Josuué 24 - O Mikanda Ikola

Josuué u tela kifuẋi kioso dilunda dia ima ioso ia a bhanga jinga Nzambi

¹ O ki kia bhiti, Josuué ua bhongolola miji ioso ia Izalaiele bhu Xikeme; anga uixana ikulakaji ia Izalaiele, ni ilôlo iâ, ni afundixiʼâ, ni jifixiiadi. Ene oso anga a di bheka bhu pholo ia Nzambi.

² Josuué-phe anga uambela o kifuẋi kioso, uixi: O Jihova, Nzambi ia Izalaiele, uambe kiki: Mu xahulu, ku dimatekenu, o malembʼenu, a Tela, phaiʼa Malahamu, ni Naholo a tungile ku sámbua dia ngijiʼoko, anga a kuata kubheza jinzambi jengi.

³ Eme-phe nga tungula-bhu tatʼenu Mbalahamu, ku sámbua dia ngijiʼoko eme nga mu katula-ku, eme nga mu endesa ni kunhunga-nê mʼoxi ioso ia Kanana; mbutu iê nga i sokolola ue, mu ku mu bhana Izake.

⁴ Izake ue nga mu bhana Jakobo ni Izaú; o Izaú-phe nga mu bhana mulundu ua Seíle phala muene kiá; o Jakobo-phe ni anʼê a kulumukine mu Ijitu.

⁵ Kiene-phe ki nga tumikisina Mozê ni Alá, anga Ijitu ngi mu kuama ni mabhebhu, u nga bhange muʼaxaxi kâ; o ki kia bhiti, ku Ijitu nga mi katula-ku.

⁶ O ki nga zubha kutundisa adienu mu Ijitu, mueza ku musanza ua kalunga. Akua Ijitu-phe a zuididika jitata jenu, ni makalu ni akua kumondala jikabalu, katé ku musanza ua Kalunga-Kakusuka.

⁷ Ene anga a di kola kua Jihova, muene iú ua te kitombe bhuʼaxaxi kenu ni akua Ijitu, usunga kiua o musanza ua kalunga ku thandu diâ, anga ua vunga; enu-phe mesu enu a di muena kioso ki nga bhange ku akua Ijitu. O ki kia bhiti, mua nakina ndumba ia izuua mu kikangalakata.

⁸ Kiene kiua ki nga mi bheka mʼoxi ia Mamodi, a tungile ku sámbua koko dia Njolodá. Enhá-phe a bhangele nʼenu, maji eme-phe nga mi tula-u bhu lukuaku luenu, enu anga mu vua o ixi iâ, ene ia nga a buikisa ku mesu enu.

⁹ Balaki-phe, monʼa Zipolo, sobha ia Mouabhe, uafundumuka ue, mu kúlua ita ni Izalaiele. Anga u tuma kukolomona Balamu, monʼa Beola, phala a mi bhubhidile ni mázui.

¹⁰ Eme-phe nga ditumu kuívua Balamu; kia mu bhangesa ku mi ta kizediuise anga ngi mi bhulula bhu lukuaku luê.

¹¹ O ki muà zaúka Njolodá enu mueza mu Jedikó, akua-bhata mu Jedikó a lu mvunda nʼenu. Kiene ue kimoxi kia bhange o Mamodi, ni Mapelezi, ni Makanana, ni Mahiti, ni Jijidingaze, ni Mahivi, ni Majebuzi; eme-phe nga a bhakula bhu lukuaku luenu.

¹² Eme nga tuamekesa imadimbuende ku pholo ienu, enhá ene a mi kaiela lusolo o jinguma bhu pholo ienu, kiòmuene ue ni sobha jiiadi ja Mamodi; xibhata ié-eie ki iene ia ki bhange, o mufula ué ki uene ue ua ki bhange.

¹³ Hé ngiia o ixi nga mi bhana-iu, maji kʼenu mua kalakala-mu o ima ioso i mua sange-mu, mabhata nga mi bhana-u, maji kʼenu mua a tungile; enu mua tungu mu mabhata muenhomo, muadi ku milenga iâ ia mivide ni ia midiva, maji enu kʼenu mua i phaphe.

Josuué u ta dingi kikutu, luamukuá, ni kifuẋi

¹⁴ Kiki-phe Jihova mu kuatedienu uoma, muende ni ku mu bhikila ni muẋima ua tenena ni kidi. Texenu o mahamba oso a xingidisa jinga o jitata jenu mu sámbua dia ngiji ia Ufalate ni ku Ijitu, nda mu bhikile Jihova.

¹⁵ Maji-phe, se kia mi ibhila ku mesu menu o kubhikila Jihova, leluʼidi-phe Solenu kiá uoso mua fuama o ku mu bhikila: se muedi mu xingidisa o mahamba a xingidisa jinga o jitata jenu kia kexi mu sámbua dia ngiji ia Ufalate, mba-phe mu xingidisa o mahamba ma akua Mamodi avu o ixi iii mu mua tungʼumu, enu kiá! Maji eme-phe ni dibhata diami, tu bhikila Jihova.

