Josuué 17 - O Mikanda Ikola

O undundu ua kaxaxi ka muiji ua Manasa

¹ Mu kuta jihasa kiki, kua tubhuka kiua ia muiji ua Manasa, mbata muene o phande-kumbi ia Zuze. Makidi, phande-kumbi ia Manasa, muene tatʼa Ngiliiade, kuma uakexe dizonda dia ita, iu ua tambula Ngiliiade ni Basane.

² O ana a mukuá a Manasa a a tela ue hasa iâ, ku majiku-majiku, kala kiki; ku anʼa Abiiezele, ni anʼa Heleke, ni anʼa Axidiiele ni anʼa Xikeme, ni anʼa Hefele, ni anʼa Semida; iá ene anʼa mala a Manasa, monʼa Zuze, ku majiku-majiku.

³ Zelofadi-phe, monʼa Hefele, monʼa Ngiliiade, monʼa Makidi, dia Manasa, ka kexi ni ana a mala, maji anʼa ahatu ngó; majina ma anʼê a ahatu enhá: Makala, Noua, Hokala, Midika ni Tikiza.

⁴ Enhá ejiie bhu pholo ia nganga Eleazale, ni bhu pholo ia Josuué monʼa Nune, ni bhu pholo ia ilamba, exi: Jihova ua tendelela Mozé o ku tu bhana uetu ubhinganu muʼaxaxi ka jiphange jetu ja mala; kienhiki, kuma kiene kizuelu kia Jihova kia ki ambe, ua a bhana ue ubhinganu muʼaxaxi ka jiphange ja tatʼâ.

⁵ Mueza-phe kuinhi dia makanda phala Manasa ngó, katu-ku dia Ngiliiade ni Basane ala mu sámbua dia Njolodá;

⁶ mbata anʼa ahatu a Manasa, a tambula uâ ubhinganu muʼaxaxi ka anʼê a mala; oxi ia Ngiliiade-phe iabhiti ku anʼa amukuâ a Manasa.

⁷ O mbambe-phe ia Manasa tundé kiá kua Asele katé ku Mikameta, ia lulama ni Xikeme ualela ku mbandu ia thunda; anga mbambe ienhiʼii itembukila ku kadilu katé ku jithungi-a-diembu mu Ene-tapuua.

⁸ Oxi ia Tapuua iabhiti kua Manasa, maji o mbandu iamukuâ ia Tapuua, mu mbambe ni Manasa, iabhiti kua anʼa Ifalaime,

⁹ o mbambe-phe anga ikulumuka ku muxinji ua menha ma honga ia Kana, iia ku sulu ia muxinji uenhó; anga ki bhinga-phe kuila o jisanzala ja Ifalaíme ja di soma muʼaxaxi ka jisanzala ja Manasa; kienhókio o mbambe ia Manasa, kua tundu o muxinji, ilungila ku sulu anga i kutuka mu musanza ua Kalunga.

¹⁰ Ifalaime iú ku sulu, o Manasa-phe iú ku kusuku, mbambe iê o musanza ua Kalunga; ia edile o ku kusuku a tuta muene kua Asele, o ku thunda atuta kua Isakale.

¹¹ Kuma mu Isakale ni mu Asele, Manasa ua tambula-mu Bete-Sane ni jimbambe ja utuminu uê, ni Ibeleiamu ni jimbambe ja utuminu uê, ni iá a tunga mu Ndole, ni jimbambe ja utuminu uê, ni iá atunga mu Ene-Ndole ni jimbambe ja utuminu uê, ni iá atunga mu Tanake ni jimbambe ja utuminu uê, ni iá atunga mu Mejido ni jimbambe ja utuminu uê; Kifua ibhuna itatu ia kufundila.

¹² Anʼa Manasa-phe ka tenene ku kaia mundu ua tungu mu jisanzala jenhojo; mbata o Makanana ajijidile kutunga mʼoxiʼomo.

¹³ Mu kuila-phe anʼa Izalaiele eza mu kuvula nguzu, ajijidika Makanana kubhita ku lubhaku lua kua bhakuila luánda, maji ene oso o ku a kaia, kana.

¹⁴ Bhenhobho anʼa Zuze ambela Josuué, exi: Kia bhiti kiebhi-phe o ku ngi bhana ngó mu ubhinganu hasa imoxi ni dikânda dimoxi, eme ngi muthu nga di bhange kifuẋi kionène kiki; oko o Jihova ue uala ku ngi zediuisa muene?

¹⁵ Josuué ua mu ambela uixi: Se ua di mono u kifuẋi kionène, banda ku muxitu, batula ku ixi ia Mapelezi ni ku Malefaíme phala eie, kuma-phe o milundu ia Ifalaime ia ku tolela.

¹⁶ Anʼa Zuze, anga a zuela, exi: O milundu ia tu tolo muene, maji o Makanana a tunga muʼkôlo ala ni makalu ma jifelu, akua Bete-Sane enhó ni jimbambe ja utuminu uê, ene ue aia-nâ; ni iá ue atunga muʼkôlo dia Jizeleiele.

¹⁷ Bhenhobho Josuué-phe uambela dibhata dia Zuze, Ifalaime ni Manasa, uixi: U kifuẋi kionène muene, uala ue ni nguzu iavulu; hasa imoxi ki ia mi soko;

¹⁸ o milundu tambula-iu muene; o muxitu, u u solala, kioso ki tunda-mu, ki kale kiê; Makanana ua kà a kaia muene, sumbala akua makalu a jifelu, anʼa mazonda muene.