Jona 4 - O Mikanda Ikola

O kuluuala kua Jona, ni mbimbi ia vutula Jihova

¹ Maji kienhiki Jona kia mu iibhila kiavulu, anga u kala ni njinda.

² Hé u sambela Ngana, uixi: U Jihova, ki kiene ki nga tangelʼiki, kioso ki ngala hanji kʼoxi iami? Kiene kia ngi bhekelele kulengela ku Talxixi, kuma ngejiia muene kuila eie u Nzambi ia henda ni kulenduka, ua vula o mbote ni muanu, u kokoloka kubeta, u lenguluka kukuatela henda, anga u lenguluka ue kudiela, ki uandala kubhana muthu kaxtiku.

³ Nga ku diondo-phe, u Jihova, ngi batule muenhu uami, mbata kota ngafu kulaia kiki, kana.

⁴ Ngana anga u mu kumbulula, uixi: Kifua eie uà lungu, kukala ni njinda?

⁵ Bhenhobho Jona anga u tunda mu mbanza, anga u xikamena ku thunda ia mbanza ku mutudila-kumbi; kuenhoko u tunga-ku fundu, anga u xikama muenhomo mu kilembeketa kiê, ni kukinga phala kumona kioso kia-nda kubhita mu mbanza.

⁶ Ngana Nzambi anga u sabhukisa músala ua dinhángua, uene u banda ku thandu dia fundu, phala kubhekela Jona kilembeketa ku mútue uê, ni kusosolola malamba mê. Jona anga u sanguluka kiavulu mukonda dia músala ua dinhángua.

⁷ Maji mu kúkia mu kimene, Ngana Nzambi u tumikisa kibamba, anga ki kesa o músala ua dinhángua, uene hé u lela, anga u kukuta.

⁸ Anga ki bhita-phe kuila, kiatu muanha, Ngana Nzambi u tumikisa kitembu kionéne kia tema kia thunda, o misongo-songo ia muanha ua dikumbi anga i tula mu mútue ua Jona. Muene anga u ambuka ni kizuza kia muanha, hé uinda kúfua ni muẋima uê uoso, uixi: Kota ngafuʼami kiá, kukola muenhu kiki, kana.

⁹ Bhenhobho Ngana Nzambi u tangela Jona, uixi: Kifua ua fika kuma eie ua lunguʼé kukala ni njinda mukonda dia músala ua dinhángua? Jona uitaia, uixi: Xi! Nga lunguʼami muene, o kukala ni njinda ni kuinda kúfua.

¹⁰ Jihova anga u mu vutuila dingi, uixi: Uala ni henda ia músala ua dinhángua, kima ku ki kalakela, kua ki dimi; kiedi kia sabhuka usuku umoxi, anga ki di bota ue usuku umoxi.

¹¹ Kífua eme ki nga tokala kukala ni henda ia mbanza iadikota ia Ninive, muala hama ni makuinhi a iadi a midi ia muthu ndenge, athu kejiia lukuaku luâ lua kadilu ni lukuaku luâ lua kiasu, ni ibhaku iavulu?