Jisálamu 83 - O Mikanda Ikola

Nzambi U Fundisa O Miji ia Matumbu

Muimbu, Mukumbi ua Asafo.

¹ U Nzambi, tata, kana ku di xibha; zuela Ngana, u balumuke mu bhanga kima, ku kale ngó kiókio, u Nzambi.

² Talesa, Ngana, jinguma jé a di vunza; a ku zembe-ó, a zanguka o mítue.

³ Ala mu ta ikutu ia kukuama povo ié, a-lu di longesa kioso kia bhanga athuʼê u ua kondeka.

⁴ Exi: Zenu! Tuienu tua kà a buidise, phala ka kale dingi muiji; o dijina dia Izalaiele di bhue-ku kulu dia mundu.

⁵ A ku kanena muene ni muenhu umoxi; ene oso a bokona mu kikutu kia unguma nʼEie;

⁶ Ni akua jibalaka ja Edomo, ni akua Ijimaiele; ni Mouabhe ni akua Hangale,

⁷ Ni Jebale, ni Amone, ni Amaleke, ni Fidíxia, kumoxi ni akua Tilo;

⁸ Ni Asídia ua di te-mu ue, ene oso a di bande ni nguzu ioso ku anʼa Lote. (Selah.)

⁹ A bhange, Ngana, kala ki ua bhange Midiiana, kala ki ua bhange Xixela ni Jabini mu honga ia Kixone;

¹⁰ A buidila bhu Endodi, imbi iâ anga i biuluka ditobe dia mavu.

¹¹ Ilolo iâ a soke kiá ni ki ua bhange Olebe ni Ziiebe; o jisobha jâ mukuâ ni Zeba ni Zalumuna,

¹² mukonda ala kuila, exi: Tu a bue-u muene, o mabhata ma Nzambi ma fumana, ma kale kiá undundu uetu.

¹³ Nzambi iami, a bhange kala mafe a phephuluka ni kitembu, a phephuluke muene kala iangu a i ambata ku kitembu kia nguzu.

¹⁴ Kala túbhia tu ximika o kitumba, kala mulengo u uamena ku milundu,

¹⁵ a bhese, Ngana, lusolo ni kibhungu kié, a bhuuike muene ni kitaphephe kié.

¹⁶ Pholo ja ezale ni dilebhu, katé kia sota o dijina dié, u Jihova.

¹⁷ A kuatese muene jisonhi, a diuane, ka kà balumuke-bhu dingi katé hádia; a muangane muene, a buike.

¹⁸ Phala a kʼijiie kuma eie ngó uavu o dijina dié dia Jihova, ku moneka luiadi; eie-muène ngó Suke-ku mu ngongo ioso.