Josuué 15 - O Mikanda Ikola

Ma-ubhinganu a tokala dívua dia miiji ni kaxaxi. O ubhinganu ua Judá

¹ Muondona-phe uabuila kibuka kia anʼa Judá, ku majiku-majiku, ia bhela katé mu mbambe ia Edomo, kikangalakata kia Zini kia xala ku sulu, katé kua sukila o mbandu ia sulu.

² O ku sulu-phe, mbambe iâ ia tula ku kahonga kaii mu Kizanga kia Môngua, ku hota ia kizanga ialungu ku sulu;

³ ii iaii ni kubandesa katé ku Akalabini, ni mu Zini, i tunda ku sulu i banda mu Kadexe-Banéia, i bhitila mu Hezelone, ibanda mu Adale, anga i kondoloka Kalaka,

⁴ i bhitila mu Azemone, ʼijila ku kahonga ka Ijito, anga iia katé mu Kizanga kia Kalunga. Iii ia kà kala iene o mbambe ienu ku mbandu ia sulu.

⁵ O mbambe ienu-phe ku mbandu ia thunda, o Kizanga kia Môngua, katé bhu masangano bhua kutukila Njolodá. O mbambe ku mbandu ia kusuku, i matekena mu Kizanga Kia Kalunga bhu masangu a Njolodá.

⁶ Anga mbambe iii i bandela kuia ku Bete-hokala anga i bhita ku mbandu ia kusuku, ia Bete-Halaba, anga mbambe iii ienda muene ni kubanda katé bhu ditadi dia Bhoane, monʼa Lubene.

⁷ I bande dingi muene katé ku Ndebile, mu kuandekela mu dikôlo dia Akole, ku mbandu ia Kusuku, mu kulunga ku Jidingale, bhu kálundu ka Adumimi, kene ku sulu ia kahonga, katé ku matabhu ma Ene-semexi, anga i tundila-phe ku kisambu kia Ene-Lojele.

⁸ Mbambe iii, iie muene ni kubanda mu dikôlo dia monʼa Hinome, katé ki i bhixila kua kexila o Majebuzi a ku sulu; Iú Muene kiá Jeluzaleme. Anga i bandela bhu sungu ia mulundu uala mu kusomboka o dikôlo dia Hinome ku mbandu ia luiji bhua suku o dikôlo dia Malefaimi ku kisambu kia thunda.

⁹ Anga o mbambe iii, ki i takuka bhulu dia mulundu, iia ditônono katé bhu kixima kia menha ma Nefetoua; anga itundidila katé ku jisanzala jala mu mulundu ua Efelone, i sombokela hé iia mu Baala; Baala-phe muene Kidiate-Jadimi.

¹⁰ O kienhokio-phe i alukile mu luiji, Baala-phe uaxala, iene iia katé ku milundu ia Seíle, o mulundu ua Jeadimi a u bhitila mu betekete iê ku kisambu kia kexila ku thunda; iú-phe muene Keselone. Anga i kulumuka kiá ku Bete-seme, i bhitila mu Timina,

¹¹ hé i di kunga dingi ni betekete ia mulundu ua Ekolone ku mbandu ia thunda iê, anga mbambe iii iia muene katé ku Xikelone, i matuke o mulundu ua Baala, i kutukile mu Jabiniiele, phale o masukilu ma mbambe iii ma kutukile mu musanza ua Kalunga.

¹² Maji-phe o muxinda ua mbambe, ku mbandu ia luiji, mbambe iê o Kizanga kia Kalunga ka dikota, bhene bhua suku o mbambe iê; ʻienhiʼii iene o mbambe ia tokala anʼa Judá, mu jimbandu, ku majiku-majiku.

Kalebe u tambula Hebolone

¹³ O Kalebe-phe, monʼa Jefune, ua mu bhana undundu uê, muʼaxaxi ka anʼa Judá, kala kioso kia ki tanga Jihova kua Josuué, kiene muene kia bhange; ua mu bhesa sanzala ia Halaba, tata ia anʼa Anake; iene-phe sanzala i exana exi, Hebolone.

¹⁴ Kalebe-phe anga u kaia-mu ana kitatu a Anake, enhó: Sesai, ni Ahimane, ni Talamai, a a vuala kuala Anake.

¹⁵ Mu kutunda bhobho u banda ku akua-bhata mu Ndebile. Ndebile-phe mʼokulu a mu lukile Kidiate-sefele.

¹⁶ Kuala Kalebe: Uoso u tolola Kidiate-sefele, na mu tambula, nganda ku mu bhana monʼami ua muhatu, Akeza, a kale muhatuʼê.

¹⁷ Otiniiele, monʼa Kenaze, phangʼia Kalebe, muene-phe ua tolola. Kalebe iú ua mu bhana Akeza dia monʼê ua muhatu, ku mu sakana.

