Jobe 2 - O Mikanda Ikola

O kubhondalala ni kutata kua Jobe kia mu lola lua kaiadi

¹ Mu kizuua kia mukuá kioso kieza anʼa Nzambi mu ku di bhakula bhu pholo ia Jihova, Satana ué, ueza mu ku di bhakula bhu pholo ia Jihova.

² Bheneʼobho Ngana uambela Satana, uixi: Ua mu tunda kuebhi? Satana anga u vutuila Jihova, uixi: Mu ku kondoloka o ngongo ni ku nhunga-mu.

³ Jihova anga uambela Satana, uixi: Mubhikʼami Jobe ua mu mono? Mukonda mu ngongo kana-mu muthu ua di fu ni muene, muthu ua kidi ua iuka o muẋima, mukua uoma ua Nzambi, o ia ibha u i lenga. Sumbala eie ua ngi funhisa phala ku mu jikinisa sé kikuma, maji muene hanji a jijila kuiuka kuê.

⁴ Bheneʼobho Satana u vutuila Jihova, uixi: Muenhu uà touala, kuma kikonda mu kikonda, o muthu ioso iala na-iu u i bhana mu ku kula o muenhu uê.

⁵ Sunununa ngó lukuaku lué, u mu kuate hanji mu ifuba ni mu misuínhi, u mone mba muene ka-nda ku ku ẋonguena muène bhu pholo ié!

⁶ Jihova anga uambela Satana, uixi: Tala, muene uala bhu maku mé; mu lange ngoho o muenhu uê.

⁷ Bheneʼobho Satana anga u sondoloka bhu pholo ia Jihova, anga u kuama Jobe ni ijimbu ia ibha tunde bhu kànda dia kinama katé bhu thala ia mútue.

⁸ Jobe anga u xikama mu uthôkua, u katula kituetu kia ditela phala kuia ni ku di aza na-kiu mu italakanha iê.

⁹ Bhenhobho muhatuʼê u mu tangela, uixi: Hanji ua jijila o kuiuka kuê? Nzambi mu xinge, u fue kiá.

¹⁰ Maji muene u mu vutuila, uixi: Kala ki zuela dilaji dioso-dioso, kiene ki ua mu zuela eie; mbé tu tambula ngó jimbote kua Nzambi o ia ibha kana? Mu ima ioso ienhiʼii Jobe ka tela-mu kituxi ni mizumbu iê.

O makamba ma Jobe

¹¹ O makamba a tatu a Jobe-phe, kioso kia zubha kuívua o kuiibha kuosʼuku kua lundulukila ku thandu diê, eza, muthu ua tundu bhu kididi kiê, muthu ua tundu bhu kididi kiê, enhá; Ilifaji mukua Temane; Bidade musuuita, ni Zofale mukua Nahama; hé a di kunda kuiza kumoxi mu ku mu hindula ni ku mu konda malamba.

¹² Ene kia zambula mesu mu kanga phala ku mu tala, ia a mono kuma a lémbua ku mu ijiia, a te jingololo ni kudila. Bhenhobho kala muthu u tandula thanga iê hé u di takuila fufuta mu mútue, bhulu.

¹³ Hé a xikama mu mavu kumoxi ni muene, sambuadi dia kizuua ni sambuadi dia usuku; ene oso ki bhuala ngó muthu ua mu kumbulula mukonda a mono kuma misusu ia mu vudila kinéne.