Jisálamu 96 - O Mikanda Ikola

Diximanu Dia Unéne Ni Kujinga Kua Nzambi

¹ Imbilenu Jihova muimbu uobhe; imbilenu Jihova enu mu jixi joso.

² Imbilenu Jihova, mu tumbudienu o dijina diê; tangenu o ubhulukilu uê kizuua ni kizuua.

³ Tumbulenu o fuma iê muʼaxaxi ka matumbu, o isuma iê tangenu-iu ku diembu dioso.

⁴ Kuma Jihova munéne, ua tokala ku mu ximana kiavulu; muene a mu kuatela uoma, jinzambi jengi kana.

⁵ Mukonda o jinzambi ja ifuẋi ioio, iteka ngó; Jihova phe muene ua bhanga o diulu.

⁶ Ni ujitu ni ungana a mu kala bhu pholo iê; ni nguzu ni kuuabha kuala mu kididi kiê kiangene.

⁷ Bhakulenu kua Jihova enu mu miji ia athu, bhakulenu kua Jihova o fuma ni nguzu.

⁸ Bhakulenu kua Jihova o fuma ia tokala dijina diê; zenu ni maujitu, mu bhixile ni sata mu malumbu mê.

⁹ Bhezenu Jihova mu kukemba kuazele kua uiukilu uê; mu kuatedienu uoma enu oso mua tungu mu ngongo.

¹⁰ Tangenu-kiu ku matumbu muixi: Jihova ua hinge ungana uê. Muene ixi ua i kuatesa bhu kididi, ka tena ku i sendumuna; hádia muene u fundisa o mundu mu uiukilu uê.

¹¹ Diulu di tane-ku, mu ngongo mu sanguluke! Kalunga ka dikole ni mabhuku mê moso!

¹² Ku mukáu ku kale ngalasa, ni ku idima iê ioso iala-ku! O miẋi ioso ia matutu i kembe,

¹³ Bhu pholo ia Jihova, kuma iú iza, iú iza mu fundisa o ngongo; u fundisa o athu mu ngongo ni kuiuka, u tetuluila o mundu ni kidi kiê.