Josuué 13 - O Mikanda Ikola

O jixi Josuué kiluua a ji tolola

¹ Anga Josuué u kuka, ua sunga-ku kiá ku izuua iê; Jihova anga u mu ambela uixi; Eie uakukʼó, ku izuua ua sunga-ku kiá; oxi-phe, iabhingi o ku i tambula, hanhi muene ia nzungule.

² Ngi ku londekeza oxi ioso ia sukamena hanji, ienhiʼii; Tala, kua subhuka hanji o jimbambe joso ja akua-Fidixia, ni Jesule ioso-lolo.

³ Tunde ku Xihole ia lulamena ku thunda ia Ijitu, katé ku mbambe ia Ekolone, ku mbandu ia kusuku, iambe exi ia tokala Makanana; ni jingana jitanu josuʼojo, ja akua-Fidíxia; o mukua Ngaza, ni mukua Ajindode, ni mukua Axikelone, ni mukua Ngate, ni mukua Ekolone;

⁴ ni Mahivi oso tunde ku sulu, oxi ioso ia Makanana, ni Meiala, ia tokala akua Sidonha, katé ku Afeke, ni ku jimbambe ja Mamodi;

⁵ ni oxi ioso ue ia Mangibele, ni Libanu iosololo ku mutundila-kumbi, tundé ku Baale-ngadi, bhu kikota kia mulundu ua Helemone, katé bhu bokuenu dia Hamate;

⁶ ene-oso a tungu mu mulundu tundé Libanu bhu Mijilefote-maine, ni akua Sidonha osololo muene. Eme nga-nda ku a kaiesa muene mbé Izalaiele a mu bhue ku mesu. Hé kima, eie oxi iii uanena-iu anʼa Izalaiele mu jisorte i bhite muene ku ubhinganu uâ, kala ki nga ku ambelele kiá.

⁷ Eie kindalʼiki oxi enda kiá ni ku i uana mu ubhinganu ua dívua dia miiji iii, ni kaxaxi ka muiji ua Manasa.

O kuuana kiá o ixi. O jixi ja lunduisa Mozé

⁸ O kaxaxi kenhaka akuâ a tambuila kiá bhuamoxi ubhinganu uâ ni akua muiji ua Lubene ni akua Ngadi; Mozé muene ua a bhana-u ku sámbua diodio dia Njolodá, ku thunda; kala kia a xindilile Mozé, ngunza ia Jihova.

⁹ Tunde ku Alouele uala ku kibumu kia kahonga kaná ka Anone, ni diembu diene mu kaẋi ka dikôlo diná, ngànga ioso ia Mendeba katé ku Dibone tulé.

¹⁰ Ni madiembu oso a Sihone, sobha ia Mamodi, ua hingile mu Hezebone, katé ku mbambe ni anʼa Amone;

¹¹ ni Ngiliiade, ni mbambe ioso ia akua Jesule, ni akua Makata, ni mulundu uoso ua Helemone, ni Basane ioso katé Sálaka;

¹² Ni utuminu uoso ua Joke mu Basane, ua hingile usobha mu Jitalote ni mu Dilei; muene kiá ngó ua subhukile ku mazonda a xahulu (o Jinefalimi), ió a mu jibhile kuala Mozé iú ua mu muange-mu.

¹³ Maji-phe anʼa Izalaiele ka kaiesele akua Jesule, né akua Makata, kienhiki Jesule ni Makata axalela muʼaxaxi ka Izalaiele, ʼté ni mu kizuua kia lelu.

¹⁴ O mu kuuana ubhinganu, Mozé o muiji ua Levi ka u bhana kima; mukonda o jisata ja kuoha, ja bhana kua Jihova Nzambi ia Izalaiele, diene o dikanda diâ dia ubhinganu, kala kia a ambelele kiá.

