Josuué 19 - O Mikanda Ikola

Ubhinganu ua Ximinhá

¹ Kuatomboka hasa ia kadi phala Ximinhá, mbe o muiji ua anʼa Ximinhá, ku majiku-majiku mâ, ubhinganu uá ua kutuka muʼaxaxi ka ubhinganu ua anʼa Juda,

² Mu ubhinganu uâ atambula: Bele-seba, ni Seba, ni Molada,

³ kuexi Hazale-suale, ni Bala, ni Ezene,

⁴ ni Eletolade, ni Betule, ni Háloma,

⁵ ni Xikalake, ni Bete-makabote, ni Hazale-susa,

⁶ ni Bete-lebaote, ni Saluene, kuinhi dia sanzala ni jitatu ni tumadiembu tuâ.

⁷ Aime, ni Dimone, ni Etele, ni Asane; sanzala jiuana ni tumadiembu tuâ.

⁸ Ni tumadiembu tuoso tua kexe mu jimbandu ja jisanzala jenhiji, katé ku Balate-bele, a mu edi Lama, ku sulu; iú uene ubhinganu ua anʼa Ximinhá, ku majiku-majiku-mâ.

⁹ Ubhinganu ua anʼa Ximinhá u u sanga muʼaxaxi ka dikânda diangene dia anʼa Juda; mbata o ubhinganu ua anʼa Juda uavulu; kiene kia bhela-mu anʼa Ximinhá ubhinganu uâ, kumoxi ni ene.

Ubhinganu ua Nzebulone ni Isakale

¹⁰ Kutomboka-phe o hasa ia katatu, itundila anʼa Nzebulone, ku majiku-majiku-mâ; ubhinganu uâ-phe uaii katé ku Salide.

¹¹ Anga ubanda mu kuila ku mbandu ia luiji u bhita mu Malala, anga ubhiẋila ku Dabesete, u bhixila ue ku kahonga ka lulamena ku Jokeneame.

¹² Kutunda bhu Saíle ualukila ku mbandu ia thunda, ku tundila dikumbi, katé mu mbambe ia Kixilote-tabola, i tubhukila ku Dabelate iia ni kubandesa katé ku Jafiia.

¹³ O koko i sombokela ku mbandu ia thunda, kutundila o dikumbi hé iia ku Ngatefele, ni mu Etekasine, i tundidila ku Kimone-Metuala a mu edi Neia.

¹⁴ Mbambe iii ialukila ku mbandu ia kusuku katé ku Hanatone ibhitila mu dikôlo dia Ifitaiele,

¹⁵ ni Katate, ni Bahalale, ni Ximilone, ni Idala, ni Beleme; kuinhi dia sanzala ni jiiadi ni tumadiembu tuâ.

¹⁶ Iú uene ubhinganu ua anʼa Nzebulone, ku majiku mâ, o jisanzala jenhiji ni tumadiembu tuâ.

Ubhinganu ua Isakale

¹⁷ Hasa ia kauana iatundila Isakale; ku anʼa Isakale, ku majiku-majiku.

¹⁸ Mbambe iâ-ene bhobho Jizalaiele, Kesulote, ni Suneme,

¹⁹ ni Hafalaime, ni Siione, ni Anakalate,

²⁰ ni Labite, ni Kixione, ni Ebe,

²¹ ni Lemete, ni Ene-ngaíme, ni Enehada, ni Bete-pazeji.

²² Anga mbambe ienhiʼii bhiẋila ku Tabola, ku Sakaxima ni ku Bete-seme; matundilu mê katé ku Njolodá; kuinhi dia sanzala ni jisamanu ni tumadiembu tuâ.

²³ Iú uene ubhinganu ua muiji ua anʼa Isakale, ku majiku-majiku, ni jisanzala jenhiji ni tumadiembu tuâ.

Ubhinganu ua Asele

²⁴ Sorte ia katanu i tundila muiji ua anʼa Asele, kala kia tokala ku majiku-majiku-mâ.

²⁵ Mbambe iâ-ene Helekate, ni Hali ni Betone, ni Akezafa.

²⁶ Ni Alameleke, ni Amadi, ni Misale; anga i bhixila ku Kalumelu ku luiji, ni ku Sihole-libenate;

²⁷ anga i alukila ku mbandu ku tundila dikumbi iia mu Bete-dangone, i bhixila mu Nzebulone, ni mu dikôlo dia Ifitailele, ku mbandu ia ku suku ia Bete-meke ni ia Neiele, anga i tubhukila ku kiasu kia Kabule,

²⁸ ibhita mu Ebolone ni Lehobe, ni Hamone, ni Kana, katé mu Sidone ionène.

