Loma 11 - O Mikanda Ikola

O henda ia Nzambi ia kuatela Izalaiele

¹ Kiene kia ngi bhangesa o kuibhula, ngixi: Manhi Nzambi ua ẋimbuka o muundu uê? Ki ki xikina! Kuma eme muene uami ngi mukua Izalaiele, nga tokala ku luvualu lua Mbalahamu, ku muiji ua Bejamí.

² Nzambi ka ẋimbuka o mundu uê ua sola tunde mʼ ukulu. Manhi enu ki mu ejiia ki ambe o Mikanda Ikôla ku maka ma Elija? Muène ua di tende kua Nzambi, kia di kuata ni Izalaiele, uixi:

³ Ngana, ene a jibha o jipolofeta jé, jikalatodio jé a ji lundumuna. Eme-muene ngó ubheka uami nga subhuka-ku, iá a bhindamena dingi o muenhu uami.

⁴ Nzambi-phe ua mu vutuilile kiebhi? Ua mu ambela, uixi: Hanji nga subhuka ni sambuadi dia midi ia muthu, kiluua a fukama phuna kua Bahale, o nzambi ia makutu.

⁵ Kiene ue kimoxi mu thembu ia kindala. Mukonda dia kiadi kia Nzambi, sai-ku hanji amoxi a subhuka, a tokala mu ió òsole kuala muène.

⁶ Kuma o kusola kuê kua tundu ku kiadi, ki ku tundu ku ikalakalu i bhanga athu. Mukonda se o kusola kua Nzambi, kua tundile ku ikalakalu ia athu, o kiadi kiê ki ki eji kukala kia kidi.

⁷ O kiki-phe tuila ihi? Tuila kuma o kima kia kexi kusota akua Izalaiele, ka ki mono. Ofele ngó a a solo kuala Nzambi, ene a ki mono. Amukuâ-phe a di bhange mixilu ku kixanu kia Nzambi.

⁸ Kala kia ki soneka mu Mikanda Ikôla, exi: Nzambi ua a kolesa o miẋima ni ilunji iâ. Katé ni lelu mesu mâ ma lémbua o kumona, o matui ma lémbua kuiva.

⁹ Davidi ue uixi: A a kuatele mu jifesa jâ, a a tobhese; a di bhale, mbé a tambule kaxtiku!

¹⁰ Mu mesu mâ muize kavunda, a lémbue kumona; kolokota o kukotamesa o miongo iâ ni ioso ia a bhinjika.

¹¹ Kiki ngʼ ibhula ngixi-phe: Ene kia di bhaleʼ okio, manhi endelela nzaká? Ki ki xikina! Maji o kibhalu kiâ, mu ituxi, kia bhekela akua jixi jengi ki Jijudé o kubhuluka, phala o Jijudé ku a kuatesa difuba.

¹² O kituxi kia Jijudé kia bheka mabesá mʼ onéne mu ngongo ioso, o uadiama uâ mu nzumbi ua bheka umoni phala oso ki Jijudé. O ku hadia-phe mabesá kuvula kuê kua kà soka kiebhi, kioso kia kà tenena o konda ia Jijudé ja kà bhongoloka dingi kua Nzambi!

O kubhuluka kua ió ki Jijudé

¹³ Maji kindala ngala ku mi zuelesa enu mu akua jixi jengi, ki mu Jijudé. Kuma eme-muene ki ngedi ngi Poxolo ia akua jixi jengi, oso ki Jijudé, nga zangalala ni kikalakalu kiami.

¹⁴ Sumba ku matelu-matelu, enʼió a ngi tokala mu xitu ngʼ a kuatesa difuba, ni ngi bhulule-ku amoxi-mu.

¹⁵ Mukonda kioso o Jijudé kia a kaie, o mundu ua biluka makambʼ a Nzambi. Kia kà bhita-phe kiebhi hinu Jijudé kia kà a xikina dingi? Kia kà kala muenhu phala oso afu kiá!

¹⁶ Mbata se o dikende dia dianga ku mbolo a di bhakuila Nzambi, ni mbolo ioso iê-muène ue. Se o jindanji ja muxi a ji lumbila Nzambi, ni jithangu ue jê-muène.

¹⁷ O kiki o jithangu jamukuâ ja mudiva ua kudima, a ji bukuile-ku, eie u luthangu lua mudiva ua muxitu iá a ku phaphe ku kixina muʼ axaxe ka jithangu. Kiene ue enu ki mu Jijudé, mua di bhange kala o mudiva uenʼ ió ku muxitu, kindala mua tambula ku nguzu ni ku umvuama ua muenhu ua Jijudé.

