Josuué 1 - O Mikanda Ikola

Ngana Nzambi u zuelesa Josuué, u mu suinisa

¹ Kiki-phe Mozé, ngunza ia Jihova, kia zubha kúfua, Jihova u zuelesa Josuué dia Nune, mukalakadi ua Mozé, uixi:

² Mubhikʼami Mozé, uafu; kiki-phe balumuka, u zaúke ngiji iii ia Njolodá, ni eie ni kifuẋi kioso kiki, mu bhiẋile mʼoxi i nga-nda ku bhana anʼa Izalaiele.

³ Kioso kididi ki diota kànda dienu dia kinama, nga mi bhana-kiu mnene, kala ki nga tangela Mozé.

⁴ Tunde ku kikangalakata, ni ku mulundu ua Libano, katé ku ngiji ia dikota ia Ufalate, ixi ioso ia Mahiti, katé ku musanza ua kalunga ku mbandu i fuila dikumbi, kuene ku mbambe ienu.

⁵ Kana muthu ua-nda kutena kuimana mu kubhânga ni eie, katé bhu bhuilu dia muenhu ué. Kala ki nga kexile ni Mozé, kiene ue ki ngi kala ni eie; ki ngi ku xisa kana, ki ngi kuehelela.

⁶ Kala u kindanda, u kole kiambote muxima; kuma o kifuẋi kiki eie muene ua-nda ku ki uanena ibatu ia undundu uâ, mʼoxi i nga lokela jitata jâ ngixi hinu ngi mi bhana-iu.

⁷ Hé kima, eie muene, kala ngó u kindanda, u kole muxima kiavulu, u kale ni muanu ua kualuka ngonge ioso ia ku lekelela mubhikʼami Mozé; ku i xie, mu ku bhambukila ku kiasu mba ku kúdia, mbé uijiie kuenda kiambote kuoso-kuoso ku u di tela.

⁸ Divulu didi, dia ngonge, ki di bhue mu kanu; kota u kala mu ku di banza jinga mu muanha ni mu usuku, mbebhu uijiie kubhanga ima ioso ni muanu kala kia i soneka muenhomo; kuma hé kiene ki u bhanga, uendelu ué u kala ua kubhanduluka, o kuenda kué ku kala kua madimu.

⁹ Ki eme muène nga ku tumu? Kala u kindanda, u kole kiambote muxima; kana kukala ni uoma, kana kukala ni kekenha; kuma Jihova, Nzambi ié, uala-nê kumoxi kuoso-kuoso ku aia.

Josuué u tuma kifuẋi ku di iudika phala kuzaúka Njolodá

¹⁰ Bhenhobho Josuué u tuma jithuame jakifuẋi, uixi:

¹¹ Bhitenu mu kilômbo muambele mundu a iudike huta; kuma izuua ki i tena, mua-ndu zaúka Njolodá muenʼiú, ni mu bokone mu tambula ixi ia mi bhana Jihova Nzambi ienu, nʼi kale ixi ienu.

¹² Akua Lubene, ni akua Ngadi, ni mbandu ia muiji ua Manasa, Josuué anga u a ambela, uixi:

¹³ Xinganekenu kizuelu kia Mozé, ngunza ia Jihova, kia mi ambela, uixi: Enu, Jihova Nzambi ienu ua mi bhana kiá kunhoha ni ixi ienu.

¹⁴ Ahetuʼenu, ni anʼenu, ni ibhaku ienu, i xale mʼoxi ienu ia mi bhana Mozé, ku sámbua kunu dia Njolodá; maji enu-phe mu zaúka, ni mu tuamenena akuenu ku pholo, enu oso mua maneka, oso mala a nguzu a tena kubhânga, mbé mu kuatekese akuenu,

¹⁵ Katé Jihova kia kà bhana akuenu kunhoha, kala kia mi bha-ku enu, ni a xikame mu jixi jâ, ja a bhana Jihova Nzambi ienu; kiene kiua ki mu vutuka, mu xikame kiambote mu jixi jenu ja mi bhana Mozé, ngunza ia Jihova, ku sámbua kuná dia Njolodá, ku tundila dikumbi.

¹⁶ Ene anga a vutuila Josuué, exi: Kioso ki ua tu ambela, kiene ki tu bhanga, kuoso ku u tu tuma, tuia muene,

¹⁷ Kioso ki tua kexi kuívua Mozé mu ima ioso, kiene ki tu kuívua ue eie; kabasa Jihova Nzambi ié u kala kumoxi ni eie, kala kia kexi kumoxi ni Mozé.

¹⁸ Uoso u bhukumukina kizuelu kié, mba u kamba kuívua ima ioso i u muambela, a kale muthu ua ku mu jibha; kia kate-ku eie ku kala u kindanda, u kole kiambote muxima.