Josuué 2 - O Mikanda Ikola

Josuué u tuma ilôìo i iadi kulonda ixi, Lahaba dia kidianzunga

¹ Josuué dia Nune, kioso kiala bhu Xitime, u katula ilolo iiadi ni a bhite mʼoxi sé athu ku a ejiia, uixi: Ndenu, kà londienu ixi ienhiʼii ni mbanza ia Jedikó. Anga aia, a tula mʼonzo ia muhatu kidianzunga, dijina diê Lahaba, hé a zekela usuku muenhomo.

² Anga a ki tangela sobha ia Jediko, exi: Usuku ua lelu-ze, kua bokona mala a tokala ku anʼa Izalaiele, eza kulonda ixi.

³ Sobha ia Jedikó anga u tuma kua Lahaba, uixi: Tubhula bhu kanga mala enhó a ku sange, iá ia tula mʼonzo ié, mukonda eza kulonda ixi ioso.

⁴ Muhatu anga u katula malʼaiadi enhá, u a sueka, uixi kiki: Kua ngi sangele muene mala, inda eme ki nga ejiia kuoso kua tundu.

⁵ Kutula-phe mu kumbi dia kujika bhu muelu ua kimbaka, kuila kua vundu kiá, malʼó a i tundu, ene-phe kua di tela ki nga mono-ku; a kaiedienu ni lusolo, kindala mua-nda ku a kuata.

⁶ Muene-phe u a bheka ku thandu diaʼnzu, iu ua a sueka mu ixina ia linho ianeka muene ku thandu diaʼnzu.

⁷ Athu anga a kaiela malʼó mu njila ia Njolodá, katé muene bhu tabhu; aii mu kukaiela kia zubha kutunda, muelu ua kimbaka a u jika.

⁸ Kioso-phe kiluua a zeka, muhatu u a sanga ku thandu diaʼnzu,

⁹ anga u ambela mala, uixi: Eme ngejiia kuma, Jihova ua mi bhana muene ixi ienhiʼii, tua bhuuama kiá ni uoma uenu, akuaʼxi ene oso a botomoka bhu pholo ienu.

¹⁰ Kuma tuevu kioso kia kukutisa o menha ma Kalunga Kakusuka, mbé enu kubhita, ki mua tundu mu Ijito; ni kioso ue ki mua bhange jisobha jiiadi ja a Mamodi, ku sámbua dia Njolodá, ni Sihone ni Hoke, mua a buikisa muene.

¹¹ Tuedi tuívua ngó ima ioso iii, miẋima ia tu botomoka, kana-ku dingi diiala u tena kukola muxima bhu pholo ienu; kuma Jihova Nzambi ienu, muene Nzambi ni ku diulu ku thandu, ni mu ngongo bhoxi.

¹² Kiki-phe, nga mi diondo, ngi lokedienu mu dijina dia Jihova, kuma eme nga mi bhange mbote, enu uenu mu kala ni henda ia dibhata dia tatʼetu, mu ngi bhana kijimbuete kia kidi:

¹³ Nga mi bhingi kukondeka muenhu ua tatʼetu ni mamʼetu, ni ʼphange jami ja mala ni ja ahatu, ni ima ioso iala na-iu, mbé mienhu ietu ki i di bote ngó mu bômbo dia kalunga.

¹⁴ Mala anga a mu vutuila, exi: Mienhu ietu iene i futa o mienhu ienu, hé muafu, kikale-phe u di xibha na-kiu, kioso kia tu bheka ku ki tange ku muthu. Hinu-phe kuila Jihova ua tu bhana kiá ixi ii, eie tu ku bhanga kiambote ni kidi.

¹⁵ Bhenhobho muene u a tundisila bhu njanena, a tulukila ku mukolo, kuma inzu iê a i tungu ku thandu dia lumbu lua kondoloka mbanza iâ, muene kuene kua tungu.

¹⁶ Muene anga u a ambela, uixi: Di telienu ku mulundu, mbé ió aii ku mi kaiela ki mu takane-nâ; mu suama kuenhoko izuua itatu, katé ió aii ku mi sota, eza dingi ku bhata, kiene kiua ki muila njila ienu.

¹⁷ Mala anga a mu ambela, exi: Etu hinu ki tu kale ni kikuma ku mulôko ué u ua tu lokesa.

¹⁸ Aiuka, hinu se tueza mʼoxiʼmu, ngoji iii i kusuka u i kutila bhu njanena i tua tulukila; tatʼenu-phe ni mamʼenu, ni ʼphange jé, ni dibhata dioso, u a bheka mʼonzo ié muenhumu.

¹⁹ Hé bhu kala muthu u tunda mu nzunga, manhinga mê ma kala ku thandu dia mútue uê muene, ki ki kala kikuma kietu; uoso-phe uala mʼonzo, manhinga mê ma kala ku thandu dia mútue uetu, se bhu kala muthu u mu tula lukuaku.

²⁰ Eie-phe, hé u fueta maka metu oso a tu bheka, ku muthu uoso-uoso, tua jituka kiá ku mulôko ué u ua tu lokesa.

²¹ Kuala muhatu: Ki kale muene kala ki mua zuela. Anga u a sulula, a katuka. Ngoji ikusuka anga u i kutila bhu njanena.

²² Ene anga aia mu mulundu, a kala muenhomo izuua itatu, katé kia vutuka ió ele mu ku a sota; kuma a a soto muene mu njila ioso, maji ka a mono.

²³ Kala kiki, mala kiiadi iá a vutuka, a kulumuka mu mulundu, a zaúka, anga a bhiẋila kua Josuué dia Nune, a mu tangela ioso ia bhiti na-iu.

²⁴ Ambela Josuué, exi: O kutanga kidi, ixi ioso iii Jihova ua i bhana kiá bhu makuʼetu kuma akuaʼxi ene oso iá teketa kiá ni uoma mukonda dietu.