Loma 1 - O Mikanda Ikola

Umekenu

¹ Eme Phaulu, nga soneka o mukanda iú—eme ngi selevende ia jezú Kristu, a ngʼ ixana kuala Nzambi kukala Poxolo, ià a ngi lumbila kutula o Njimbu Iambote.

² O Njimbu Iambote ia polometela Nzambi tunde ukulu, mu kanu dia Jipolofeta jê, iá a i soneka mu Mikanda Ikôla.

³ Iene ia mu tanga o Monʼ a Nzambi, ngana ietu Jezú Kristu. Mu kidifua kia muthu, Muène ua tunda ku mbutu ia sobha Davidi.

⁴ O mu kuidikiza kuzela kuê kua unzambi, o kufukunuka kuê kuene kua londekesa ni kutena kuonène, kuila Muène muene o Monʼ a Nzambi.

⁵ O kua Muène kuene Nzambi kua ngi bhela o ujitu ua kukala Poxolo mu kikalakalu kia Kristu mbé kutumakesa o kixikanu ku mundu ua akua jixi joso, mukonda dia dijina diê.

⁶ O mu ʼaxaxe kâ ni enu uenu mua tungu mu Loma, muene mu muala, kuma a mʼ ixana ue kuala Nzambi mu kukala mu akua Jezú Kristu.

⁷ Uila kiki, nga mi sonekena enu oso muala ku Loma, enu a mi zola kuala Nzambi, iú ua mʼ ixana phala kukala mu mundu uê. Ku kale kiadi ku mualʼ oko, ni paze i tunda kua Nzambi Tata ietu, ni Ngana Jezú Kristu.

O kuxikana kua akua Loma. Phaulu uinda u di mona-nâ.

⁸ Kima kia dianga, nga sakidila Nzambi iami kua Jezú Kristu mukonda dia enu oso; kuma o kuxikana kuenu kua fumana mu ngongo ioso.

⁹ Mbata, o Nzambi ngene ku mu bheza ni muẋima uami uoso, mu kutula o Njimbu Iambote ia tokala Monʼ ê, uala mbangi iami kuila nga zuela kidi. Ngana Nzambi ua kʼijiia kuila izuua ioso ngene ku mi lembalala,

¹⁰ o mu kusamba kuami ki ngene kufula ku mi tumbula. Ngene mu bhinga ngixi, mu vondadi ia Nzambi, hinu bhu kale kizuua ngi mone kuzediua kua ku mi sanga, ni ngi mi kunde koko ku muala.

¹¹ Kuma nga mʼ indi kiavulu ku mi mona, mbé bhu kale ue ni mbote i mu tambula ko-kuami, ia mabesá ma nzumbi, phala mu suine.

¹² Kifua nga mesena kuzuela kuila etu ene oso—ni enu ni eme,—tu di konda malamba mu ku dʼ ijiia mudietu o kuxikana kuetu, ni tuidi enu mu suina ki mu mona o kuxikana kuami, eme uami ngi sanga dingi nguzu mu kuxikana kuenu ku muala na-ku.

¹³ Enu phange jami, nga mesena mu kʼ ijiia kuma luavulu kiá nga solele kuia ku mi kunda ku mualʼ oko, maji katé ni kiki sai kia mu ngi fudisa jinga. Kuma nga mesena kuila kikalakalu kiami ki kale ni ibundu mu ʼaxaxe kenu, kala ki nga mono mu ʼaxaxe ka ió ki Jijudé, o akua jixi jamukuâ.

¹⁴ Mukonda eme ngala ngi mukua dikongo ku Jingeleku ni ku Matumbu, ni ku jinjimu ni ku ioua.

¹⁵ Kala kiki, kioso ki nga tena, ngala polondo ia ku mi tudila ue o Njimbu Iambote, enu uenu muala ku Loma.

Kulunga mu kuxikana, ene o maka ma mukanda uosʼ ú

¹⁶ Mbata eme nga dielela kiavulu o Njimbu Iambote; kuma iene o nguzu ia Nzambi i bhulukisa oso a xikana; ku dianga o Judé, hé ku kaiela ió oso ki Jijudé.

