Jisálamu 86 - O Mikanda Ikola

Musambu ua Muthu Uabhindama

Musambu ua Davidi.

¹ Bhetama dítui dié, u Jihova, u ngi kumbulule; mukonda ngi phulungu, nga tate.

² Ngi bhake o muenhu uami, mukonda ngi mukua uoma ué; eie-phe u Nzambi iami, bhulula selevende ié ua ku dielela.

³ Ngi kuatele henda, Ngana, kuma kumbi dioso dia kambàmba nga dikola ko kué.

⁴ Ngi selevende ié, ngi tanese o muẋima; kuma ko kué, Ngana, ku nga zangula muenhu uami.

⁵ Kuma, eie Ngana, u muthu uambote, u lenguluka kuloloka, uene mu lendukila kiavulu oso a dikola ko kué.

⁶ Bhana dítui, u Jihova, eme ngi samba; ividila kiambote o dízui diami dia kudionda.

⁷ Bhu kizuua kiami kia lamba ngi dikola ko kué; kuma eie ku kambe ku ngʼitaia.

⁸ Mu jinzambi kana-mu, Ngana, ua soko ni eie; kana-ku ue ikalakalu kala o ikalakalu ié.

⁹ Mbutu joso jʼathu, eie-muène ua a bhanga, hádia a kèza kubheza bhu pholo ié, u Ngana; a kà jingisa o dijina dié.

¹⁰ Mukonda eie, Ngana, u kôla! U mukua kubhanga madiuanu! eie ngó ubheka ué u Nzambi!

¹¹ Ngi longe njila ié, u Jihova, ngende jinge mu kidi kié; endesa o muẋima uami, ngi kale jinge ni uoma ua dijina dié.

¹² Ngi ku ximana Ngana, Nzambi iami, ni muẋima uami uoso; ngi jingisa jinga o dijina dié, sé ngó kufula, katé ku hádia ni hádia.

¹³ Kuma henda ié i ua ngi kuatela iavulu; mbata ua ngi kudila o muenhu uami mu bòmbo dia kalunga.

¹⁴ U Nzambi-phe, sai athu a di kaka a ngi balumukina, kibuka kia akua kusuína a ngi balukila, kuma a ngʼindi kúfua; athu eie ka ku bhake ngó ku mesu mâ.

¹⁵ Maji Eie-phe, Ngana, u Nzambi ia jihenda, uezala ni kiadi, ua kokoloka o kutema, eie ua vula o kulenduka ni kidi.

¹⁶ Lunga kunu ku ngala, u ngi kuatele henda; bhana nguzu kua selevende ié, u ngi bhulule, ngi monʼa kahatu ké.

¹⁷ Ng, idikize kijimbuete kia mbote i ua-nda ku ngi bhanga, phala oso a ngi zembe-ó a ki mone, a kale ni jisonhi. Mukonda eie u Jihova ua ngi kuatekesa, eie ua ngi kondo o malamba.