Jisálamu 94 - O Mikanda Ikola

Nzambi Muene Ngó Mufundixi Ubatula Mukidi

¹ U Jihova ua tokala o kubhesa o kaxtiku, u Nzambi u tokala kuzôkéla, tukuluka ni kubenha kué.

² Zangumuka, eie u Mufundixi ua mu ngongo; akua izala u a bhane o futu ia tokala.

³ U Jihova, tata, mbambe bhebhi bhu suka enhó abhukumuka, ni kusangulukila mu kubhuma kuâ?

⁴ A di thatha, a zuela izala ioso; abhangi a mangonha enhoso, u sanga a di ta jinzambala jâ.

⁵ Mundu ué, u Jihova, ala ku a huha, o undundu ué a u tatesa muene.

⁶ Mutudi a mu jibha, ni nzuángiza, hukunhi a mu zubhidisa muene, ka mu xi.

⁷ Exi-phe: Jihova ka ki mono, Nzambi ia Jakobo ka tena ku ki suua.

⁸ Xinganekenu hanji enu jibulutu ja athu, enu mu ioua, kífua ki mu dimuka dingi?

⁹ Ua bhanga o dítui, kífua u kamba kuívua? Ió ua iudika o diesu, mbé u kamba kumona?

¹⁰ Mukua kulonga madiembu, muixi ka bazela? Muene muene u longa o muthu kilunji, kífua u lémbua o kuijiia?

¹¹ Jihova uejiia muene o kuxinganeka kua muthu, kuma usemenhi uoso.

¹² Muthu-phe u zediua, se eie u Jihova ua mu beta, hé u mu longa mu ngonge ié.

¹³ Phala mu izuua ia uíndua a ximbakate, katé diela ki di bhua ku di kanda, mu fua ió ua huku.

¹⁴ Kuma Jihova ka tena kusenga o mundu uê, muene ka tena kuehelela o undundu uê.

¹⁵ Aiukila mu njila kidi a ki sanga ku pholo; oso emana mixima nzanza, hinu a lungʼâ muene.

¹⁶ Nanhi muene u ngi bhângela kua ió akua phulu? nanhi u ngi banda mu kudituna kubhanga kiaiibha?

¹⁷ Se Jihova ua kambele ku ngi banda, hinu nga bokona kiá inzo ia kambe o muelu, o muenhu uami hinu ua tungu kiá mu dikuluma.

¹⁸ Nga ki ambele kiá, ngixi: Eme nga ẋangumukʼó; eie-phe u Jihova, mu henda ié, ua ngi kambuila, ki nga di bhale.

¹⁹ Hele jivula jandekele ku ngi kuata mu muẋima, maji mu ukamba ué, muẋima uami ua batama dingi.

²⁰ Manhi o kiiala kia di zangeleka, ki tena ku di bunda kumoxi ni eie? u diodia milonga, maji uixi muene mu ngonge mu nga kuata?

²¹ A di vubula kumoxi enhoso mu kúdia ió aiuka, a jibhisa ió kala ni kikuma mba mulonga.

²² Eme-phe, bhabha, Jihova muene o ditala diami dia kondama, muene Nzambi iami, ditadi diami dia kulengela.

²³ Kituxi kiâ-phe kia-nda kualuka, hé ki a tula ene; Nzambi u a senguluila mu usuéia uâ; kiene muene, Jihova Nzambi ietu hinu u a buidisa.