Jisálamu 88 - O Mikanda Ikola

Kuditenda Kua Muthu Ua Bhondalala

Muimbu, Mukumbi ua anʼa Kola; ua Mesene Ngimba; mbimbi iê ia Kukata ni kudila. Maxikile ma Hemane mukua Zala.

¹ U Jihova, Nzambi ia ubhulukilu uami, ngi dikola ko kué muanha ni usuku.

² Musambu uami u bhixila bhu pholo ié; bhetama dítui u ngʼivue o ku di tenda.

³ Kuma muẋima moxi ua ngʼizala ni malamba, o muenhu uami ua zukama mu bòmbo dia kalunga!

⁴ A ngi mono exi iú kuala o kuia mu mbila kuene,

⁵ A ngi te kiá kumoxi ni madifundu, nga soko kiá ni afi a zeka mu mbila jâ, a bhingi eie kuala ku a xinganeka dingi, o ku lukuaku lué a batuka-ku kiá.

⁶ Ua ngi zekesa muene bhu hole ia kina, mu ididi iavundu, mua zongo kinéne.

⁷ Njinda ié kífua ia ngi nemena ku muenhu, o mabhuku mé ma ngi bhiti muene ku thandu. (Selah.)

⁸ Jingijiue jami ua a sondolokesa dikanga; ua ngi bhange kukala ngi musúnda, athu a ngi lenga; a ngi jikila-ku, ki ngi tena kutunda.

⁹ Mesu ami a vundu kiá ni kudila mukonda dia dilamba, o izuua ioso ngi dikola ko kué, u Jihova; nga ku sununuina o maku ami ni kudionda.

¹⁰ Kífua eie u idikiza o madiuanu kua ió afu kiá? aia kuʼalunga manhi a tena dingi kubalumuka ni ku ku ximana? (Selah.)

¹¹ Henda ié kífua a i tumbula dingi mu mbila? mba o ufiiele ué mu bòmbo dia kalunga?

¹² Madiuanu mé manhi a moneka dingi mua vunduʼomo? mba o kukumbidila kué mʼoxi ia kijimba kioso munhá?

¹³ Eme-phe ko kué ku nga dikola, u Jihova; mu kimenemene musambu uami u ku sanga.

¹⁴ Jihova, tata, o muenhu uami u u texila-hi kiki? phala-hi u ngi suekela o pholo ié?

¹⁵ Tunde mu undenge ki nga bhondalala, ngala bhu bhulubhulu dia kúfua; nga juuala ni isuma ié, kuma ia ngi kuatesa uoma!

¹⁶ Túbhia tué tua njinda tua ngʼaula, kuma tua ngi bhiti ku thandu; o jikaxtiku jé nga bhuuama na-ju.

¹⁷ Ja ngi kondo kala ngala kuboba mu menha; kuene kuoso, ja ngi xitila izuua ioso.

¹⁸ Ki ngʼene thumba, ki ngʼene samba; ndandu ni kamba a ngi muangana, kamba diami kífua o usuku.