¹⁷ Kuma o Njimbu Iambote iene ia tu idikisa kioso Nzambi kia tu xikina, etu tua lungila mu kuxikana; kuma mu kuxikana ngó mu tu lungila. Kala kia ki soneka mu Mikanda Ikôla exi: Uoso a mu xikina kua Nzambi mu kuxikana, ió u laia.

O maufusa ma matumbu

¹⁸ Kuma tua mono kuila o njinda ia Nzambi ia tukuluka, i tunda mu diulu, hé i tula ku thandu dia ituxi ioso ni kubhukumuka kua athu a bhingi kuila mukonda dia ima iâ iaiibha ia bhanga, a fudisa athu kuijiia o kidi.

¹⁹ Nzambi u a bhana kaxtiku, mukonda ima ia Nzambi iejiia athu, ia di monekena mu ʼaxaxe kâ; Nzambi muène ua edikiza-iu.

²⁰ Kuma tunde Nzambi kia bhanga oxi, o ima iê-muène ia kambe kumoneka ku mesu, kutale o nguzu iê inanga, uixi o unzambi uê, ki i jimbi, mukonda ia di monekena. Kuma athu ia a jimbulukila mu imbamba ia bhanga Nzambi. Kala kiki, ene kala dingi ni maditatu.

²¹ Mukonda sumbala Nzambi a mu ijidile, ka mu bhana ujitu kala Nzambi, ka mu sakidila. A biluka-phe jisemenhi mu jiphata jâ, o muẋima uâ ua kutobha anga u vunda.

²² Ene a di tange exi tu jinjimu, maji a biluka ioua.

²³ Bhu kididi kia kubheza Nzambi ka tena kufua, a bheza kiteka kiòkalakale mu kidifua kia muthu mukua kufua, ni kia jinjila, ni iama ia inama iuana, ni ibâmba i zanzala bhoxi.

²⁴ Mukonda dia kudianguka kuâ, Nzambi ua ehelela mu maluimbi ma miẋima iâ ma bolesa, phala ene mudiâ a di bhange imbamba ia jisonhi ku mikutu iâ.

²⁵ Kuma ene o kidi kia Nzambi a ki tolokala mu makutu. A bheza kima kiobhange kua Nzambi, a ki bhikila, o Muène ua bhanga ioso a mu xia, ua jîngi sé dizubhilu. Amén!

²⁶ Mukonda dia kiki ki bhanga athu enʼiâ, Nzambi ua ehelela mu jihanji ja ufusa; katé o ahatuʼâ a xia ufunu uâ ua a tokala, a lungulula uengi ki ua a tokala.

²⁷ Kiene uê kimoxi, o mala a xia ufunu ua muhatu uoso ua tokala, anga a uama mu luimbi luâ mudiâ. Mala mu mala a di bhanga ima ki i fuama, enda ue ni kutambula moxi diâ kaxtiku koso ka tokala mu kudianguka kuâ.

²⁸ Kienʼiki kuma a di tunu kusuua Nzambi mu kuijiia kuâ, Nzambi ua ehelela ni kilunji kiasekala, phala ende ni kubhanga ima ki i fuama.

²⁹ Ezala ni kubhukumuka, ni usueia, ni luimbi, ni phulu; ezala ni dixinga, ni ujibhanganga, ni jimvunda, ni makutu, ni mahanha.

³⁰ Akua kabodio, aku kutatela. A di zemba ni Nzambi, a bhuma, a kala ni ukumbu ni izala. A funha jindunge javulu ja kubhanga kiaiibha. A xibhaka adiʼâ,

³¹ akua undumbu, kima kia bangana ka ki kumbidila, a kaka, ka moneka henda ia muthu.

³² Athu kala kiki, sumbala kijila kia Nzambi a kʼ ijiia, kuma oso akua kubhanga ima kala íii, a tokala kufua, u sanga hanji a jijila o ku i bhanga. O kia di te-ku,—ka i bhange ngó ene,—maji ni athu engi kia a mona ia a i bhanga, ene a a suinisa.