Jisálamu 92 - O Mikanda Ikola

Muimbu Ua Kusakidila Nzambi

Mukumbi ua Kizuua kia sabhalu. Ua kuimba ni mujika.

¹ Kima kiambote o kusakidila jinga Jihova, kuimba muene ni kuximana o dijina dié, u Suke-ku.

² Mbé kuidikiza o kulenduka kué mu kimene, ni kukumbidila kué mu kumbi dioso dia ngoloxi.

³ Ku i xikila muene ku mujika ua kuinhi dia ngoji, ni ku kakoxi; ni dízui dia manuma ku mbànza.

⁴ Kuma eie, u Jihova, ua ngi sanguluisa ni iakalakalu ié; ngimba kikoue mu kubanza kia iudika o maku mé.

⁵ Ufunu ua ikalakalu ié, u Jihova, uahi ngó! o kubanza mu ikutu ia ixinganeku ié, mua zongo!

⁶ Bulutu ima ienhiʼii ka i xinganeka; o semenhi u lémbua ku i ijiia.

⁷ Sumbala abhukumuka a fuafua muene kala iangu, abhanga o ima ia mangonha u sanga a benha; maji sai bhoso bhua buidila kumoxi, aia muene nzaká!

⁸ Eie-phe, u Jihova, ditala diengi di uemana, kuma eie-muène Suke-ku katé ku hádia ni hádia!

⁹ Iala-ze, u Jihova, Ngana, jinguma jéʼojo, iala-ze jinguma jéʼojo, hádia ji buila muene, lalá! Ooso abhanga ima ia mangonha, a kèla muangatatá!

¹⁰ Eme-phe u ngi vudisila o nguzu iami kala ia phakasa; kuma eie ua ngʼundu ni maji mengi ma kindala.

¹¹ Mesúʼami à ki mona, ki uâ ngi bhanga o jivondadi ku jinguma jami, matui ami ue à kevua kioso kia bhiti kua enhó a kexe ku ngi balukila.

¹² Uaiuka-phe u koma kala diie; u kula hé u jinga kala muxi ua muxitu ua Libano.

¹³ Oso a a phaphe mʼonzo ia Jihova, a jîngila muene ku malumbu ma Nzambi ietu.

¹⁴ Katé ni mu ukukilu, hanji ema ibundu; a kà buingita muene kiavulu, a zanda.

¹⁵ Mbebhu o kuidikisa kuma Jihova ua tetuluka; muene ditadi diami dia kipena, mua muene ki muene uthu uengi.