²⁹ Mbambe ienhiʼii-phe i alukila mu Lama, katé ku mbonge ia kolo ia Tilu; hé i bilukila mu Hosa, anga iia mu kutundila ku musanza ua kalunga kua zukamena o mikáu ia ixi ia Akezibe;

³⁰ ni Uma, ni Afeke, ni Lehobe, a a bhitisa ue kuenhoko; kienhiki a tenesa makuinhi aiadi ni iadi a jisanzala ni tumadiembu tuâ.

³¹ Uenhú uene o ubhinganu ua muiji ua anʼa Asele, ku majiku-majiku-mâ, o jimbanza jenhiji ni tumadiembu tuâ.

Ubhinganu ua Nafitali

³² Sorte ia kasamanu i tundila-phe anʼa Nafitali; ku anʼa Nafitali, ku majiku-majiku-mâ.

³³ Mbambe iâ-ene tunde ku Helefe, kuandekela bhu mukaluvalu ku Alone mu Zananíme, ni Adami-Nekebe, ni Jabineiele, katé ku Lakumi, anga i kutuka mu Njolodá.

³⁴ Mbambe ienhiʼii-phe ialukila ku luiji, iia mu Azenote-tabole, hé isomboluela mu Hukoke; o ku mbandu ia sulu, ituta Nzebulone, o ku luiji ituta ku Asele, ni Juda ku mbandu ia mutundila-kumbi, ku mbambe ni Njolodá.

³⁵ Jimbonge jê jakolo kiambote: Sidime, Zele, Hamate, Labate, Kinelete,

³⁶ Adama, Lama, Hazole,

³⁷ Kadexe, Dilei, Ene-hazole,

³⁸ Hone, Midale, Holeme, Bete-nate, ni Bete-seme; kuinhi dia jimbanza nʼivua ni tumadiembu tuâ.

³⁹ Uenhú uene o ubhinganu ua muiji ua anʼa Nafitali, ku majiku-majiku-mâ, o jimbanza jienhiji ni tumadiembu tuâ.

Ubhinganu ua Dane

⁴⁰ Hasa ia kasambuadi-phe itundila anʼa Dane, ku majiku-majiku-mâ.

⁴¹ O mbambe ia ubhinganu uâ, Zola, Xitaole, ni Idi-semexi,

⁴² Sahalebine, Ajalone, Itila,

⁴³ Elone, Timinate, Ekolone,

⁴⁴ Eleteke, Ngibitone, Balate,

⁴⁵ Jehudi, Bene-belake, ni Ngate-Dimone,

⁴⁶ Ni Mejakome, Lakome, a a tela-ku dingi oxi ia lungu ni Jope;

⁴⁷ anʼa Dane hanji a bhânga ni Leseme, a mu bhitisa ku mazu a xibhata, a mu tambula mbonge ia Leseme, anga a tunga muenhomo; Leseme muenhú anga a mu luka Dane, kifua aluku tatʼâ-ene.

⁴⁸ Uenhú uene o ubhinganu ua muiji ua anʼa Dane, ku majiku-majiku-mâ, o jimbanza jenhiji ni tumadiembu tuâ.

O undundu ua Josuué

⁴⁹ Mu kuzubha-phe kuuana o ixi mu ubhinganu, ku jimbambe-jimbambe, anʼa Izalaiele, mudiâ, a bhana ue kibatu kia ubhinganu kua Josuué, monʼa Nune, muʼaxaxi kâ.

⁵⁰ Kala kia tangele Jihova, a mu bhana sanzala ia bhingile muene, a mu bhana Timinate-sela, ku mulundu ua Efalaime; anga Josuué sanzala u i soma dingi kiambote, u tunga muenhomo.

⁵¹ Iá ene o ma-ubhinganu, nganga Eleazale, ni Josuué, monʼa Nune, ni makota ku jitata mu majiku mâ, a uane ku jisorte phale ubhinganu ua miji ia anʼa Izalaiele, bhu Silu bhu pholo ia Jihova, bhu muelu ua balaka ia kutakanena. Kienhiki oxi iabhu kiua o ku i uana.