a banze ni ku di tululula katé ua di fika ia kubatâma. Kienʼ iki kala muthu a di banze kiasoko mu kixikanu kioso kia mu bhana Nzambi.

⁴ Mukuâ ni ki tuala ni idiandu iavulu mu mukutu umoxi, o idiandu ioso ki i sokela-ku mu ufunu.

⁵ Kiene ue ni etu, suke tua vulu, maji tuala tu mukutu umoxi mua Kristu. Etuʼ oso tuala tu idiandu tua di sokejeka mudietu, suke idiandu ioso ki i sokela, maji mukutu uene umoxi.

⁶ Kiene ue, tuala ni mauhete, iú uengi, iú uengi, kioso kiá kia tu uanena mu kiadi kia Nzambi. Tu kalakale mu mauhete metu ma tu bhana muène. Hé o uhete uetu ua kutula Njimbu ia Nzambi, kikale tu u sokesa mu muxinda ua kuxikana ku tuala na-ku.

⁷ Hé ungunza, tu xikamene o ungunza uene. Se uhete ua kulonga, tu longe-phe.

⁸ Se ua kubhetula akuetu miẋima, tu a bhetule muene. Uoso u uana ni akuâ kioso ki ala na-kiu, a ki bhange ni muẋima uambote. Uoso uala ni ukota ua kutumina, a tumine ni muanu. Uoso u kuatekesa akuâ ni ku a bhanga mbote, a i bhange ni kusanguluka.

⁹ O henda ki i kale ia kádia. Iaiibha mu i lenga, iauabha mu i naminina.

¹⁰ Di zodienu mudienu mu undandu uambote mua Kristu, o mu ujitu kala muthu a xile mukuâ.

¹¹ Ki mu kale mu asonde, inda kalakalenu kiasoko. Muenda ni kubhikila Ngana ni muẋima ua fulujuka.

¹² Sangulukenu jinga mu kudielela ku muala na-ku; kuatenu kinhenge mu izudidiku, kolokotenu mu kusamba, ki mu bhuile.

¹³ Muenda ni kubhindumuna o jiphange mua Ngana ni kioso ki muala na-kiu. Mu zalela jinga asonhi.

¹⁴ Bhingenu Nzambi kuila a benzele oso a mi zudidika. Xi, bhingenu phala a a zediuise, mukonda inda o kubenzela kana kubhubhidila.

¹⁵ Sangulukenu kumoxi ni iá a sanguluka, dilenu kumoxi ni iá a dila.

¹⁶ Kalenu ni muẋima umoxi mudienu ua ku di tuma kiambote. Ki mu di zangeleke ni ukumbu, maji mu xikina kubhanga ikalakalu ia kikexilu kiatolo.

¹⁷ Kana kuvutuila muthu uoso-uoso phulu mu phulu. Sotenu kubhanga jinga ima ia ujitu ku mesu ma athu oso.

¹⁸ Se mua ki tena, kalenu ku paze ni athu oso; mvunda ki i tunde ko kuenu.

¹⁹ Phange jami, ki mu kale mù vutula phonzo ku muthu uoso-uoso. Inda mu ehela o njinda ia Nzambi o kubhana kaxtiku. Kuma a ki soneka mu Mikanda Ikôla, exi: Phonzo ia ngi tokala eme ngi Ngana, eme-muène ngi futa.

²⁰ Maji enu mu bhanga jinga kala ki ambe o Mikanda Ikôla, kuila; O nguma ié se ua mu mono ni nzala, mu bhane kudia. Se ua mu mono ni dinhota, mu bhane menha. Kuma mu kubhanga kiki, eie uala ku mu tula makala ma uama ku thanduʼ a mutue uê.

²¹ Kana kuehela phulu ku mi tolola, inda enu-ku mu tolola o phulu ni mbote.