¹⁶ Benhobho kifuẋi a vutula, exi: Etu nguetu kuila ki tu bhita kuxa Jihova, anga tu bhikila Nzambi jengi,

¹⁷ Mukonda Jihova muene Nzambi ietu. Muene ngó ua tu katula nʼetu ni jitata jetu kʼoxi ia Ijitu, mʼonzo ia ubhika, iu uabhange o ijimbuete ionène ioso iii ku mesuʼetu a kutala, iu ua tu ingi mu uenji uoso mu tua bhiti, ni muʼaxaxi ka ifuẋi mu tuejila.

¹⁸ Jihova iu ua tu kaiesela o matumbu osoʼâ bhu pholo ietu, katé ni Mamodi a tungile oxi iâ iii. Lémbue! Etu uetu tu bhikila jinga Jihova, mbata muene o Nzambi ietu.

¹⁹ Josuué-phe uambela o kifuẋi, uixi: Kana, ki mua-nda kutena kubhikila Jihova, mbata muene Nzambi ia kuzela ni kuiuka, Nzambi ia difuba, muene ikuma ienu ka kà i loloka, ka kà loloka ituxi ienu.

²⁰ Mukonda o ki mua-nda kuila muene mua mu xi, mua di te mu bhikila nzambi jengi, ua-nda kulunguluka anga u mi bhanga usuéia, u mi jikinisa, ku thandu dia kuzubha kiá o ku mi bhanga mbote ioso kala iii.

²¹ Kifuẋi-phe kiambela Josuué, exi: Lémbue, inda tu bhikila Jihova muene.

²² Eme Josuué, uixi: Kalenu-phe mu jimbangi, kuma enu-enu mua solo Jihova, phala ku mu bhikila. Kuala ene, exi: Tu jimbangi muene!

²³ Texenu-phe, kindala, o jinzambi joso ja idijila jala muʼaxaxi kenu; tenu muẋima uenu kua Jihova, Nzambi ia Izalaiele.

²⁴ Kifuẋi kia vutuila Josuué, exi: Etu tua-nda kubhikila muene Jihova Nzambi ietu, tu tumaka o dízui diê.

²⁵ Kienhiki Josuué, bhu kizuua kienhókio, mu Xikeme, kikutu ua ki kuatesa kiambote ni kifuẋi, iu ua ki xindi kuila kikale kijila ki nanganena.

O Ditadi dia umbangi

²⁶ Josuué iu ua soneka o maka oso iá mu divulu dia ngonge ia Nzambi; anga u katula kiditadi kiònene u ki phapha bhenhobho mu kilembeketa kia muẋi ua kaluvádio ua zukama ni dibhezelu dia Jihova.

²⁷ Josuué anga uambela o kifuẋi kioso, uixi: Ditadi didi hádia di tu kala mbangi; mukonda diene dievu o maka oso a tu ambela Jihova; hádia di mi kala ue ku umbangi ua ku mi kuzala, phala Nzambi ienu ki mu mu tele makutu.

²⁸ Kia bhiti ima iosuʼiii Josuué anga u sulula o mundu, ene hé aia muthu ku dibhata diê, muthu ku dibhata diê.

O Kúfua kua Josuué ni kua Eleazale

²⁹ Anga kibhita-phe kuila, imʼii ki ia bhiti, Josuué, monʼa Nune, mukalakadi uangene ua Jihova, uafu; mivu ia Josuué ia tenene kiá hama ia mivu ni kuinhi.

³⁰ Anga a mu funda mu jimbanmbe ja ubhinganu uê-muène, mu Timinate-sela, kididi kiene mu mulundu ua Ifalaime, ku mbandu ia kusuku ia mulundu ua Ngahaxi.

³¹ Mu izuua ioso ia Josuué, Izalaiele-phe ua bhikila jinga muene Jihova, ni mu izuua ioso ia ikulakaji, o adiakime, oso akolele hanji muenhu kuema dia Josuué, ia ejidile o kikalakalu kioso kia bhangele Jihova kua Izalaiele.

³² O ifuba ia Zuze a i fundile ue mu Xikeme, kuma anʼa Izalaiele a tundile na-iu ku Ijitu, hé a i funda mu mukáu iunhá uasumbile Jakobo kua anʼa Hamolo, tata ia Xikeme, mu hama ia itadi ia phalata; kuma ue o mikáu ioio iene iabhiti ku mbandu ia ubhinganu ua anʼa Zuze.

³³ Eleiazale ue, monʼa Alá anga ufua, hé a mu funda mu Jibeia bhu kalundu ka Finehase, monʼê, ka mu bhele ku mulundu ua Ifalaíme.