Josuué 7 - O Mikanda Ikola

Anʼa Izalaiele a a tolola kuala jinguma, mukonda dia kikuma kia Akane

¹ Anʼa Izalaiele-phe anga a tondala mu somboka kijila kia ima iókidike; kuma Akane, monʼa Kami, monʼa Zabedi, monʼa Zelahe, mukua muiji ua Juda, ku ima ia kidika ua katula-ku; njinda ia Jihova anga i uama ku thandu dia anʼa Izalaiele.

² Josuué anga u katula athu bhu Jedikó, u a tuma ku Hai, kua zukama Bete-Avene, ku mbandu ia thunda ia Betele, anga u a ambela, uixi: Bandenu hanji mu londe ixi. Anga a banda a londa Hai.

³ Anga a vutuka kua Josuué, exi: Ki ki bhingi kuia ngó mundu uoso; ku bande ngó midi jiiadi mba jitatu ja makuenze, a soko kubeta Hai, mundu uoso ka a talese ngó hadi ia kuia-ku, kuma kuenhoko a toloʼâ.

⁴ Ku kifuẋi anga kuiʼé ngó midi jitatu ja makuenze; enhá anga a a kaia kuala akua Hai.

⁵ Akua Hai anga a jibha-bhu mba makuinhi atatu a muthu ni kisamanu, anga a a bhesa lusolo, tunde bhu muelu ua kimbaka kiâ, katé bhu Xebadimi bhene kubula o matadi, anga enda ni ku a beta dingi kioso kia mu kulumuka o mulundu ni kulenga. O miẋima ia kifuẋi anga i botomoka, i kala kala menha.

⁶ Josuué anga u tandula izuatu iê, u di bhala pholo bhoxi, bhu pholo ia álaka ia Jihova, katé mu ngoloxi, ni muene ni adiakimi a Izalaiele; anga a di kuua mavu mu mítue.

⁷ Josuué anga u samba, uixi: Aiué! Ngana Jihova, tata! Kia bhiti kiebhi, kifuẋi kiki ua ki zaúkisa Njolodá, mbé ku tu bhakula bhu makuʼa Mamodi, nʼa tu buikise? Tamanu se tua kexidietu kiá ku sámbua koko dia Njolodá!

⁸ Ngana, tata! ngʼila kiebhi, ki tualʼiki? Kuma Izalaiele a bhana makunda mu kulenga jinguma jâ.

⁹ Mukonda akua Kanana, ni akuaʼxi oso, kia-nda ku kʼivua, a-nda ku tu konda, anga a tu batula dijina dietu mu ngongo. Eie-phe Ngana, o dijina dié diajingi, dia dikota, ua-nda ku di bhanga kiebhi?

¹⁰ Jihova anga uambela Josuué, uixi: Balumuka, ua di tela-hi o pholo bhoxi kiki?

¹¹ Izalaiele uate kituxi; ua somboka muene o kikutu kiami kioso ki nga mu tendelela; ku imbamba iókidike ua katula-ku, ua nhana, ua te makutu; katé ua ki suekela mu kaẋi ka imbamba iê muene.

¹² Kiene kia lembuela anʼa Izalaiele kuimana bhu pholo ia jinguma jâ; a bhana makunda ku jinguma ni kulenga, mukonda ala ni mázui. Hé mu kamba kutubhula kimʼokio kiokidike muʼaxaxi kenu, eme ki ngi kala dingi kumoxi ni enu.

¹³ Balumuka, u zelese o kifuẋi, u a ambele kuila: Di zelesienu, mbé kizúua kia mungu, kuma Jihova, Nzambi ia Izalaiele, uambe kiki: Muala ni kima kiókidike muʼaxaxi kenu, mu Izalaiele; kiene ki mua lembuela kuimana bhu pholo ia jinguma jenu, katé ki mu tubhula o kima kiókidike kiala muʼaxaxi kenu.

¹⁴ Mungu ki kúkia, mu bhongoloka ku miji ienu; uoso muiji ua kuata Jihova, u bhongoloka dingi ku mabhata-mabhata; dibhata-phe dioso dia kuata Jihova, di bhongoloka dingi ku jinzu-jinzu; onzo ioso ia kuata Jihova i bhongoloka dingi ku muthu-muthu.

¹⁵ Uoso-phe a mu kuata ni kima kiókidike, u kala muthu ua ku muoha mu túbhia ni dibhata diê dioso; mukonda ua somboka kikutu kia Jihova, uabhange ulaji muʼaxaxi ka Izalaiele.

¹⁶ Josuué anga u balumuka mu kimene-mene, u bhongolola Izalaiele ku miji iâ; anga u kuata-bhu o muiji ua Juda.

¹⁷ Anga u bhongolola muiji ua Juda; a kuata-bhu dianda dia akua Zelahe; anga u bhongolola dianda dia akua Zelahe ku mabhata-mabhata, a kuata-bhu o bhata dia Zabedi;

¹⁸ anga u bhongolola dibhata dia Zabedi ko mala-mala; anga a kuata-bhu Akane dia Hami, dia Zabedi, dia Zelahe, mukua muiji ua Juda.

¹⁹ Josuué anga uambela Akane, uixi: Monʼami, nga ku diondo, bhana fuma kua Jihova, Nzambi ia Izalaiele, u fisale bhu pholo ia muene; ngi tangele kioso ki ua bhange; kana ku ngi dingila-kiu.

²⁰ Akane anga u vutuila Josuué, uixi: Kidi kiene, nga te kituxi kua Jihova Nzambi ia Izalaiele, kiene ki nga, bhangʼiki:

²¹ kioso ki nga mono ku madibongela kapote ka Babilónha ka uabha kiavulu, ni hama jiiadi ja xikuli ja phalata, ni mutàdi ua ulu u pezala makuinhi atanu a xikulu, luimbi lua ngi kuata, eme nga i katula iene ioso nga i kandeia bhoxi, eme nga i sueka mu balaka iami, ni kitadi kiene-ze kí bhobho.

²² Josuué anga u tuma jiphunga kuia mu kutala mʼonzo, ene a lengela ku balaka iê, kapote a ka sanga bhua ka sueka mu balaka iê, iene ioso ni kitadi ki bhobho.

²³ Ima ienhoio anga a i katula mu balaka iê, a i bheka kua Josuué, ni ku anʼa Izalaiele oso; anga a i tula bhu pholo ia Jihova.

²⁴ Bhenhobho Josuué, ni anʼa Izalaiele oso, a kuata Akane dia Zelahe, ni phalata, ni kapote, ni mutàdi ua ulu, ni anʼê a mala ni a ahatu, ni jingombe jê, ni jibulu jê joso, ni jimbudi, ni balaka iene, ni ima ioso kiá ia kexile na-iu, anga a i bheka mu honga ia Akole.

²⁵ O kia bhixila momo, Josuué anga u mu ambela, uixi: Eie ua tu bhekela-hi kuxixima kuosʼuku? Jihova phe ue ua ku bhe kuxixima kizuua kia lelu. Izalaiele ioso anga a mu bûba ni matadi bhenhobho. Anga a oha mu túbhia, kioso kia zubha ku a bûba ni matadi.

²⁶ Ku thandu diê anga a lunjika-ku ndumba ia dikota ia matadi. Katé ni lelu iá bhobho. Jihova anga u bateka kiua njinda iê. Kiene kia bhangesa o kididi kiókio ku kʼixana exi, Honga ia Akole, katé mu kizuua kia lelu.