Kolose 4 - O Mikanda Ikola

¹ Enu jingana, kalenu ni muanu ua kubhana abhikʼenu kioso kiaiuka kiasokela. Kuma muejiia kuila enu uenu sai Ngana ienu ku diulu.

Kioso kia samba, ni kioso ue ki enda ni athu ku kanga

² Kolokotenu mu kusamba, muila ni kulangidila ni kusakidila jinga Nzambi.

³ Ki mu kambe ue ku tu sambela etu, phala Nzambi a tu jikuile dibhitu dia kutanga o maka mê, ni dia kutangela o mundu o kijinganu kia Kristu. Mukonda o kijinganu kia Kristu, kiene kia ngi bhekela o ku ngi kuika ni kukala ku malubhambu.

⁴ Uila kiki, endenu ni kusamba phala o kijinganuʼiki ngi ki lombolole kala kia tokala, athu oso nʼa kijiie kala kia fuama.

⁵ Kuatenu kilunji mu kuenda kuenu ni athu ku kanga. O bhuoso bhu mu muena kithangana, kienhokio kana kudibotesa-kiu mu ngoho.

⁶ O kuzuela kuenu ku kale kua ujitu, kuotoue ni môngua, phala uoso ua mʼibhula, mu ijiie ku mu vutuila kiambote ni ujitu.

Tixiko ni Onézimo. Ji lekalu ni kulekela

⁷ Ioso i ngala kubhita na-iu kunu, Tixiko ua kà mi kunda-iu. Kuma muène Phangʼietu ia henda, ngunza ia fiiele, mukalakadi ni mukuetu mu sedivisu ia Ngana.

⁸ Kiene ki nga mu katuila, phala ni aie, a mi mone kioso ki muala, ni a mi suinise miẋima.

⁹ Nga katula ue ni Onézimo, Phangʼietu ia fiiele tua mu zola, ua mi tokala kuenhoko mudienu. Ene a kà mi kunda ima ioso iala kubhita kunu.

¹⁰ Aristarko, ngala-nê muʼaleia, ku upelezu, ua mi menekena, ni Marku muebhu a Balanabé. Muène Marku mua muivu kia lekalu iê, koko se ua mi sange, mu tambuludienu kiambote.

¹¹ Jezú mba Josoué, ua mi menekena, ió ue a mu luku Justo. Kitatu enhá, ene ngó ku ujudé uetu a ngi bande mu kikalakalu kia Utuminu ua Nzambi, athu a mu ngi konda malamba.

¹² Epafala muthu ua mi tokala mudienu kuenhoko, mubhika ua Jezú Kristu, ua mi menekena. Muène mukua ku mi bhângela luavulu mu kusamba kuê kua Ngana. Uene ku mi bhingila jinga phala Nzambi a mʼimike mu Maka mê, a mi bhane kukala mu adiakime mu nzumbi, ni kukala polondo ia kubhanga o vondadi ia Nzambi.

¹³ Kuma eme-muène ngala ngi mbangi ia hadi jê ioso iala ku mi talela enu, ni akua Laodiseia, ni akua Hielapoli.

¹⁴ Luka, kamba dietu dia muẋima, musaki a jihaxi, ni Dema, a mi menekena.

¹⁵ Jiphange jetu ku Laodiseia a menekenienu, ni Nimfa, ni Ngeleja ia mu di bhongoluela ku bhata diê.

¹⁶ Mukanda iú se mua zubha ku u tanga mudienu, tumenu ue ku u tangesa mu Ngeleja ia akua Laodiseia; enu uenu mu tanga o mukanda u tunda ku Laodiseia.

¹⁷ Ambelenu Arkipo, muixi: Xinganeka ungunza ué u ua tambula kua Ngana, u u kumbidile.

¹⁸ Umenekenu uami eme ngi Phaulu, iii letala ia lukuaku luami muene. Lembalalenu o malubhambu mami. O kiadi kia Ngana Nzambi ki kale ni enu ku mualʼ oko.