Kuditenda 5 - O Mikanda Ikola

Jiphaxi ja vulu, ja bheka dilamba mu ku ji xinganeka

¹ Lembalala, Jihova, kia tu izʼiki! Tongolola hanji, utale o mondo ua tu tula!

² Undundu ua muiji uetu uai ku athu engi; jinzo jetu akua makanga a ji tambula.

³ Tuaxalela tu jihukunhu, ki tu moneka tata; o jimama jetu a di bhange kala atudi.

⁴ Menha etu a kúnua, tua mu a sumba mu kitadi; o jihuinhi ja kutelekela, tuala ku ji tambuila mu suilu iatokala.

⁵ A tu langata, hanji a tu nhenganana bhu jixingu; kubhuila kua tu kuata, maji o dinhohenu tua di lémbua.

⁶ Tua leka o maku etu ku akua Ijito ni ku akua Asídia, phala a tu ikutise ni kúdia.

⁷ Jitata jetu a zangele, kuma a tele kituxi, ia afuá-phe kiá. Etu-ku, leluʼidi etu tuahula o mulonga uâ-ène.

⁸ Abhika ene ala ku tu tumina, ki bhuala muthu u tena ku tu tambula bhu lukuaku luâ.

⁹ O kutakana ngó kúdia kuetu kututu, ki bhinga tu kala bhu bhulubhulu dia kúfua, kingûmba o xibhata ia tu imanena mu mikáu.

¹⁰ Kikonda kia tu hîmbi-ni-kiene kala forno, mukonda dia hadi ia nzala.

¹¹ Ahatu mu Ziione a a bhange undumbu, o ilumba mu madiembu ma Juda kiomuène.

¹² Jingana a ji nhenga muene ni maku mâ, o jipholo ja adiakimi né ngó ku ji xila, lémbua!

¹³ Minzangala a i jijidika exi, kale mu huhila bhu ditadi; o anʼa-ndenge bhendu-bhendu ni ita ia jihuinhi.

¹⁴ Adiakimi ka mu xikama dingi bhuʼnangu dia mundu bhu muelu, o minzangala ue ka mu kuimba dingi.

¹⁵ Kukembela o muenhu kua tu-bhu, o kukina a tu katula-ku, kua tu iza kiá jingololo.

¹⁶ Kitundu ku mútue kia tu laúka. Kokolo dietu, tata, kuma tua te ituxi!

¹⁷ Kiene kia tu bhekela kuambuka katé ni muẋima moxi, kiene ue kia tu bhekela mesu ku tu kala ni kavunda.

¹⁸ Hanji kia senguluka o mulundu ua Ziione, mikenge kifua kuene ku nangu diâ dia kuendela.

¹⁹ Eie-phe, u Jihova, hanji ki ua di fikidila, mukonda eie unagenena muene katé ku hádia ni hádia; o kiându kié kia kuata muene, ku tunda miji kuiza miji.

²⁰ Eie-phe u tu landuka kièbhi, ni tuie muene nzaká? Ua tu ehelelaʼhi kiki, mu thembu ioso iii?

²¹ Tu vutule dingi kokué, u Jihova, nda etu tu tene o ku ku vutukila; tu tombuele dingi o izuatu ietu ku ubhe, kala ki tua kexe mu xiahulu.

²² Phala-hi, eie Ngana, u tu ximbuka ni ku tu dila hunji kiki? Phala-hi iene u tu balukila ni ku tu kuatela njinda iadikota kala iii?