¹⁸ O kieza-nê mʼonzo, Otiniiele u mu longesa, uixi: Bhinga mukáu ua mavu kua tatʼenu. Muene anga u tuluka ku bulu iê. Kuala Kelebe: Kiebhi?

¹⁹ Muene-phe uixi: Ngi bhe dibhandulukilu, kuma oxi i ua ngi bhana ia thothuena, ngi bhe-ku ue ndunga ja menha. Muene bhenhobho ua mu bhana jindunga ja majiia, ni jindunga ja tufukufuku.

O jisanzala ni jimbonge ja Juda

²⁰ O iú uene o ubhinganu ua muiji ua anʼa Juda, ku majiku mâ.

²¹ O madiembu a muiji ua anʼa Juda a di ambatesa kienhiki katé mu mbambe ia Idomo ku sulu: ene a Kabizeiele, Edele, Jangule,

²² Kina, Dimona, ni Adada,

²³ ni Kadexe, ni Hazole, ni Itenana,

²⁴ ni Zife, ni Teleme, ni Baialote,

²⁵ ni Hazole-Hadiata, ni Kidiote-Hezelone (muene Hazole),

²⁶ ni Amane, ni Sema, ni Molada,

²⁷ ni Hazalekada, ni Hazemone, ni Bete-palete,

²⁸ ni Hazale-suale, ni Beleseba, ni Baziotiia,

²⁹ ni Baala, ni Jimi ni Ezeme,

³⁰ ni Eletolade, ni Kesile, ni Hóloma,

³¹ ni Xikalake, ni Madimaná, ni Sanzana,

³² ni Lebaiote, ni Silimi, ni Aime, ni Dimone, ni jisanzala kiá ni tumadiembu konda ia makuinhi aiadi niʼvua.

³³ O mu manhana sanzala jiji: Xitaole, Zola, Axina,

³⁴ Zanoua, Hene-Nganimi, Tapuua, Ename,

³⁵ Jalemute, Adulame, Soko, Azeka,

³⁶ Sahalaime, Aditaimi, Ngedela, Ngedelataime, jala kuinhi dia sanzala ni kiuana ni tumadiembu tuâ.

³⁷ Zanane, Hadasa, Mingidalengadi,

³⁸ Dilane, Míxipa, Joketele,

³⁹ Lakiji, Bozekate, Engolone,

⁴⁰ Kabone, Lamase, Kitiliji,

⁴¹ Ngedelote, Bete-dangone, Nahama, kuaii Makeda; Jala kuinhi dia sanzala ni jisamanu ni tumadiembu tuâ.

⁴² Libina, Etele, Asane,

⁴³ Ifitale, Axina, Nezile,

⁴⁴ Keila, Akexibe, Malesa; dívua dia sanzala ni tumadiembu tuâ.

⁴⁵ Ekolone, ni sanzala jê ni tumadiembu muene kutumina.

⁴⁶ Tunde mu Ekolone, tulé ku musanza ua kalunga mabhata oso ala ku mbandu ia Ajindode, ni tumadiembu tuâ.

⁴⁷ Ni Ajindode, ni sanzala jê ni tumadiembu muene kutumina; ni Naza, ni sanzala jê ni tumadiembu muene kutumina, tunde ku honga ia Ijitu, katé ni ku Kalunga kadikota (o musanza uonéne) iene o mbambe iê kiá.

⁴⁸ O ku milundu-phe, Xamidi, Jatile, Soko,

⁴⁹ Dana, Kidiate-sana, (muene Ndebile),

⁵⁰ ni Anabe, Xitemó, Anime,

⁵¹ Ngozene, Holone, Ngilo; kuinhi dia sanzala ni imoxi ni tumadiembu tuâ.

⁵² Alabe, Duma, Esane,

⁵³ Janime, Bete-tapuua, Afeka,

⁵⁴ Hunda, Kidiate-hálaba (a mu edi Hebolone), Sihole; dívua dia sanzala ni tumadiembu tuâ.

⁵⁵ Maone, Kalumelu, Zife, Juta,

⁵⁶ Jezeleiele, Jokediame, Zanoua,

⁵⁷ Kaini, Ngibeia, Timina; kuinhi dia sanzala ni tumadiembu tuâ.

⁵⁸ Halule, Bete-sule, Ngedole,

⁵⁹ Mabhata, Bete-anote, Eletekone; sanzala jisamanu ni tumadiembu tuâ.

⁶⁰ Kidiate-baale (a mu edi Kidiate-jadimi), ni Laba; sanzala jiiadi ni tumadiembu tuâ.

⁶¹ Mu kikangalakata-phe: Bete-Halaba, Midine, Sekaka,

⁶² Nibisane, ni sanzala ia kangu-dia-môngua, ni Engedi; sanzala jisamanu ni tumadiembu tuâ.

⁶³ Maji anʼa Juda ka tenene kumuanga Majebuzi a tungile mu Jeluzaleme; Majebuzi katé muene kizuua kia lelu axalela momo kumoxi ni anʼa Juda, mu Jeluzaleme.