Jouele 2 - O Mikanda Ikola

Phangu ia kudiela

¹ Mu Ziione xikenu-mu mbungu, dikodienu ni dízui dia suína mu mulundu uê ukôla. Ene oso a tunga mu ngongo a tekete, kuma kizuua kia Jihova kì kiza, kiene kia zukama kiá.

² Kizuua kia kuvunda, kizuua kia dilamba; kizuua kia ifuke ni kitombe kiedi ni kiene bui, mukuâ ni mukengeji ua kimene ki u di muangena ku milundu, kiene ue ki di sanha o kifuẋi kia mundu ua dikota kia nguzu, kia bhingi kuila tundé ku xahulu kiluua ki kala-ku, o ku pholo ue, ku mivu ia-nda kuiza-ku, ki kià kala-ku dingi, kutunda muiji kuiza muiji.

³ Ku pholo iê ku dianga túbhia tuamuzukuta, o kuema diê milengu iia ni Kiaula; o ixi bhu pholo iê mukuâ ni Díbhia dia Edene, maji o kuema diê-phe i di bhanga kikangalakata kiósengulule; kiene muene, kuma kana kama ka kà mu somboka.

⁴ O kidifua kiê mukuâ ni kidifua kia jikabalu; o ulengelu uê mukuâ ni athu a sambela ku jikabalu.

⁵ Kinuminu kiê mukuâ ni makalu a muia ni kutuka-tuka ni lusolo bhu thala ia milundu; kia kà di fuangana mukuâ ni kinuminu kia milengu ia túbhia tua mu jikinisa ibhiate, kala kifuẋi kia nguzu, a ki tumina ku bokona mu ita.

⁶ Bhu pholo iâ, ifuẋi ioso ia kà kala ni uôma; pholo joso ja kà kituluka kala njilu ia ímbia.

⁷ Kia kà lenga, a kà lenga ni uzonda uoso, mu ku sambela ku imbaka ela kala iiala ia manekena kuia ku ita! Mu kuenda, muthu ni njila iê, muthu ni njila iê, maji ku muxinda kuala ka kà tunda-ku.

⁸ U phopheka phangʼiê ku mu mono; muthu ni muthu mu kanjila kê; a kà di takuila ku xibhata imoxi hé a kà bula njila mu kaxi ka ita maji ku di kuama lémbue.

⁹ A kà bokona mu mbonge, a kà lenga-lenga ku thandu dia imbaka, jinzu a kà ji kanduka ni ku bokuena bhu jinjanena kala ki bhanga o muii.

¹⁰ Mu ku a mona ixi ia kà teketa, maúlu a kà di tungutisa, a kà zamba; ni dikumbi ni mbeji a kà di teka hé a kà xiketela, jithéthembua kubenha kuâ a kà ku katula-ku.

¹¹ Jihova-phe ua tuamenena bhu pholo ia kifuẋi kiê, u zangumuna mbimbi iê kuma o ilômbo iê kuvula kuahi! Mukonda muene Dizonda mu kubhanga kioso kia zuela! Mbata kizuua kia Jihova kionéne, ki bheka uôma! Nanhi ua kà tena kuimana-bhu?

Athu oso a Exana mu kudiela

¹² Né mu kindala kienhiki muene, Jihova uixi; Ni muẋima uenu uoso, Vutukenu kokuami; bhangenu-kiu muene ni kujila, ni kudila, ni mukondo.

¹³ Bhu kididi kia kutandula o izuatu ienu, tandulenu muẋima uenu, mu vutuke ku Jihova, Nzambi ienu; mukonda muene mukua henda, ua lenduka, ka thathamana lusolo, ukôla mu kubhanga o mbote, anga u diela se u bhanga kia iibha mu kubazela kuê.

¹⁴ Nanhi ua kijiia kuila muene ualulukê nʼa diela, phala kuema diê nʼa kʼàxa-ku kizediuise mu mibhaku ia makúdia ni makúnua phala Jihova Nzambi ienu?

¹⁵ Xikenu mbungu mu Ziione, jilenu ni kujila ku kôla; kolenu kizuua kia kufula ioso ni ku di fudisa.

¹⁶ Kifuẋi bhongololenu-kiu kionge zelesenu-kiu, ikulakaji ia kuka a i bhongolole, bhongololenu ue tuana tua ndenge kumoxi ni ia a mu kuámua ku mele; ngaiala a tunde mu xilu diê, o díbhanga di tomboloke mʼonzo ia ubhanga.

