Jisálamu 90 - O Mikanda Ikola

DIVULU IV ( Jisálamu 90—106 ) Nzambi Unangenena, O Muthu Ubhita Lusolo

Musambu ua Mozé, muthu ua Nzambi.

¹ Ngana, eie u kibuta kietu, kutunda muiji kuiza muiji.

² Kioso milundu kiluua a i vuala, ni mavu ni ixi kiluua u i umba, tunde xahulu katé ku hádia, eie Nzambi u nangenena.

³ Muthu-phe u mu sekumuna, uixi: Vutukenu mu mavu, enu mu anʼa athu.

⁴ Kuma midi ia mivu ku mesu mé mukuâ ni kizuua kia mazá kia bhiti, mba kithangana kia kufula kilu mu usuku.

⁵ Eie u ambata kala hungulule ia menha ia a bhitula, a di fu kala nzoji ia kimenemene; edi kala iangu ki i kula mu kimene;

⁶ mu kimene i sabhuluka, anga i bhana itulu; maji mu ngoloxi-phe a i sua, i kukuta.

⁷ Kuma njinda ié i tu dia, o nzuna ié ia tu tatesa kala túbhia.

⁸ Ituxi ietu ioso ua i tadika ku mesu mé, ni itondalu ietu ia muẋima ku mukengeji ua pholo ié.

⁹ O izuua ietu ioso ia jimina mu nzuna ié, mivu ietu ibhua kala muthu ua tula muenhu.

¹⁰ Izuua ia mivu ietu makuinhi sambuadi, amoxi kia kala ni nguzu, a bhiẋilu bhu makuinhi nake; hanji-phe kujiza kuâ kua hadi ngó ni mukondo; ki i nange kubhita, kindala tu tuka!

¹¹ Nanhi-phe ua te muẋima mu kuijiia kuila njinda ié i nema? o kuluuala kué nʼa ku kala ni uôma kala kia tokala?

¹² Tu longe, Ngana, kukuata o konda ia izuua ietu, phala ku muẋima tu kale ni kilunji.

¹³ Jihova tata, bhomba o muẋima ué! Mbambe bhebhi bhu u suka, ni kukokoloka kiki? U xinganeke jiselevende jé ku a kuatela henda.

¹⁴ Tu ikutise mu kimene ni kiadi kié; phala tu sanzuke, tu sanguluke jinge izuua ioso ia muenhu uetu.

¹⁵ Tu tanese ku izuua ioso i ua tu talesa o hadi, ni mivu ioso i tua mono o jiphaxi.

¹⁶ Jiselevende jé a ku mone ki u kalakala, o fuma ié i tukuluke ku anʼâ.

¹⁷ O uabhelu ua Jihova, Nzambi ietu, u kale ku thandu dietu; u kôlese ikalakalu ia maku metu; èué, ikalakalu ia maku metu i kuate kiambote.