Jisálamu 89 - O Mikanda Ikola

O Jipolomesa Ja Utuminu Ua mixiia Kua Davidi

Maxikile ma Etane mukua Zala.

¹ Ngʼimba jinga jihenda ja Jihova, o ufiiele ué ngi u tanga muene ni dikanu diami, kutunda muiji kuiza muiji.

² Kuma nga mono o jihenda jé ja tunguia muene katé ku hádia; o ufiiele ué ki u budika dingi, ua kuata kala kia kuata o diulu.

³ Uixi: Nga te kikutu ni muthu uami nga mu solo, selevende iami Davidi nga mu lokela.

⁴ Ngixi o mbutu ié i laia muene ni ku hádia ni hádia; kiandu kié ngi ki tunga ni ki nangenena, kutunda muiji kuiza muiji. (Selah.)

⁵ Eie, u Jihova, ni kilômbo kia diulu kia kà ximana o madiuanu mé; o ufiiele ué a kà u tumbula bhu kionge kia athu aiuka.

⁶ Kuma, nanhi muene, mu dinga ni dinga, u mu fika ni Jihova? o ku anʼa mazonda, nanhi u soka ni Ngana?

⁷ Nzambi ukôla, mu kionge kiê kia ji-anjo! Munéne! U kuata uôma! Ene oso a mu kondoloka mu mbèle iê, a mu xila kiavulu!

⁸ U Jihova, Nzambi ia ilômbo, nanhi ukôla kala eie, Ngana, ni ufiiele ué ua ku fikidila mu jimbandu joso?

⁹ Eie-muène, u Ngana, u tumina o kalunga se musanza uê ua nanuka ni ukumbu; o ki zangumuka mabhuku mê, eie-muène ue u a bateka.

¹⁰ Mudikixi ua mu diota-diota, kala ua mu kuamena kúfua; o nguma jé ua ji muanga-muanga ni lukuaku lué lua nguzu.

¹¹ Diulu dié eʼmuène, ixi ue ié eʼmuène, mu ngongo ni ima ioso iala-mu eie-muène ua i iudika.

¹² Ni ku suku ni ku sulu eie-muène ua kalakala; ni milundu ia Tabola ni Helemone eie-muène ia ku tumbula.

¹³ Eie o lukuaku lué luala ni nguzu ia kindanda; o lukuaku lué lua suína, o lua dilu se ua lu sunununa lu bhanga muene madiuanu!

¹⁴ Ni kufundixa kua kidi ni kutetuluka kua ku fikidila o kiandu kié; ni kulenduka ni kidi a ku tuamenena kuoso-kuoso ku u di tela.

¹⁵ Athu ió azediua ejiia o nzòngo ié ia ngalasa; enda jinga muene, u Jihova, mu mukengeji ua pholo ié.

¹⁶ A sangulukila mu dijina dié, kumbi dioso dia kambàmba; mu kufundisa kué kua kidi, muene mua bhandulukila.

¹⁷ Kuma eie-muène u nguzu iâ, u thathe iâ; lumbinga luâ lua bhetuka mukonda dia kiadi kié.

¹⁸ Kuma ngubu ietu ia tu xitila, u Jihova, eie ua i kuata; ni sobha ietu ua tu kala ku pholo, isèngele ia ngene ia Ngana Ukôla ia Izalaiele.

¹⁹ Sai bhu ua zuela mu kisukila ni muthu ua kazola ké, uixi: sai kilolo nga mu tuika o uzonda ua kubhângela; sai dikuenze nga mu tungula mu kaẋi ka mundu.

²⁰ Nga bongo Davidi, selevende iami; ni maji ami a kijila nga mu undu ku ungana.

²¹ Lukuaku luami lu kala-nê jithembu joso; lukuaku luami luene lu mu bhana o nguzu iasoko.

²² Kana nguma i tena kuvubuka mʼoxi iê, kana kisuéia ki tena ku mu tolola.

²³ Jinguma jê ngʼa beta muene bhu pholo iê, ngʼa muanga-muanga oso a mu zembe.