¹⁷ Dilenu, enu mu jinganga, mu akunji a Jihova, didilenu bhu kaxi ka kitelembe ni kalatódio, muile: Kondeka athuʼé; eie u Jihova undundu ué kana ku u bhakula mu lusebu, mbebhu miji ki i tu te môndo; kuma mu kaxi ka ifuẋi a kiʼambela-hi kuila: Nzambi iâ iú kuebhi?

Polomesa ia ima iadixala

¹⁸ Bheneʼobho Jihova ua kà kala ni muanu uaʼxi iê, kifuẋi kiê ua kà ki kuatela henda.

¹⁹ Jihova ua kà tangela mundu uê, ua kà kumbulula, uixi: Talesa-ze, ngi mi tumikisa tiliku, ni vinhu ia ubhe ni maji, ima iosuʼiii ia kà mi kuma; ki ngà mi bhana dingi ku lusebhu mu kaxi ka akua jixi.

²⁰ Ió ua tokala ku suku ngi mu bhangesa kuia dikanga nʼa mi xisa; ngi mu takuila dikanga ku ixi ia kukuta ia kikangalakata; u di lulama ni musanza ua kalunga ku mutundila kumbi, ku dima diê kuene ku kala musanza ua kalunga ka mufuila kumbi; dizumba diê dia bolo diʼà kala muʼtukumuka, o kibuzu kiê kia kàla mu banda bhulu, kuma Jihova ua bhange ima ia makota!

²¹ Eie-phe, u ixi, kana ku kala ni uoma; tana u sanguluke muene, kuma Jihova ua bhange ima ionéne!

²² Enu ue mu iama ia mukáu ki mu kale ni uoma, kuma sabhelela mu ixi ia kisekele ia-nda kubuingita dingi, mbata miẋi ia kà bhana dingi ibundu iê, ni muvide ni mufiku ia kà bhakula muene kia nzungule.

²³ Enu-phe mu anʼa Ziione, tanenu-ku mu sanguluke mua Jihova Nzambi ienu, mbata muene ua kà mi bhana ió u mi longa mabatuilu ma kidi, ua kà mi tuluila mvula ia kudinji ni ia kasamanu bhu mbeji ia dianga, kala ku dimatekenu.

²⁴ Bhu mavundilu bhuà kezala ni tiliku, matangi a ku kamena vinhu ia uisu ni maji a kà subhajaka.

²⁵ Mivu ioso ia mi jikinisa kihoho, ni kabôtua, ni kajeja ni thothola, kifuẋi kiami kia dikota ki nga mi tumikisine mu ku mi lua enu, eme ngi mi vutuila-iu.

²⁶ Hé mua kà dia ima ia ndumba anga muikuta, ni mu kale mù ximana dijina dia Jihova Nzambi ienu, ua mi bhangela ima ia madiuanu kala iii; kieneʼokio mundu uami ka kà kala dingi ni sonhi.

²⁷ Enu anga mu kiʼijiia, kuila, eme ngala muʼaxaxe ka Izalaiele, ni kuila ue eneʼmuène ngó Jihova Nzambi ienu, kana-ku dingi uengi ua di te-ku. O mundu uami-phe ka kà u kuatesa dingi jisonhi katé ku hádia ni hádia.

Polomesa ia kulundulula o Nzumbi

²⁸ Kieneʼokio-phe anga kia kà bhita kuila, nga kà lunduluila o Nzumbi iami ku thandu dia xitu ioso, anʼenu a mala ni anʼenu a ahatu a kà zambula; o ikulakaji ienu a kànjiua jinzoji, minzangala ienu a kà mona isuma.

²⁹ Ngà kà lunduluila ue Nzumbi iami ku abhika a mala ni ku abhika a ahatu mu izuua mueneʼomo.

³⁰ Nga kʼèdikiza isuma mu dimbinza ku diulu ni mu ngongo bhoxi, túbhia ni manhinga ni mifundangaia ia matuta ma dixi.

³¹ Dikumbi dia kà kituka kitombe kia usuku, o mbeji i di bhanga manhinga, kioso hanji ngó kizuua kia dikota kia Jihova, ki kuata uoma, kiluua ki bhiẋila.

³² Kieneʼokio-phe, uoso ua kà hingila dijina dia Jihova ua kà bhuluka. Kuma ku mulundu ua Ziione, ni mu Jeluzaleme, muà kala dibhandulukilu kala kiene mu ki tanga kuala Jihova, ni kua iá oso a subhuka a kà exana kuala Jihova.