Jouele 3 - O Mikanda Ikola

Miji ioso a kà i fundisa. Izalaiele uà keza dingi ku ungana

¹ Mukonda-phe mu izuua mueneʼomo, mu kithangana kieneʼokio, ki nga-nda kua kà katula o ubhika ua Juda ni ua Jeluzaleme.

² Miji ioso nga kà i bhongolola, hé nga kà i bhangesa ku kulumuka mu dikôlo dia Jozafate; mueneʼomo-phe kiá, nga kà funda-nâ mukonda dia kifuxu kiami, ni undûndu uami, Izalaiele, a mu muanga-muangena mu jixi kuala ene, ixi iami iá a di uanena-iu.

³ Kifuẋi kiami a ki tela muondona, a bhana kamona ka diiala mu ku tambula muhatu ua ndumbu, kamona ka muhatu a mu sumbisa mu vinhu, mbé o kúnua.

⁴ Enu ue mua kuataʼhi nʼeme, enu Tilu ni Sidone, ni enu mu jimbambe joso ja ixi ia Fidíxia? Mbebhu enu muandala ku ngi tata phonzo? Kuabhu-phe, hé kiene ki mu ngi futʼokio, eme ue muʼanzanzaʼumu ngi lenguluka mu ku sonuena futu ienu bhu thala dia mítue ienu.

⁵ Mukonda enu mua nhana phalata iami ni ulu uami, muʼ ambata ima iami ia makembu ia ngi uabhela kiambote, enu mua i te mu jitembulu jenu.

⁶ Anʼa Juda ni anʼa Jeluzaleme mua a sumbisa ku ana a akua Ngeléxia, phala a ambate mbebhu ku a xinjikila dikanga mu jimbambe ja ixi iâ.

⁷ Tala-phe eme ngʼa sendumuna bhu kididi ku mua a sumbisa, enu hé ngi mi lunduluila o futu ienu ku thandu dia mítue ienu muene.

⁸ O anʼenu a mala ni anʼenu a ahetu nga-nda ku a sumbisa bhu lukuaku lua anʼa Juda; o ene uâ anga a sumbisa dingi anʼenu ku muiji ua masabeu, muiji ua di takula dikanga, kuma Jihova ua ki tange.

⁹ Kienhiki kolenu-kiu mu miji ioso, ita i mi kale kima ki kôla! Ixanenu mazonda a bhixile, mala oso a ita a bande!

¹⁰ Matemuʼenu a a Sule jixibhata, o jimvu jenu a ji Sule misongo ia mifula, ua kambe nguzu a zuele, uixi: Eme ngi kindanda kia ita!

¹¹ Di bhongolodienu muize lusolo! Enu mu ifuẋi ioso mu jimbandu, dibhongolodienu! Jihova, tata! bhangesa makuenze é ku kulumuka bheneʼobho!

¹² Miji ioso i sendumuke, a bande mu kuia ku dikôlo dia Jozafate! Kuma nga kà xikama mueneʼomo phala kufundisa o miji ioso mu jimbandu.

¹³ Tenu-mu kibholola, kuma díbhia dioso diabhi kiá; zenu mu kuvuka ji-uva, kutukenu kuma ditangi diezala, itutu ioso ia matangi iala mu subhajaka; mbata ufusa uê uonéne.

¹⁴ Ifuẋi ni ifuẋi mu dikolo dia kufundisa! Mukonda kizuua kia Jihova kia zukama mu dikôlo dia kufundisa.

¹⁵ Ni dikumbi ni mbeji a kà xiketela, jithéthembua ja kà lémbua o kubenha.

Nzambi ua-nda kuzediuisa o Mundu uê

¹⁶ Bheneʼobho Jihova ua kà hunza mu Ziione, ua kà bhana mbimbi iê mu Jeluzaleme, ni diulu, ni ixi ia kà teketa. Kieneʼokio Jihova phe ua kà kala lengelu dia mundu uê, muene kimbaka kia anʼa Izalaiele.

¹⁷ Enu-phe mua kèjiia kuma eme ngi Ngana dia Nzambi ienu, nga tunga mu Ziione, ku mulundu uami ukôla; Jeluzaleme ua kà kituka mbonge ikôla; athu engi ka kà tena dingi kubhita-mu.

¹⁸ Kieneʼokio-phe milundu ia kà zunzumuka vinhu ia ubhe, tu thuthulundu tua kà bhubha lete, jingiji joso mua Juda ja kèzala menha, mʼonzo ia Jihova mua kà di bhanga otho ia menha, a kungulukila mu dikôlo dia Xitime.

¹⁹ Ijitu ua kà kituka disengulukilu, Idomo ua kà di bhanga kikangalakata ki bhekela ngùnzu, mukonda dia usuéia ua bhange ku anʼa Juda, kua bhingi ni mʼoxi iâ muene mua zunzumuina o manhinga a iú ka bhange kima kioso-kioso.

²⁰ Maji mu Juda-phe muà kala ni iá a tunga-mu ku mivu ni mivu, Jeluzaleme ue ua kà tungiua kutunda muiji kuiza muiji.

²¹ Nga kà zelesa o manhinga ma ió oso ki nga a zelesele luua. Mbata Jihova ua kà tunga mu Ziione.