²⁴ Ni kitongola ni jihenda jami ja ku di tuma, jene ji mu endesa; ngi mu zangeleka muene ditala dia ujitu, o nguzu iê idibandekeza.

²⁵ Mu kukuata mavu, kuku mbambe kalunga; o kuamukuáʼuku mbambe o honga ia Ufalate.

²⁶ Eme u ngʼixana: Tata, Nzambi iami, ditadi diami dia kulengela, ubhukilu uami.

²⁷ Muene-phe ngi mu ila: Monʼami ua phande-kumbi, muene suke-ku ku jisobha mu ngongo.

²⁸ Jihenda jami ngi mu bhakela-ju sé kizuua kia kufula.

²⁹ Muiji uê ki u kala dingi ni dizubhilu, kiandu kiê ki nanga kala o izuua ia maúlu.

³⁰ O anʼê kia kamba kukuata o ngonge iami, se nguauâ kuenda kala ki nga tumu;

³¹ O kulonga kuami se a ku tobhesa, itumu iami nʼa i tondala;

³² Ngʼa beta muene ni lumbamba, mukonda dia ituxi iâ, mu kubhukumuka kuâ, ngʼa bhesa jixikote.

³³ Kiene kimoxi, jihenda jami ki ngi ji katula kua muene, ki ngi fulu dingi o ufiiele uami.

³⁴ Kikutu kiami ki ngi tena ku ki zanga, mba kuzuela luiadi o kima kia ngi bhiti ku mizumbu iami.

³⁵ Nga loka kiá muene lumoxi mu kuzela kuami kukola; Kuila Davidi ki ngi mu tela dingi makutu.

³⁶ Kuma muiji uê uà kà nangenena muene, o kiandu kiê ki kuata muene, kala o dikumbi ki nga di bhake bhu kididi kiê.

³⁷ Kià kala muene katé ku hádia, mukuâ ni ki nangenena o mbeje, mbangiʼoio ia fiiele mu dinga ni dinga. (Selah.)

³⁸ Maji eie Ngana ua tu ehelela, ua tu senge, o muthu uê ua mu undu ni maji ua di zangala-nê.

³⁹ O Kikutu ki uate ni selevende iê kiedi kala kia ku kumu; kitundu kiê ua ki fukula, ni ku ki takuila mu mavu.

⁴⁰ Imbaka iê ioso ua i bula-bula; o jimbonge je joso ua ji sengulula.

⁴¹ Oso a bhita njila, a mu bhûnda-bhûnda; ua sebuka bhu pholo ia athu a tungu-nê bhua zukama.

⁴² Eie ua zangeleka ió oso a mu zembe; o jinguma jê joso, ua a bhana kutana.

⁴³ Xibhata ié ua i vutula kuema ku ia tundu, sobha kua mu fikidila mu ita.

⁴⁴ Mbasá iê i benha ua mu tambula-iu, kiandu kiê ua ki nenguna, kia zeka ngó muene bhoxi.

⁴⁵ O izuua iê ia unzangala ua i selula; ua mu kuatesa jisonhi, ua sebuka ni muene! (Selah.)

⁴⁶ Jihova, tata, u suka bhebhi ni ku di sueka kiki? katé ku hádia ni hádia? o njinda ié ia uama kala túbhia, kífua ki tuà jima dingi?

⁴⁷ Xinganeka o thembu iami, kuma ki i nange kúbhua; Eie, kífua anʼa athu ua a bhangela o kuseluka ngoho?

⁴⁸ Dizonda diebhi, di laia phala kafue dingi? nanhi u sukununa o muenhu uê bhu maku a kalunga-ka-ngombe? (Selah.)

⁴⁹ Ngana, tata, o jihenda jé jòkulu ja xalela kuebhi, joso ji ua lokela Davidi ni ufiiele ué uoso?

⁵⁰ Xinganeka, Ngana, o kusebuka kua jiselevende jé; ni ki ngʼambata mu thulu iami o mondo ua miji kʼejiia Nzambi.

⁵¹ Eie muene u Jihova, a ku te mondo, Kuma muthu ué ua mu undu ni maji uala kubonga malebhu.

⁵² Jihova-phe a mu tanese sé dizubhilu. Euá! Amén!