Josuué 3 - O Mikanda Ikola

O kuzaúka Njolodá

¹ Josuué anga u di meneka; a katuka ku Xitimi, eza mu honga ia Njolodá, ni muene ni ana oso a Izalaiele, a ta kibangu bhu tabhu kioso ka zaúka luua:

² O kia zubha kubhanga izuua itatu, jithuame ji bhita mu kilômbo;

³ anga a tuma o kifuẋi, exi: Kioso ki mu mona álaka ia kikutu kia Jihova, Nzambi ienu, ni jinganga ni jilevita a katuka ni ku i zenza, kiene ki mu katuka bhu kididi kienu, anga mu i kaiela.

⁴ Inda-phe, mu xia-bhu dikanga bhu kaẋi kʼenu ni álaka, midi jiiadi ja kóvadu, mu di zonga muene; kana ku i zukama dingi, nda muijiie njila ioso i muila; mukonda mumu mu mua-nda kuila kiluua ngó mu bhita-mu.

⁵ Josuué anga uambela kifuẋi uixi: Di zelesienu; mukonda mungu, kuma ki kúkia, Jihova ua-ndu bhanga madiuanu muʼaxaxi kenu.

⁶ Josuué anga uambela jinganga, uixi: Zangulenu álaka ia kikutu, mu tuamenene kifuẋi ku pholo. Anga a zangula álaka ia kikutu, a suluka ku pholo ia kifuẋi.

⁷ Jihova anga uambela Josuué, uixi: Kizuua kia lelu, ngi mateka ku ku jingisa ku mesu a Izalaiele ioso, ni ejiie kuma kioso ki nga kexile ni Mozé, kiene ki ngi kala ni eie.

⁸ Eie-phe tuma jinganga ala kuzenza álaka ia kikutu, kuila: Kioso ki mu bhiẋila bhu mbambe ia menha ni kibumu, mu tula ngó inama mu menha, muimana.

⁹ Josuué anga uambela anʼa Izalaiele, uixi: Bhixilenu kunu, muívue kia zuela Jihova Nzambi ienu.

¹⁰ Josuué uixi: Kiene ki mu kʼijidila, kuma Nzambi ia muenhu muala-nê muʼaxaxi kenu, mukonda muene sé ngó kufula, ua-ndu kaia bhu pholo ienu akua Kanana, ni Mahiti, ni Mahivi, ni Mapelezi, ni Jijidingaze, ni Mamodi, ni Majebuzi.

¹¹ Talenu-phe, álaka ia kikutu kia Ngana uavu ixi ioso, iene i mi tuamenena kukutuka mu zaúka Njolodá.

¹² Kala kiki, tungulenu-ku kuinhi dia muthu ni kiiadi, a soke ni miji ia Izalaiele, ku muiji ku tunda muthu, ku muiji ku tunda muthu.

¹³ Mua-ndu mona ki ki bhita, makànda ma jinganga oso ambata álaka ia Jihova, muene Ngana uavu ixi ioso, ela a tula ngó mu menha ma Njolodá, menha ma Njolodá ma kà batuka, o menha ala kutunda ku thala a di lunjika mulundu.

¹⁴ Anga ki bhita muene, kuma kioso kia katuka kifuẋi mu jifundu jâ, mu kuzaúka Njolodá, o jinganga, ala kuzenza álaka ia kikutu, a tuamenena ku pholo ia kifuẋi;

¹⁵ enhó, oso ambata álaka ia kikutu, edi a bhiẋila mu Njolodá, makànda ma jinganga ambata álaka kia zubha kudiota mu menha, (kuma Njolodá mukua kubobesa mukáu uê sámbua ni sámbua, bhu makumbi a kumuna).

¹⁶ Bhenhobho menha oso ala kutunda ku thala emana, a di lunjika kala mulundu, anga a di zala ku thala muene, katé mu kuia bhu mbonge ia Adane bhua lulama ni Zeletane; o menha-phe ala kuia ku luiji a batuka ku akuâ, anga aia ni honga katé mu kizanga kia môngua; kifuẋi anga a zaúkila bhabha bhua lulama muene mu Jedikó.

¹⁷ Jinganga-phe ambata álaka ia kikutu kia Jihova, anga emana ku mavu abhu menha mu kaẋi ka Njolodá, akua Izalaiele oso anga a zaukila ku mavu akukuta, katé kifuẋi kioso ku sámbua kuku a bhu-ku, hé a tenena ku sámbua koko.