Josuué 4 - O Mikanda Ikola

Kuinhi dia matadi ni kiiadi a a katula mu honga ia Njolodá

¹ Kia zubha kifuẋi kioso kuzaúka, ku sámbua dia Njolodá abhu-ku, Jihova uambela Josuué, uixi:

² Tungula; kuinhi dia muthu ni kiiadi mu kaẋi ka kifuẋi, ku muiji muthu, ku muiji muthu,

³ muʼa tume kuma: Katulenu matadi mu kaẋi ka Njolodá, bhene bhua tula o makanda a inama ia jinganga ni kuimana, kuinhi dia matadi ni kiiadi, muie-nâ ku mukáu, bhuoso bhu mu tudila kuzeka usuku ua lelu, matadi bhene bhu mu a tula.

⁴ Josuué anga uixana kuinhi dia muthu ni kiiadi, a diangele kiá ku a tungula mu kaẋi ka Izalaiele, ku muiji muthu, ku muiji muthu.

⁵ Josuué anga u a ambela, uixi: Bhitenu, kiosuiki álaka ia Jihova, Nzambi ienu, hanji iemana mu kaẋi ka Njolodá, mu zangule muthu ditadi diê, muthu ditadi diê, a di te bhu kisuxi, kualula o matadi a soka ni miji ia anʼa Izalaiele.

⁶ Mbé ki kale kijimbuete mudienu; hádia anʼenu, ku pholo ku muia, kia kèla: Matadi enhá, edi kiebhi?

⁷ Kienhókio mua kà a tangela, muixi: Mukonda menha a Njolodá a batukile bhu pholo ia álaka ia kikutu kia Jihova; kioso ki ia zaukile Njolodá, menha a Njolodá a batukile ku thala iê; matadi enhá-phe a kala dixinganeku di nangenena dia anʼa Izalaiele.

⁸ Anʼa Izalaiele anga a bhanga kala kia a ambela Josuué, hé a zangula kuinhi dia matadi ni kiiadi, mu kaẋi ka Njolodá, kala kia tange Jihova kua Josuué, konda ia matadi iene imoxi ni konda ia miji ia Izalaiele; anga aia-nâ katé bhuoso bhua tudila kuzeka, anga a a tula bhenhobho.

⁹ Josuué anga u lunjika ue kuinhi dia matadi ni kiiadi mu kaẋi ka Njolodá, bhuoso bhuemana inama ia jinganga ambata o álaka; matadi iá-ué bhenhobho katé mu kizuua kia lelu.

¹⁰ O jinganga ambata álaka anga emana mu kaẋi ka Njoloda, bhoxi dia kukuta, katé kia zubha kubhanga ima ioso ia tumu Jihova kua Josuué, ku iambela kifuẋi kala Mozé kia iambelele Josuué. Kifuẋi anga a bhanga lusolo, katé ene oso kia zaúka.

¹¹ Kioso kia zubha kifuẋi kioso kuzaúka, ni álaka ia Jihova ue i zaúka kiua, ni jinganga ue ku mesu a kifuẋi kioso.

¹² Anʼa Lubene, ni anʼa Ngadi, ni mbandu ia muiji ua Manasa, anga a zaúka uâ, a maneka, ene a tuamenena ku pholo ia anʼa Izalaiele, kala kia a tangelele Mozé.

¹³ Makuinhi auana a midi ia makuenze, a meneka mu kúlua ita, a zaúka bhu pholo ia Jihova, anga a tula mu ngânga ia Jedikó.

¹⁴ Mu kizuua kienhókio Jihova ua jingisa Josuué ku mesuʼa Izalaiele ioso; anga a mu kala ni uoma, kala kia kexi ni uoma ua Mozé katé bhu ufuilu uê.

¹⁵ Jihova anga uambela Josuué, uixi:

¹⁶ Tuma jinganga ambata álaka ia umbangi, kuma a zaúke kiá, a tunde mu kaẋi ka Njolodá.

¹⁷ Josuué anga u tuma jinganga, uixi: Zaúkenu kiá.

¹⁸ Mu ku ki bhanga-phe, jinganga ambata álaka ia kikutu kia Jihova, kiedi a zaúka, mu kaẋi ka Njolodá a tundu-mu, inama iâ anga i tula ku mukáu kua kukuta, menha a Njolodá a vutuka dingi ni ku kunguluka mu honga iê; ni sámbua ni sámbua diezala dingi kala kia kexile.

¹⁹ Kifuẋi anga a zaúka Njolodá mu kizuua kia kakuinhi ku mbeji ia kamoxi, anga a ta kibangu bhu Jidingale, bhene bhu mbambe ia thunda ia Jedikó.

²⁰ O kuinhi dia matadi ni kiiadi, dia katula mu kaẋi ka Njolodá, Josuue anga u a lunjika bhu Jidingale, u a emika bhenhobho.

²¹ Anga uambela anʼa Izalaiele, uixi: Hádia, ku pholo ku muia, kioso anʼenu kia kʼebhula jitata, kuila: Matadi, enhá, edi kiebhi?

²² Mua kʼèjidisa-phe anʼenu, kuma: Izalaiele ua zaúkile Njolodá muenhú bhoxi dia kukuta.

²³ Kuma Jihova Nzambi ienu, ua kukutisa menha a Njolodá bhu pholo ienu, katé mua zubha kuzáuka, kala kia bhange ue Jihova Nzambi ié ku Kalunga Kakusuka, kuma ua ka kukutisa menha katé ki tua zaúka etuʼenhoso;

²⁴ mbé ifuẋi ioso mu ngongo ejiie kuma lukuaku lua Jihova lu kôla; enu uenu ni mu kale ni uoma ua Jihova, izúua ioso, katé ku hádia ni hádia.