¹⁸ Uila kiki, ki mu idikize ukumbu ku jithangu jamukuâ ja bukulʼ ojo. Mu kala kiebhi ni ukumbu? Enu mu jithangu ngó kuabhu! Ki enu mua kuata o lundanji, maji o lundanji luene lua mi kuata enu.

¹⁹ Enu-phe muanda kuila: Kiene muene! Maji o jithangu a ji bukuile-ku phala nʼ a tu phaphe-ku etu.

²⁰ Kiene! Maji lembalalenu kuila ene a a batuile-ku mukonda dia kukamba kuxikana, enu-phe mua xala ku mudiva mukonda mua xikana. Kienʼ iki ki ki mi bhekele kukala ni ukumbu. Inda kalenu ni uôma.

²¹ Kuma se Nzambi ka tenene kuehela o Jijudé edi kala jithangu ja di sabhukila ku muvide, mua fika kuila uanda ku mi ehela enu?

²² Talesenu o kulenduka ni kutema kua Nzambi: Kua ene a di bhale, muène ua tema; ko kuenu-phe, ua lenduka, enu ki mu jiza mu kulenduka kuê. O ki mu kamba kujiza, enu ue hadia a mi batula-ku.

²³ O Jijudé uâ kia kamba kujiza mu kuxibhaka kuâ, hadia a kà a phapha dingi bhu kididi kiâ bhua kexi, kuma Nzambi ua soko o ku a phapha-bhu dingi.

²⁴ Mukonda enu ki mu Jijudé mua di bhange kala lumbombo lua muxitu. Sumbala enu a mi batula ku mudiva ua muxitu ua di sabhukila, iá a mi bhange kima kene ku ki bhanga, a mi phaphe ku muxi uambote. O Jijudé a di bhange ene o mudiva ua kudima. Kala kiki, phala Nzambi, inda o jithangu jê-muène ji fuama ku ji phapha ku muxi uâ.

O kulenduka kua Nzambi phala mundu uoso

²⁵ Uila kiki, ki ngi mesena jiphange, kuila mu kamba kuijiia o kijingano kiki, mba mu kala mu jinjimu ja ku di metena: mukonda o kuxita mu thulu kua kuata Izalaiele, ki kuanda kujiza, maji katé ngó kia kà bokona muvimba ua dialuilu dia akua jixi jengi, ió oso ki Jijudé, ki eza kua Nzambi.

²⁶ Kienʼ iki kiene kiua o Izalaiele ioso ki ia kà bhuluka. Kala kia ki soneka mu Mikanda Ikôla, exi: Ku Ziione hadia ku tunda Mubhuludi, ua kà katula o ikuma ioso ia ió a tokala ku muiji ua Jakobo.

²⁷ O kiki kiene o kikutu kiami ki nga kà ta ni ene, kizuua ki nga kà katula o ituxi iâ.

²⁸ Jijudé a di tunu o Njimbu Iambote, iá a di bhange jinguma ja Nzambi mukonda dienu-enu. Maji o ku mbandu ia ku a tungula kuala Nzambi, a di bhange makamba mê mukonda dia jitata.

²⁹ Kuma Nzambi kene kualuluka mu ubanzelu uê, ku mbandu ia ió uoso a mu sola kuala muène anga u mu zediuisa.

³⁰ Maji enu ki mu Jijudé, mʼ ukulu mua xibhakele Nzambi. Maji o kiki Nzambi ua mi kuatela henda, mukonda dia kuxibhaka kua Jijudé.

³¹ Ene uâ kiki a xibhaka Nzambi phala mu henda ia mi kuatela enu ki mu Jijudé, ene uâ hadia Nzambi a a kuatele henda.

³² Kuma athu ene oso kiá, Nzambi ua a kuikila mu kuxibhaka, phala ene oso a a kuatele henda.

Muimbu ua kuximana Nzambi

³³ O jimbongo ja Nzambi kuvula kuahi! Kuzonga kuahi o unjimu ua Nzambi, ni kuijiia kuê! Mukuahi u tena kulombolola o kaiula kê? Nanhi u tena kutongolola o ikutu iê?

³⁴ Kala ki ambe o Mikanda Ikôla: Nanhi uejidile o muẋima ua Ngana? Nanhi muene ua tenéne ku mu longesa?

³⁵ Nanhi muene ua tuamene kubhana kima kua Nzambi, muène lelu nʼ a bhinge ku mu vutuila?

³⁶ Mukonda o ima ioso muène ua i bhanga, o ima ioso iala-ku, iemanena mua muène, phala muène. O fuma i kale iê-Muène ku mivu ni mivu sé dizubhilu. Amén!