Kuditenda 4 - O Mikanda Ikola

O jiphaxi ja makota ja athu ku ibuka-ibuka iâ

¹ Kuahi ngó o kuhimba kua himbi o ulu! O ulu ua fina ua uabhele kiambote, o kiki ua lunguluka ni uene, tata! O matadi ma dibhezelu dia ngene di kola a ma muangena mu jithungi ja jinzunga joso, enu mala!

² Anʼa Ziione, a kôla ku kijingu mukuâ ni ulu uafina, o kiki asokʼuâ kiá ni itutu ia utuma, a di bhange kala kikalakalu kia mumbi-a-jímbia, tata!

³ Katé ni mabheku ku mukáu a bheteka o thulu, anga amuisa anʼâ; maji o kilumba kia mundu uami, ua biluka kisuéia kala kihendembumba mu kikangalakata.

⁴ O dimi dia mona bhu maku, dia kokotela mu kanu mbebhu o dinhota; Tumbonga kia bhinga o kúdia, ki bhuala u a bhana-ku.

⁵ Oso a dile jinge o ima ia ximbuka kiambote, kiki ia a botomokena mu jinzunga; oso a a sasela mu izuatu ikusuka, kiki ia a nanga mu ditobe.

⁶ Mukonda o kituxi kia monʼa kilumba kia mundu uami, kia beta kota o kia Sodoma ndenge, a mu vumbile mu uthôkua muʼanzanzʼumu, sé ngó kuila bhu kala lukuaku lua muthu lu ki bhanga.

⁷ O ilamba iê ki ia kexi, mu kulekujuka neve ndenge; o mu kuzela ue kota o lete ndenge; o mu kusuka mikutu, ene kota o makoladi ndenge; aẋanana kiambote, katé mu kulujela a somboka o jisafídia!

⁸ Maji o kiki a xikelela ni ene dikala ndenge; o kia bhita mu nzunga ka ejiia dingi. Kikonda kiâ kia naminina ni kiene ku ifuba, kia kukuta muene, kia biluka ni kiene kala luhuinhi!

⁹ Afu ku xibhata a beta ujitu, dikue ió afu ku nzala, tata! Mbata iá a fu ku nzala, a tuama o kuhoha ni ku di xibha kala a a kubula, mukonda dia kukamba o ima ia kúdia i tunda ku mábhia.

¹⁰ Maku ma ahatu, a zola Nzambi, ene muene a lambe o tuana tuâ-ene! O xitu iâ iene o huta ia kúdia kuâ, bhu thembu iabhiẋila o kusenguluka kua monʼa kilumba kia mundu uami, enu mala!

¹¹ Jihova ua kumbidila o njinda iê, ku muẋima kua mu zele kiua; uaiukula o mualala ua njinda iê ia uamesa túbhia mu Ziione katé ni ku madisesa bhoxi.

¹² O jisobha mu ngongo, ni athu a tunga ku mundʼuku, kana, ka ki fikile, kuila o kisuéia ni nguma a bokuena muene bhu mielu ia Jeluzaleme bhobho.

¹³ Kima kiki kieza mukonda dia ituxi ia misesedi, ni phulu ia jinganga, a ẋiamuine o manhinga ma athu aiuka, a ma ẋiamuina muene mu kaxi ka Jeluzaleme.

¹⁴ A babajala mu kuenda kala ifofo mu jinzunga, a di kasanesa ni manhinga; Ki bhinga-phe muthu ka tena kubabata ku izuatu iâ.

¹⁵ Kia kexi hanji, aia ni ku di kola, exi: Abhukenu, tua xidi! Abhukenu, abhukenu! ki mu babate! O kia kala kiá mu takujuka ku matumbu, mu ifuẋi ia athu engi, exi: Mumu ka tunge-mu.

¹⁶ Kuma o njinda ia Jihova, ia a muanga-muanga; muene nuka dingi ua-nda ku a suua; kuma ka xila jinga o pholo ia jinganga, ka ẋikinine ue kukuatela henda ia athu a kuka kiá.

¹⁷ Etu-phe mesu a sukile ni kutalela kuoso ku tu tunda o dikuatekesu, manhi tua di nganala mu ku kinga; o kudielela kuetu kua kingoho. Anga tu kuata kuzonguela bhu matala ni kutalela ku kifuẋi ki ki tena kukudila muthu.

¹⁸ O ki tua zangula jinga díkanda dia kuenda, akala mu ku tu tola, o kuenda mu jiluua jetu-phe kia tu bhonzele: Tuexi-phe: Lamba dietu dia tuiza, izuua ietu ieza-bhu; xi, kuma disukilu dietu dia bhixila.

¹⁹ Akua ku tu bhesa lusolo, a betele kusangama o jinjila ji bhita bhulu ndenge. Mu ku tu landameka kuâ, o ki tuila tuia ku milundu, tuala-nâ; o ki tuia mu kikangalakata, míkala iâ tua i sange.

²⁰ O na tudilu dia kubhuima kuetu a tu ûndila-nê kua Jihova, a mu kuatela mu madiela mâ; o muene-phe, muene tua mu edile, tuixi; né kiá ki tu bhinga ku xalela muʼaxaxe ka akua jixi, tua kà kala mu kilembeketa kia muene.

²¹ Eie-phe, monʼa kilumba kia Edomo, ua tungu mʼoxi ia Uze, tana-ku, u sanguluke! Dikáu-ze hádia dia-nda kubhiẋila ue kokué, hinu-phe ukodiua na-diu anga u di vungununʼê eʼmuene-muène hé u xala tuẋi.

²² O kaxtiku ka kikuma kié, eie monʼa kilumba kia Ziione, mu bhua mu kala, kuma ka tenena kiá; Nzambi muene nuka dingi a kà tona ku ku balakala ku ubhika. Kala kiki, muene hinu uiza kuibhula o ikuma ié, eie u kilumba kia Edomo; muene ua-nda ku ku tungununa o ituxi ié ioso.