Jisálamu 91 - O Mikanda Ikola

Kusuamena Mu Mabhabha A Nzambi

¹ Ió ua tunga mu kibúta kia kondama kia Suke-ku, iú ua xikama mu kilembeketa kia Muteni-a-ioso,

² ua kéla kuma: Jihova dilengelu, kimbaka; Nzambi iami, nga dielela kua muene.

³ Ka kambe ku ku kudila ku múkala ua dinhanga, ni mu dibhebhu di sambuka.

⁴ Muene u ku vungina ni jisala jê, o moxi a mabhabha mê, muene mu u suamena; o kidi kiê ki di bhanga ngubu ni ibhakatu.

⁵ Ku kala ni kekenha, mbé unguma u zomba mu usuku, mba mufula ua ku asa mu muanha;

⁶ Mba dibhebhu diendela mu kitombe, mba kibuika ki kuata ku mediia.

⁷ Né kua dibhale midi bhu mbandu ié, né kuinhi dia midi ku lukuaku lué lua dilu, eie bhobho ki ki ku bhixila.

⁸ U tala ngó ni mesu, hé u mona abhukumuka kia bonga o kaxtiko.

⁹ Eie bhobho-phe, uila: Jihova dilengelu diami, Suke-ku muene kimbaka.

¹⁰ Ku fike kuma u takana ni uíndua, ki bhuiza diẋika bhu bhata dié.

¹¹ Kuma muene u tuma o jianjo jê ku ku tambula konda, phala ku ku inga mu njila jé joso.

¹² Jene ji ku zangula bhu maku, phala ku di bhukane kinama kié ku ditadi.

¹³ Ua kà diota o hoje ni diuta; munzangala ua hoje ni nhoka u i titidila muene bhoxi.

¹⁴ Mukonda ua ngi naminina ni henda, eme-phe, ngi mu kudila; ngi mu tudika ditala, ka mu tena, mukonda ua ngʼijiia o dijina.

¹⁵ Muene kia ngʼixana, eme ngʼitaia; bhu kíbhidi ngi mu kala bhu mbandu; ngi mu kudila, ngi mu jingisa.

¹⁶ U laia izuua iavulu, i ngi mu bhana, vondadi i mu bhua; eme ngende ni ku mu idikiza ki kala o ubhulukilu uami.