Josuué 14 - O Mikanda Ikola

Josuué u lunduisa Kalebe oxi ia Hebolone mu undundu uê. Kanana a mu tela jisorte

¹ Kiki-phe, kiene kia tambula anʼa Izalaielʼiki mu ubhinganu uâ, mʼoxi ia Kanana; nganga Eleazale ni Josuué monʼa Nune, ni makota oso ku jitata ja miiji ia anʼa Izalaiele, kiene kia a uanena, ku jisorte.

² Mu ibatu ia ubhinganu uâ, kala kia tumine Jihova, kiala-ku hanji Mozé, phala o dívua dia muiji ni kaxaxi kâ.

³ Kuma kua tundu kiá miiji iiadi ni kaxaxi, a a bhele kiá undundu uâ kuala Mozé mu sámbua dia Njolodá; maji-phe jilevita ka a bhana undundu ua kima muʼaxaxi kâ.

⁴ Anʼa Zuze, ene-ku a di bhange miiji iiadi, Manasa ni Ifalaimi. O jilevita ka ji bhele undundu, a a bhele ngó jisanzala, phala a tunge a some, ni mikáu iâ ku maxilu a mabhata mbé o ibhaku iâ ni uvuilu ua ilunga iâ.

⁵ Kala kia tumine Jihova kua Mozé, kiene kia bhange anʼa Izalaiele, ia a uane oxi.

Ixi ia Hebolone a i bhana Kalebe

⁶ Thembu ienhoio, anʼa Juda a bhongoloka kua Josuué bhu Jidingale, o Kalebe monʼa Jefune, mukua Kena, anga u mu ambela, uixi: Eie uejiia kiambote o kizuelu kia Jihova, kua Mozé muthu uangene ua Nzambi, kia tu tange ni eie ni eme bhu Kadexe-Banéia,

⁷ Thembu ioio eme ngala mu makuinhi a uana a muvu, kia ngi katula Mozé, selevende ia Nzambi bhu Kadexe-Banéia anga u ngi tuma kulonda ixi, anga ngiza ngi mu tudila o kidi kioso kia ngi kala ku muẋima.

⁸ Maji-phe, akuetu u ngele-nâ kumoxi, a bhangesa muẋima ua mundu kubotomoka; eme-phe nga jiji ni kukaiela Jihova Nzambi iami ni muẋima uami uoso.

⁹ Mozé-phe ua ngi lokela kizuua kienhókio, uixi: Kidi kiene, mavu ió a diota kànda dié dia kinama, hinu à kala undundu ué ni ua anʼé katé ku mululu ni ku mulaula ʼté ku hádia ni hádia, mukonda eie ua jiji mu kaiela Jihova Nzambi iami ni muẋima ué uoso.

¹⁰ O kiki-phe ua mono, Jihova ua ngi bhake hanji ku muenhu, kala kia ki tanga muene, makuinhi auana a mivu ni itanu ioso iii, tunde Jihova kia zuela o maka iá kua Mozé, mu thembu ioso iala hanji anʼa Izalaiele mu kuenda mu kikangalakata; leluʼidi-phe hanji eme-ami-ú, ngala kiá mu makuinhi nake a mivu nʼitanu.

¹¹ Nguzu iami-phe hanji ii-ié muene kala mu kizuua kienhókio kia ngi katula Mozé; kioso kia kexile nguzu iami mu kizuuʼokio, ni kiki kiene hanji ki iala, ni ia kúlua ita ni ia kutunda ni kubokona.

¹² Kiki-phe, ngi bhane o mulundu iú, uene ua tange Ngana kizuua kienhókio; eie uèvua kizuua kienhókio kia ki tànga, exi: Kuala iiala ia nguzu, anʼa Anake, o jimbonge jâ ja makota, ja bhiti imbaka; imoxi, kuma Jihova ngala-nê bhu mbandu iami, ngi tena ku a kaia, kala kia tànga Jihova.

¹³ Josuué anga u mu ta kizediuise anga u bhana ixi ia Hebolone kua Kalebe monʼa Jefune, mu kala undundu uê.

¹⁴ Ixi ia Hebolone anga i kala undundu uangene ua Kalebe monʼa Jefune, mukua Kena, katé mu kizuua kia lelu, mukonda muene ua jijile mu ku kaiela Jihova Nzambi ia Izalaiele ni muẋima uê uoso.

¹⁵ Hebolone muenhú mʼokulu akexe ku mu ila Kidiate-Halaba, kuma Halaba iú uakexe kota dia muthu, muene ua sombokele akuâ oso muʼaxaxi ka akua Anake. Oxi tunde kienhókio anga i kala ni kunhoha, a zumbuka kúlua ita.