Josuué 11 - O Mikanda Ikola

Josuué ua tolola dingi jisobha jamukuá O jixi ja mbandu ia kusuku

¹ Mu kuila ima iii iabhiti, Jabine, sobha ia Hazole ua kʼivu, anga u tuma jiphunga kua Jobabe, sobha ia Mandone, ni kua sobha ia Ximilone, ni kua sobha ia Akezafa;

² ni ku jisobha ja kexi ku kusuku, ku milundu, ni mu dinhana mu kuia ku sulu ia Kinelote, ni mu iphenza, ni mu Nafote-dole, ku nzènde ia kalunga, ku mubolokela-kumbi;

³ ni ku Makanana a thunda ni a luiji; ni ku Mamodi, ni Mahiti, ni Mapelezi, ni Majebuzi ku milundu; ni ku Mahivi mu betekete ia Helemone, mʼoxi ia Mispa.

⁴ Ene osoʼá anga a tunda ni ilombo iâ ia ita, mundu uvula, o nzungule iâ mukua ni kisekele ku kibumu kia kalunga; jikabalu jivula, o makalu ue nzungule.

⁵ Jisobha joso jiji jiza, anga ji ta kibangu kiâ bhu menha ma Melone, phala kubhânga ni Izalaiele.

⁶ Jihova anga u ambela Josuué, uixi: Kana kukala ni uoma bhu pholo iâ; mbata mungu, bhu kumbi kala didi, ngʼa nemeka anga ngʼa bhakula kiua bhu pholo ia anʼa Izalaiele. Jikabalu jâ mu ji sènda o mixibha, o makalu mâ mu a oha mu túbhia.

⁷ Josuué-phe ni makuenze oso-lolo a ita aia-nê kumoxi, a diʼambatesa lusolo anga jinguma a ji tukumuisa bhu menha a Melone; anga a di lukula muenhu umoxi ku thandu diâ.

⁸ Jihova anga ua a bhakula bhu lukuaku lua Izalaiele, anga a a kuama muene, aia ni ku a bhesa lusolo katé ku Sidone iònene, ni ku Mijilefote-maine anga a somboluela mu dikôlo dia Mispa, ku mbandu ia thunda. Anga a a jibha-jibha muene katé abhu, ki bhua subhuka muthu.

⁹ Josuué anga u a bhanga muene kala kia mu tumu Jihova: jikabalu jâ ua ji sende o mixibha, o makalu â ua oha mu túbhia.

¹⁰ Kia zubha kubhita kiki, mu izuua muenhomo Josuué u vutukila-ku, u tolola Hazole anga sobha iê u mu bhitisa ku mazu a xibhata; kuma Hazole muenhú, mʼokulu muene uakexi o kilolo kiâ kia kutumina jimbanza josuʼiji.

¹¹ Mienhu ioso ia kexi-mu a i bhitisa ku mazu a xibhata, ia a i jikinisa muene, lalá! ima ioso ibhuima ka xi-mu kima, o sanzala iene ia Hazole a i oha mu túbhia.

¹² Josuué anga u tambula o jisanzala josuʼiji ni jisobha jâ, u a bhitisa ku mazu a xibhata, katé kia a jikinisa muene, kala kia tumine Mozé, selevende ia Jihova.

¹³ Hé kima, jisanzala ngó ja kexi ku thala ia tumilundu, jene ngó anʼa Izalaiele ja kambele ku ji jikatesa mu túbhia; Josuué iu ua jikatesa-ku ngó Hazole muene.

¹⁴ O madibhundila oso-phe a tundu mu jisanzala josuʼiji, ni ibhaku, anʼa Izalaiele a i bhûndu ni i kala iâ-ene; athu ene ngó a buikisa ku mazu a xibhata; ka xisa-ku muthu ni muenhu.

¹⁵ Kioso Jihova kia tendelele kua mukalakadi ué Mozé, kiene ue Mozé kia tendelela Josuué; Josuué-phe, kiene muene kia bhange; Ka selula diba, né ngó, ku ima ioso Jihova ia tendelela kua Mozé.

¹⁶ Kienhiki Josuué kia tambula oxi iosuʼoio, ni milundu, ni sulu ioso, ni oxi ioso ia Ngozene, ni manhana, ni jingânga, ni milundu ia anʼa Izalaiele ni manhana mê;

¹⁷ tundé ku mulundu ua Halake ua ku bandela ku Seíle katé ku Baale-ngadi, mu dikôlo dia Libano, mu betekete ia mulundu ua Helemone; jisobha jâ ua ji kuata ue, iu ua ji kuama muene, ua ji jibha.

¹⁸ Josuué ua lu ita ni jisobha joso jenhihji mu izuua iavulu muene.

¹⁹ Ki bhua kexi sanzala ia bhange paze ni anʼa Izalaiele, kale ngó o Mahivi a tungu mu Ngibiione, Sanzala joso muene ua ji tambuila mu mvunda ia kubhânga.

²⁰ Mukonda kia tundile kua Jihova kuene, o ku a kolesa muẋima, mbé a solomoke mu kauidila Izalaiele ni mvunda; ia a di bhange-kiu, oso muene buí, sé ngó dingi ku a kuatela henda; mbé o ku a jima mbutu ene oso, kala kia ki tendelela Jihova kua Mozé.

²¹ Mu thembu muenhomo, Josuué uejile anga u buikisa ue o ilebha, anʼa Anake, ku milundu ia Hebolone, ni ia Ndebile, ni ia Anabe, ni mu milundu ioso ia Juda, ni mu milundu ioso ia Izalaiele. Josuué anga u a jikinisa muene ni madiembu mâ.

²² Katé mu ixi ia anʼa Izalaiele ki mua subhukile kilebha, mukuá Anake, né ngó umoxi; a subhukile ngó mu Ngaza, ni mu Ngate ni mu Ajindode.

²³ Kienhiki-phe, Josuué oxi ioso iii ua i tambula; kia bhiti muene kala kioso kia tangele Jihova kua Mozé; Josuué iu ua i bhana anʼa Izalaiele mu ubhinganu, ku jimbambe-jimbambe, ni ku miji-miji. Oxi hé i zumbuka kiua o ku dílua ita.