Jona 2 - O Mikanda Ikola

Jona mu mala dia kimbiji kiadikota; o musambu uê ni kubhuluka kuê.

¹ Jona anga u samba kua Jihova Nzambi iê, mu mala dia mbiji,

² uixi: Mu dilamba diami nga dikola kua Ngana, muene ua ngʼitaia; mu mala dia mukiukuluku nga dikola, eie ua ngi-vu dízui diami.

³ Mukonda eie ua ngi takula mua zongo Bhu holiʼélele ia kalunga, o hungulule ia ngi kondoloka, o mafuta mé moso ni mabhuku mé a ngi bhiti muene ku thandu.

⁴ Eme-phe ngʼambele kiá, ngixi: A ngi texi kiá ku mesu mé; manhi hanji nga kà mona dingi o Tembulu ié ikôla?

⁵ O menha ma ngi kondoloka katé ku muenhu moxi; nga kuzuka mu kidikungu kia zongo, kia ngi kondoloka ku mbandu joso; ithumba-mbole i sabhuka mu menha, ia dikuta-kuta ku mútue uami.

⁶ Eme nga kulumuka katé koxi, kuene mu kusabhuka o milundu; nga kuzuka mu bòmbo diaʼxi o jitalanga jaʼxi ja ngi jikila-ku ni kuene puetu, katé kiá ku hádia ni hádia! Maji eie ua ngi vutuila, muenhu uami ku u ehela kuxalela mu kina, Ngana Nzambi iami tata!

⁷ Kioso muenhu uami moxi ki ua botomoka, eme nga lembalala dingi Jihova; o musambu ua kudikola kuami ua bhiẋila kó kué mu Tembulu ié ikôla.

⁸ Oso a kaiela ukumbu ua kubheza iteka, ió a lueza, kuma a sanduka bhuʼotho ia henda ié ia kidi.

⁹ Maji eme-phe ngi ku satela, ni kuimba ni mbimbi ia kusakidila; ngi futa ioso i nga di hambelela kua Jihova; o kubhuluka kuami ku tunda kua Jihova.

¹⁰ Kienhokio-phe Ngana u zuelela o mbiji, iene hé iia i lusila Jona ku ndundu ia kalunga ku kanga.