Josuué 10 - O Mikanda Ikola

Ngibiione a mu ta mukonda kuala jisobha jitanu

¹ Anga kibhita-phe kuila, kia kʼivua Adonizedeke, sobha ia Jeluzaleme, kuma Josuué ua tolola Hai iú ua mu jikinisa taka-taká, kuma Hai ni sobha iê ua a bhange kala kia bhange kua Jedikó ni sobha iê, luamukuá ue akua Ngibiione exi a bhange paze ni anʼa Izalaiele, iá ala kiá muʼaxaxi-kâ,

² uoma ua a kuata kinéne; mbata Ngibiione uakexi kidiembu kiónene, mukuâ ni diembu dia muenexi, Hai muene ndengi ʼèlele, o mala ê oso, mazonda.

³ Kienhiki Adonizedeke, sobha ia Jeluzaleme, utuma jiphunga kua Hohame, sobha ia Hebolone, ni kua Philama, sobha ia Jalemute, ni kua Jafiia, sobha ia Lakiji, ni kua Ndebile, sobha ia Engolone, uixi:

⁴ Bandenu kunu, mu ngi kuatekese, túlue ni Ngibiione; mbata ua bhanga paze ni Josuué, ni anʼa Izalaiele.

⁵ Anga a di phopha, a banda, sobha jitanu josuʼiji ja Mamodi; sobha ia Jeluzaleme, ni sobha ia Hebolone, ni sobha ia Jalemute, ni sobha ia Lakiji, ni sobha ia Engolone, ni ene ni ilombo iâ ia ita; Ngibiione anga a mu kondoloka, a lua-nê ita.

Josuué u Banda Ngibiione

⁶ Mala a tokala mu Ngibiione-phe, atuma jiphunga kua Josuué, bhu kibangu kia Jidingale, exi: Abhikʼé ku tu ehele-kiu; banda muene lusolo kunu, u tu kudile; tu bande, kuma jisobha joso ja Mamodi, a tunga mu mulundu munhá, a di phopho kumoxi, iá a tu kondoloka.

⁷ Bhenhobho, Josuué anga u banda, ni muene ni makuenze oso a ita, atundu bhu Jidingale, ni indanda ioso ni mazonda.

⁸ Jihova anga u ambela Josuué: Kana ngó ku a kuatela uoma, mbata nga ku bhakuila-u bhu lukuaku lué; ki bhuala muthu ua-nda ku di fikidila bhu uatula eie.

⁹ Josuué-phe ua tukumuisa, kuma uende usuku uoso tunde bhu Jidingale.

¹⁰ Jihova anga u a titidisa bhu pholo ia Izalaiele, u a kuama kiavulu, mu Ngibiione; u a ambatesa ni njila i banda ku Mbetolone, hanji kia oseka katé mu Azeka ni mu Makeda tulʼé.

¹¹ Anga ki bhita-phe kuila, ene kiala kulengʼiki, mbebhu Izalaiele, o mu kulumuka mu Mbetolone, Jihova u a takula imatadi ia laula ku diulu; mu kutula mu Azeka afu; kienhókio abuika ku matadi a mvula kota mu kuvula, a fu ku xibhata ia anʼa Izalaiele, ndenge.

Ni dikumbi ni mbeji a emanesa

¹² Bhenhobho Josuué u ambela Jihova, mu kizuua Jihova kia bhakula a-Mamodi bhu lukuaku lua anʼa lalaiele, u zuela bhu mesuʼa akua Izalaiele, kuila: Dikumbi, imana hanji mu Ngibiione, eie ue, u mbeji, imana mu Dikôlo dia Ajalone.

¹³ Dikumbi-phe diemana muene, o mbeje ue kiómuene, katé kia zubha o kifuẋi ku tata o phonzo ku jinguma jâ. Manhi ima iii ki iósoneke mu divulu dia Jexele? Dikumbi ue dia nangene-phe kifua kizuua kia muvimba mu kaẋi ka diulu, dia lémbua kutula, lusolo.

¹⁴ Né mʼokulu ki kua kexi luua kizuua kinana kala kiki, o ki kia bhiti ue kiluua dingi kukala kia mukuá, kia bhingi Jihova nʼa kʼévua kiókio dízui dia muthu; mbata Jihova ua kexi mu zokela Izalaiele.

¹⁵ Josuué anga u vutuka kiua ni Izalaiele ioso bhu kibangu kia Jidingale.

Josuué u kuika jisobha jitanu jenhojo anga u ji jibha

¹⁶ Maji jisobha jitanuʼojo ja lengele, anga ji suama mu dibânda bhu Makeda.

¹⁷ Anga a ki tangela Josuué, exi: Jisobha jitanu a ji sange mu dibânda mu ja suama, bhu Makeda.

¹⁸ Kuala-phe Josuué: Muelu ua dibânda ṗhudikenu-u imatadi iònene, mu te-bhu mala mbé ku a langa.

¹⁹ Enu-phe ki mu bhuile luua; zudidikenu muene o jinguma jenu, oso a xalele kuema, jibhenu-u; ki mu a ehele di kubokona mu jisanzala jâ, mbata Jihova Nzambi ienu ua a bhakula kiá bhu lukuaku luenu.

²⁰ Kuila-phe, Josuué ni anʼa Izalaiele azubha ku a titidila ni kitaínga kiònene, katé kia a buikisa, oso a subhukile-bhu iá alengela ku madiembu ma beta o ku di fikidila,

²¹ o kifuẋi kioso kia vutukila kiua kua Josuué ni kutululuka, bhu kibangu kia Makeda; sé-ku dingi u zambesa dimi mu kuzoka ni Izalaiele.

²² Kuala Josuué: Kiki kiá, jikulenu dibânda, mu ngi bhekele bhabha o jisobha jitanuʼojo jala-mu.