¹⁵ Mozé-phe kia bhana ku muiji ua anʼa Lubene, ku majiku majiku kienhiki:

¹⁶ Mbambe iâ tundé ku Alouele, iene ku kibumu kia kahonga ka Anone, ni sanzala iene mu kaẋi ka dikôlo, ni ngànga ioso katé ku Medeba;

¹⁷ ni Hezebone ni jisanzala jê josololo, jene mu ngànga: ni Dibone ni Bamote-Baale, ni Bete-Baale-meone;

¹⁸ ni Jaza, ni Kedimote, ni Mefate;

¹⁹ ni Kidiataimi, ni Sibima, ni Zefate-Sahale, mu mulundu ua dikota;

²⁰ ni Mbete-peiole, ni Ajindode-pisga, ni Bete-jeximote;

²¹ ni jisanzala joso jala mu nganga, ni oxi ioso ia utuminu ua Sihone, sobha ia Mamodi, ua tumina jinga mu Hezebone, a mu toluele kuala Mozé, kumoxi ni jinganga ja Midiiana, ni Evi, ni Lekeme, ni Sule ni Hule ni Lebha o jinganga ja futa jinga lubhaku kua Sihone, kuma ene atungi aʼxi iê.

²² Anʼa Izalaiele ue a jibhile Balamu, monʼa Beola, kimbanda kia kuzambula, ni amukuá dingi oso a a jibhile kuala ene.

²³ Kienhókio o mbambe-phe ia anʼa Lubene, ia bhiẋidile katé ku Njolodá ni tungiji tuê tuoso, iene o mbambe iê; iii iene o mbambe ia ʼxi ia anʼa Lubene, ku majiku-majiku, o jisanzala joso jenhojo ni tumadiembu tuâ.

²⁴ Muiji ua Ngadi-phe, ku majiku majiku, Mozé ua a bhana,

²⁵ mbambe kiá Jazele ni jisanzala joso ja Ngiliiade, ni kaxaxi ka ixi ia anʼa Amone, katé ku Alouele, bhua lulamena labá;

²⁶ tunde ue ku Hezebone katé ku Lamate-mispa, kumoxi ni Betonime; tunde Mahanaime katé bhua suku o mbambe ia Ndebile;

²⁷ o mu dikôlo ue, Bete-alama ni Bete-nimila, ni Sukote ni Safone ua subhukile-ku ku oxi ia utuminu ua Sihone, muenexi mu Hezebone, ni Njolodá ni mbambe iê, katé kua suku o musanza ua Kinelete mu Hezebone, ni Njolodá ni mbambe iê, katé kua suku o musanza ua Kinelete mu sámbua dia Njolodá ku mbandu ia thunda.

²⁸ Iú uene o ubhinganu ua anʼa Ngadi ua tambula ku majiku mê, o jisanzala joso jenhiji kiá, ni tumadiembu tuâ.

²⁹ O kaxaxi ka muiji ua Manasa, ka uanunuka ku kaxaxi ka mukuá ka muiji ua anʼa Manasa, Mozé ua a bhana ue ubhinganu uâ, kioso kia soko o majiku mâ.

³⁰ Kienhiki-phe, mbambe iâ, tunde kiá ku Mahanaime, ni Basane iosuʼoio, utuminu uoso ua Hoke, muenexiʼa Basane, ni tumadiembu tuoso tua Jaile tuene mu Basane, makuinhi asamanu a jisanzala,

³¹ ni kaxaxi ka Ngiliiade, ni Jitalote, ni Dilei, o jisanzala ja utuminu ua Hoke, mu Basane, a ji bhana phala anʼa Makidi, monʼa Manasa, kifua-phe uene o ubhinganu ua kaxaxi ka anʼa Makidi, ku majiku mâ moso.

³² Kienhiki kiene Mozé kia uana-uana mu ubhinganu mu ngànga ia Mouabhe, ku sámbua koko dia Njolodá, ki u bhana dikunda ku Jedikó anga u lunga pholo ku mutundila-kumbi, ku thunda.

³³ Maji o muiji ua Levi phe Mozé ka u bhana ubhinganu; kuma o Jihova Nzambi ia Izalaiele, muene o ubhinganu uâ kala kia mu ambelele-kiu kiá kuala Jihova muene.