Loma 10 - O Mikanda Ikola

¹ Enu jiphange jami, kia solo o muẋima uami uoso, o kuila muiji uami eme-muene a bhuluke. Eme ngene mu ku a diondela jinga kua Nzambi.

² Mukonda eme ngi mbangi iâ kuma Nzambi a mu suinina kiavulu muene. Maji o kusina kuâ kuene kua kukamba kutongoloka kua kidi.

³ Edi ni kukamba kuijiia o kulunga kua Nzambi kuijiia mu kuxikana, ni kubhindamanea o ku di lungisa mu kidifua kiâ ene, iá a ditunu kubelesela o kidifua ki bhangesa Nzambi kuẋikina muthu ni, ku mu lungisa.

⁴ Kuma Kristu muene o dizubhilu dia Kitumu, phala ió uoso u xikana, a mu lungise kuala Nzambi.

O kubhuluka kua tokala athu oso

⁵ Mbata o kia soneka Mozé ku mbandu ia muthu ku mu xikina kua Nzambi ni ku mu lungisa mu kutumaka o Kitumu, uambe kiki: Uoso u bhanga ioso ia xindi o Kitumu, kuene kua muena o muenhu.

⁶ Maji o kulunga-phe ku tunda mu kuxikana, kuixi kiki: Kuile ku muẋima ué uixi: Nanhi ua kà banda ku diulu?—mbebhu o kubheka Kristu bhoxi.

⁷ Mba uila: Nanhi ua kà tuluka mu ʼazongo?—mbehu o kutakana Kristu mu ʼalunga. Kuixi-phe kiebhi?

⁸ Kuambe kuila: O kizuelu kia Nzambi kia ku zukama, ki ala mu kanu dié ni mu muẋima ué—kiene-phe o kizuelu kia kuxikana ki tuene mù kola.

⁹ Mukonda se u fisala ni dikanu dié kuma Jezú muene Ngana, anga u xikana mu muẋima ué kuma Nzambi ua mu fukununa mu ʼalunga, eie u bhuluka.

¹⁰ Kuma muthu u xikana ni muẋima, nʼ a mone o kulunga; u fisala ni dikanu nʼ a bhuluke.

¹¹ Kuma o Mikanda Ikôla iambe: Uoso u mu xikana muène, kà ka kuata jisonhi.

¹² O kia tangʼ iki, phala ene-oso, mukonda kana-ku katungu mu Judé, ni ió ki Judé. Nzambi muene kuma Ngana imoxi, Ngana ia ene-oso; muène mubhani a nzungule kua ió oso a di kola kua muène.

¹³ Kala kiambe o Mikanda Ikôla, Uoso u di kola mu dijina dia Ngana, u bhuluka.

¹⁴ Maji a di kola-phe kiebhi kua muène, se kiluua a mu xikana? A mu xikana-phe kiebhi, se o Njimbu kiluua a ivua?

¹⁵ O Njimbu a ivua kiebhi kua kambe o akunji a i tula? A i tula-phe kiebhi, a kambe o ku a tuma? Kala kia ki soneka mu Mikanda Ikôla, exi: O uijilu uâ kuuabha kuahi, ió eza mù bhana jingolokela ja Njimbu Iambote!

¹⁶ Maji ene oso-phe kà sokela-ku mu kutambulula o Jingolokela Jambote. Kuma ni Izaia, uixi: Ngana, nanhi ua xikana o hundu ietu?

¹⁷ Mu kieniiki o kuxikana kuijiia mù kuivua o hundu, o kuivua o hundu, kuijiia ku Njimbu Iambote ia Kristu. Mu kieniiki, o kuxikana kuijiia mù kuivua o ngolokela, o kuivua o ngolokela, kuijiia ku Njimbu Iambote ia Kristu.

¹⁸ Maji eme ngixi-phe: Kifua ene a kambele kuivua o ngolokela? Evidiâ muene. Kala kiambe o Mikanda Ikôla, iexi: O dizui diâ a dʼ ivu mu ngongo ioso, o maka mâ ma bhixila katé ku maẋokololo ma ʼxi.

¹⁹ Ngixi-phe dingi: Kifua akua Izalaiele a kambele ku kʼ ijiia? Mozé muene ua diangele kutanga, uixi: Eme ngi mi kuatesa difuba ni ió mua a mono kuila kʼ athu a kima, ngi sola athu a kambe kuijiia, enu mbé ni mu futuluke, ni mu kale ni njinda ia muiji ua athu a kambe kilunji.

²⁰ Izaia-phe u zuela sé uôma, uixi: Nzambi a mu sange kuala athu kà kexi ku mu sota, ua tukulukila kua ió kà kexi ku mu ibhula.

²¹ Mu kutanga Izalaiele-phe, Izaia uixi: Kumbi dioso dia kambamba Nzambi ua sunununa o maku mê ku mundu uaxibhaka, uathathamana.