²³ Athu kiene kia bhange, anga a mu bhekela jisobha jitanu, a ji fomona mu dibânda: sobha ia Jeluzaleme, ni sobha ia Hebolone, ni sobha ia Jalemute, ni sobha ia Lakiji, ni sobha ia Engolone.

²⁴ Kia zubha ku bheka jisobhʼojo kua Josuué, Josuué uexanene mala moso ma Izalaiele, iu uambela ilamba ioso ia ita, oso endele-nê, uixi: Bhixilenu; diotenu inama ienu bhu jixingu ja jisobha jiji. Ene anga a ji diota inama bhu ʼxingu.

²⁵ Josuué bhenhobho u a ambela, uixi: Ki mu kale ni kekénha, kana ue kukala ni kimbuua; kolenu muẋima, mu te-bhu ukuenze; mbata Jihova, jinguma jenu joso ji mu lua na-ju, ua-nda ku ji bhanga jinga kienhiki.

²⁶ Josuué anga u a nemeka kiua, u a jibha anga u a nhenga ku miẋi itanu; ananga ku miẋi kuenhoko katé mu ngoloxi.

²⁷ Mu kuila kumbi di toloka kiá, Josuué utuma kuila a a tulule kiá ku miẋi; hé a a takula mu dibânda mua suameneʼomo; ia a zukika-ku i-matadi iònene, ia xiti kuenhoko katé mu kizuua kia lelu.

Josuué utolola dingi sambuadi dia jisobha

²⁸ Mu kizuua kienhókio Josuué u tolola Makeda, oso ala-mu u a bhitisa ku mazu a xibhata; sobha ua mu jimisa mbutu, ni muene ni mienhu ioso iakexi-mu; ka xisa-mu kama ka subhuka; o sobha ia Makeda ua mu bhange kala kia bhangele sobha ia Jedikó.

²⁹ Bhenhobho Josuué ni Izalaiele ioso kumoxi-nê, a tunda ku Makeda anga aia mu Libina anga a bhânga ni Libina;

³⁰ Jihova u mu bhakula ue bhu lukuaku lua Izalaiele, ni diembu ni sobha iê, iu ua mu bhitisa ku mazu a xibhata ni atu oso a kexi-mu; ka xisa-ku kama ka subhuka; o sobha iê ua mu bhange kala kia bhange sobha ia Jedikó.

³¹ Bhenhobho Josuué ni Izalaiele ioso kumoxi-nê, atunda ku Libina aia mu Lakiji; a konda o mbonge, mvunda ia bambuka;

³² Jihova anga u bhakula Lakiji bhu lukuaku lua Izalaiele, ki kúkia iú bhu maku, anga, u mu bhitisa kiá ku mazu a mukuale ni muene ni athu oso a kexi-mu; kioso kia bhange mu Libina kiene ue kia mu bhange.

³³ Holane-phe, sobha ia Ngezele, ubanda mu kuatekesa Lakiji; Josuué-phe ua mu nemeka, ni muene ni kifuẋi kiê, ka mu xila-bhu muthu.

³⁴ Josuué ni Izalaiele ioso kumoxi-nê, a tunda ku Lakiji iá mu Engolone a mu kondoloka mu kúlua-nê;

³⁵ anga a mu kuata maku (a mu tolola) kumbi dienhódio, anga a mu bhitisa ku mazu a xibhata; mienhu ioso ia kexi-mu, buí; ua i jikinisa mu kizuua kienhókio muene, xata-babá! kioso kia bhange mu Lakiji kiene ue.

³⁶ Kia zubha-phe, Josuué ni Izalaiele ioso kumoxi-nê, atunda ku Engolone a banda mu Hebolone, anga alua-nê.

³⁷ Hebolone a mu kuata, ia a mu bhitisa ku mazu a xibhata, ni sobha muene ni ji sanzala je mu jimbandu, ni athu oso a kexi-mu; ka xisa-mu muthu ni muenhu, ua a bhitisa ku xibhata kala mu Engolone; u a jikinisa muene, ni diembu ni mienhu ioso ia kexi-mu.

³⁸ Bhenhobho Josuué-phe, ni Izalaiele ioso kumoxi-nê, a vutukila kua Ndebile, hé a lua-nê.

³⁹ Iá a mu kuata ni sobha iê, ni jisanzala jé mu jimbandu, anga a a bhitisa ku mazu a xibhata, mienhu ioso ia kexi-mu a i buikisa muene, ka xisa-mu kima ki subhuka. Kiene kia bhange kua Hebolone kiene ue kia bhange Ndebile ni sobha iê, mukuâ ni kia bhangele kua Libina ni sobha ie.

⁴⁰ Kala kiki, Josuué oxi iosuʼoio ua i tolola ni mu milundu, ni oxi ioso ia sulu, ni mu iphenza, ni mu jihonga ja menha, ni jisobha jê, buí; ka xisa-ku kima ki subhuka ni muenhu; inda ima ioso ibhuima ua i jikinisa muene, kala kia mu tumu Jihova Nzambi ia Izalaiele.

⁴¹ Josuué ua andekela ku Kadexi-baneia ni ku a tolola kandú mu Ngaza; oxi ioso ue ia Ngozene, katé mu Ngibiione tulʼé.

⁴² Jisobha josuʼojo Josuué ua ji kuatela-bhu kiá muene ni jixi jâ, mu kithangana kimoxi, mbata Jihova Nzambi ia Izalaiele muene ua kexi kuluila Izalaiele o ita.

⁴³ Euá, bhenhobho kia zubha kubhanga kiki, Josuué ni Izalaiele ioso muene, athu a ku vutukila kiua bhu kibangu bhu Jidingale.