Josuué 5 - O Mikanda Ikola

Anʼa mala a a saia bhu Jidingale

¹ Mu kubhanga izuua, jisobha joso ja Mamodi ku sámbua dia Njolodá ku luiji ni jisobha ja ákua Kanana, a zukama ku kalunga, kia zubha kuívua kioso Jihova kia kukutisa menha a Njolodá bhu pholo ia anʼa Izalaiele, katé ki tua zaúka kiambote, miẋima iâ ia botomoka, uiala ki u moneka dingi ua kubhânga ni anʼa Izalaiele.

² Izuua ienhoio Jihova uambela Josuué, uixi: Iudika jiphoko ja matadi, u saie anʼa Izalaiele lua kaiadi.

³ Josuué anga u iudika jiphoko ja matadi, anga u saia anʼa Izalaiele bhu kalundu ka inhûnga, muene Alalote.

⁴ O kia mu bhangesa kusaia kienhiki: Kuma kifuẋi kioso kia tundile mu Ijitu, mala, makuenze oso a ita, ene oso a fuila mu njila, mu kikangalakata, kia zubha kutunda mu Ijitu.

⁵ Kuma ene oso a tundile momo a a saie kiá, oso-phe a a vualela mu kikangalakata, mu njila muejila mu kutunda mu Ijitu, ka a saie luua.

⁶ Kuma anʼa Izalaiele a nhungine makuinhi auana a mivu mu kikangalakata, katé kifuẋi kioso kia makuenze a ita a tundile mu Ijitu a buila, mukonda dia kukamba kuívua dízui dia Jihova; Jihova anga u a lokela kuma ka ehela dingi kumona ixi ioio ioso ia lokela jinga jitata jâ ku tu bhana-iu; ixi i kunguluka lete ni uiki.

⁷ Anʼâ-phe, a kulu, a bhingana mu ididi iâ, ene a a saie kuala Josuué; kuma ala ngó sé ku a saia, mukonda mu njila muejila ka ki bhangele dingi.

⁸ Kala kiki, kia zubha kusaia kifuẋi kioso, a kala hanji mu ididi iâ, bhu kibangu katé kieluka.

⁹ Jihova anga uambela Josuué, uixi: Lelu nga kundumuna môndo ua Ijitu ua kexile ku thandu dienu, kiki uabhu-ku. Kiene kia lukila-bhu exi bhu Jidingale, katé mu kizuua kia lelu.

Anʼa Izalaiele a bhitisa fesa ia Phasu. Maná i batuka

¹⁰ Anʼa Izalaiele anga a kala hanji bhu kibangu kiâ, bhu Jidingale. Mu kizuua kia kakuinhi ni kiuana kia mbeji ienhoio, anga a bhitisa o Phasu bhenhobho, mu kumbi dia ngoloxi, mu ngânga ia Jedikó.

¹¹ Kutunda mu kubhitisa Phasu, ki kuáki a dia kiá ku idima ia mavu a Kanana, ni jimbolo ja kambe kifulufulu kia kinanesa, ni masa óuohe, kizuua kienhókio.

¹² O kia zubha kúdia ku idima ia mavu a Kanana, kimene kiê ni maná ia batuka; tunde kienhókio anʼa Izalaiele ka kala dingi ni maná ia kúdia; muvu uosʼó-phe a di kiá ku idima ia ixi ia Kanana.

Josuué ku mu tukulukila mukunji

¹³ Anga ki bhita kuila, kioso kiala Josuué mu mukáu ua Jedikó, u zambula mesu, u tukumuka diiala diemana ua di bhana-nê pholo, lukuaku lué lua kuata xibhata ia fomona mu kizu; Josuué anga u mu bhiẋila, uixi: Eie ua di bande kokuetuʼetu, inga ku jinguma jetu?

¹⁴ Kuala muene, kana, ngi kilâmba kia ifuẋi ia Jihova ngeza. Josuué anga u diunda, u ta pholo bhoxi, u mu bheza, uixi: Ngana iami, mubhikʼé u mu ambela kima kiahi?

¹⁵ Kilâmba kia ifuẋi ia Jihova anga uambela Josuué, uixi: Zula jisabhatu je ku inama; kuma kididi ki uemana ki kôla, Josuué anga u ki bhanga.