Josuué 18 - O Mikanda Ikola

Balaka a i phapha mu Silu

¹ Kionge kioso-phe kia anʼa Izalaiele anga ki bhongoloka bhu Silu. O balaka ia kutakanena anga a i oleka bhenhobho, kioso kia a tolokela kiá oxi.

² O muʼaxaxi-phe kʼanʼa Izalaiele hanji mua subhuka sambuadi dia miiji kiluua, a tambula ubhinganu uâ.

³ Josuué iu uambela anʼa Izalaiele, uixi: Mu landuka katé bhebhi, ni ku kamba kuia mu kúvua oxi ia mi bhana kuala Jihova Nzambi ia jitata jenu?

⁴ Ku muiji ni muiji a sole-ku mala atatu, nda ngʼa tume, aie mu londa oxi, a i tongolole kiambote kala kia tokala o ku i uana mu ma-ubhinganu mâ, nda alukile kokuami.

⁵ A i uane mu lusambuadi: Juda a mu xa ku Sulu mu mbambe iê, o dibhata dia Zuze ni mbambe iê dikale ku mbandu ia ku suku.

⁶ Enu-phe mu xinda oxi mu sambuadi dia mbandu, o kixindu ki mua xindi mu ngi bhekela na-kiu bhabha; eme nda ngi te hasa jê, ja ku mi uanena na-iu bhu pholo ia Jihova Nzambi ietu.

⁷ Jilevita-phe (anʼa Levi) ka-nda kutambula kibatu muʼaxaxi kenu, kikale undundu uâ ene o kubhanga kikalakalu kia unganga uangene ua Jihova. O Ngadi, ni Lubene ni kaxaxi ka muiji ua Manasa, a tambula kiá ubhinganu uâ ku sámbua dia Njolodá, ku thunda, ua a bhele Mozé, o mukalakadi ua Jihova.

⁸ Kienhiki o mala enhó abalumuka anga akatuka; Josuué-phe ua tumine oso aia kulonda oxi, uixi: Sulukenu, mu londe oxi, mu i xinde kiambote kioso ki iala, mualuke kokuami, eme nda ngi mi tele-iu jihasa (jisorte) bhu pholo ia Jihova, mu Silu.

⁹ Athu ió endele, anhunga oxi, a i bhanga konda kioso ki iala, anga ku jisanzala jê, a i ta mu sambuadi dia mbandu mu divulu; iá avutuka eza kua Josuué, bhu kibangu, mu Silu.

¹⁰ Josuué anga ua tela-iu jihasa mu Silu, bhu pholo ia Jihova; bhenhobho bhene bhua uanena oxi phala anʼa Izalaiele, mu ibatu iê.

Ubhinganu ua Bejamí

¹¹ Kua tomboka-phe o hasa ia muiji ua anʼa Bejamí, ku majiku mâ; bhuʼaxaxi ka anʼa Juda ni anʼa Zuze bhene bhua bhela dikaẋi dia mu tokala muene,

¹² Mbambe iê anga i bhela ku mbandu ia kusuku tundé ku Njolodá; mbambe iii hé i di kunga ni Jedikó ni ku kusuku, i bandela ku mulundu i lunga ku luiji mu kikangalakata kia Bete-avene.

¹³ Mu kutunda bhobho mbambe iii ibhita mu Luze, maji i di kunga ni Luze (a muedi Betele) ku sulu; mbambe iii anga ikulumuka mu Atalote-adale, bhu mbanduʼa mulundu uene ku mbandu ia sulu ia Mbetolone ia honga.

¹⁴ Anga iia kienhiki ni ialukila ku mbandu ia luiji, iza ku sulu ia mulundu ualulama ni Mbetolone, ku sulu, i tombolokela mu Kidiate-bale (muene Kidiate-Jadimi), sanzala ia anʼa Juda; mumu muene mu i suka ku mbandu iê ia luiji.

¹⁵ O mu i bhita-phe ku mbandu iê ia sulu, mbambe o thungi ia Kidiate-Jadimi; anga mbambe iii i di tela ku luiji i kutukila ku fixi ia menha ma Nefetoua.

¹⁶ Mbambe ii iza ni ku kulumuka tulé bhu thungi ia mulundu uene kuxitila dikôlo dia Hinome, mu dikôlo dia anʼa mazonda, ii ku suku, i tulukila mu dikôlo dia Hinome kualela o Majebuzi, anga ilunga ku sulu; hé i tulukila kiá bhu fixi ia Lojele;

¹⁷ mu kutunda bhobho ilungulukila kiá ku kusuku hé i di tela bhu Ene-semexe; o ki itunda bhobho, iia mu Jedilote, ia lulamena bhu kalundu ka Adumimi, anga ikulumuka bhu ditadi dia Bouane, monʼa Lubene;

¹⁸ anga isombokela katé ia lungu mu kuia ku Halaba ku kusuku, anga ikulumuka mu Halaba;

¹⁹ mbambe ienhiʼii i somboka dingi katé ku maxilu ma Bete-Hokala ku kusuku, o matubhukilu mê ku mulebhetète ua kizanga kia môngua ku kusuku; kua suku Njolodá mu kuia ku sulu; iii iene o mbambe ia sulu.

²⁰ O ku mbandu ia thunda Njolodá muene o mbambe; iú uene o ubhinganu ua anʼa Bejamí mu mbambe jê mbandu ni mbandu, ku majiku-majiku.

O jisanzala ja muiji ua Bejamí

²¹ O jisanzala ja muiji ua anʼa Bejamí, kioso kiende ku majiku mâ, jenhihi: Jedikó, ni Bete-Hokala, ni Emekesiji,

²² ni Bete-Halaba, ni Zemalaíme, ni Betele,

²³ ni Havime, ni Pala, ni Hofila,

²⁴ Kefala-hamonai, ni Ofini, ni Ngaba; kuinhi dia sanzala ni jiiadi, ni tumadiembu tuâ.

²⁵ Ngibiione, ni Lama, ni Belote,

²⁶ Mixipa ni Kefila, ni Moza,

²⁷ ni Lekeme, ni Idipele, ni Talala,

²⁸ ni Zela, ni Elefe, ni Jebusi (muene Jeluzaleme), ni Ngibeia, ni Kidiate; kuinhi dia sanzala ni jiuana ni tumadiembu tuâ; iú uene o ubhinganu ua anʼa Bejamí, ku majiku-majiku.