Josuué 9 - O Mikanda Ikola

Akua Ngibiione a tobhesa Josuué, iú ua kuata-nâ ukamba

¹ Anga kibhita kiki, jisobha joso ja kexi ku sámbua kunu dia Njolodá, ku mulundu, ni mu jingânga, ni ku kibumu kioso kia musanza uónene ua kalunga bhu dilulamenu dia Libano, ni Mahiti, ni Mamodi, ni Makanana ni Mapelezi, ni Mahivi, ni Majebuzi, kia zubha ku kʼivua,

² a di phopha ni muenhu umoxi, mbé kúlua ni Josuué ni Izalaiele.

³ O akua bhata mu Ngibiione, kievu kioso Josuué kia bhange ni mu Jedikó ni mu Hai,

⁴ abhanga-bhu ue ndunge; a di bhangesa kala jiphunga jókatule, anga aia, a longela jisaku jòkulu ku kunda dia jibulu jâ, ni isudi iòkulu ia vinhu, iabaze kiá, iòbande;

⁵ ku inama a zuata jisabhatu jakuka, jòbande, a zakela izuatu iòkulu, ku mikutu iâ; jimbolo joso ja kudila mu njila jakukuta, ja kuata kiá mbutukutu, jene ja huta ia longela.

⁶ Anga eza kua Josuué, bhu kibangu bhu Jidingale, anga a mu ambela, ni muene ni mala a Izalaiele, kuila: Tua tundu ixi iadikanga; ndokuenu, mu te kiá kikutu nʼetu, kindala.

⁷ Mala a Izalaiele anga a kumbulula o Mahivi, exi: Sumba-phe mua tungu muʼaxaxi ketu; tuta kiebhi dingi kikutu nʼenu?

⁸ Ene-phe ambela Josuué, exi: Etu tuala tu akalakadiʼé. Kuala Josuué, enu-phe mu akuahi? Mua tundu kuebhi?

⁹ Ene anga a mu vutuila, exi: Abhikʼé atundu kanga dia lebha muene, mbebu o dijina dia Jihova Nzambi ié; mbata fuma iê tua ivu, ni ima ioso ia bhange mu Ijitu tua ivu ue;

¹⁰ ni ima ioso ue ia bhange ku sobha jiiadi ja Mamodi, a kexi ku sámbua dia Njolodá, a Sihone, sobha ia Hexebone, ni Hoke, sobha ia Basane, ua kexi mu Jitalote, ioso muene tua ivu.

¹¹ Kienhiki-phe adiakimi etu, ni jithungi-a-bhata moxi ietu, a tu zuelesa, exi: Iudikenu huta ia uenji, sembele muie ku takana-nâ; mua kà ambela, muexi: Etu kiá tu kala tu jiselevende jenu; tenu-phe kiá kikutu nʼetu.

¹² Kizuua ki tua katuka ku mabhata metu, jimbolo jiji tua ji longela hanji ni munza uê, mbé o huta; talesa-ze, leluʼidi ja kukuta, ja kuata músuta.

¹³ O isudi-phe iii, i tuezalesa ni vinhu, iakexi hanji ni ubhe uê, talesa hanji ki ia baze ni iene; ni izuatu ietu ni jisabhatu jakuka, mbebu o dikanga di tua huha.

¹⁴ Athu-phe kia tale ku huta iâ, a a xikana, kʼebhula dingi kaiula kua Jihova.

¹⁵ Josuué ua di tambulula-nâ, iu uate-nâ kikutu kia kuila, ki mu fu dingi; makota ma kionge a ta-bhu muene mulôko.

¹⁶ Mu kuila-phe bhu bhita izuua itatu, kia te-nâ kiá o kikutu, évua-phe kuma enhó ki akua makanga, kana, aia-nâ bhuamoxi, muʼaxaxi-kâ.

¹⁷ Mbata anʼa Izalaiele endele dikanga dia izuua iiadi, o kia katatu-phe a bhixila mu jisanzala ja ene; jisanzala jâ-phe, Ngidiione, ni Kefila, ni Behelote ni Kidiate-Jadimi.

¹⁸ Anʼa Izalaiele-phe, ka tenene kunemeka enhó, mukonda o makota a kionge a a lokela kua Jihova Nzambi ia Izalaiele, ku a bhaka ni muenhu; kienhiki kionge kioso ki kuata ku di ngunguina, exi: Adiakimi azange.

¹⁹ Makota oso ambela kionge kioso, kuila: Enhó etu tua a lokela kiá mu dijina dia Jihova, Nzambi ia Izalaiele; o ki tualʼiki, ki tu tena dingi ku a zambesa.

²⁰ Inda tuila kiki, tu a bhana muenhu; mbebhu o mulôko u tua te-bhu, phala ki ku tu tulukile njinda ionéne ia Nzambi, kuma ene tua a lokela kiá.

²¹ Adiakimi-phe a ambela exi: A kole kiá o muenhu, akale kiá a-ẋangi a jihuinhi, a-teki a menha a kionge kioso, ene anga a bhanga kala kia a tangela o makota.

²² Josuué anga u a exana, u zuela-nâ, uixi: Enu mua tu tobhesa kiebhi, kuila: Tua tungu dikanga, mbé muenhenu muʼaxaxi ketu?

²³ Kiki-phe mua di bhekela mázui: Ubhika ki ua mi bhua dingi muaxaxe kenu, ua kukala a-ẋangi a jihuinhi, ni a-teki a menha ma dibhata dia Nzambi iami.

²⁴ Ene-phe a kumbulula Josuué, exi: Etu, o kia tu bhangesa kiki, uoma ua kúfua, mbata kutanga o kidi, tuevu a tu kundu-kiu muene kuma o Jihova Nzambi ié ua tangela Mozé, selevende iê, kuila oxi ioso iii hinu u mi bhana-iu enu, o mundu uoso ua tunga-mu u u jikinisa; tuexi-phe, etu tuafu-ó.

²⁵ Kala kiki, talesa, etu bhu makuʼé kiá bhu tuala; eie hé ua mono kima kioso-kioso kia fuama o ku tu bhanga, bhanga kiá.

²⁶ Kiene-phe kia a bhangʼiki Josuué ua a kudila bhu maku ma anʼa Izalaiele, ki kia xikina dingi o ku a jibha.

²⁷ Kizuua kienhókio, Josuué ua a te mu kukala a-ẋangi a jihunhi, a-teki a menha ma kionge kioso, ni kalatódio ue ka Jihova, katé mu kizuua kia lelu, bhu kididi bhuoso bhua sola.