Jisálamu 81 - O Mikanda Ikola

Kutumaka Ni Kuximana

Ua Mesene ngimba: mbimbi iê ia Ngitita. Mukumbi ua Asafo.

¹ Imbenu ni ngalasa kua Nzambi nguzu ietu; dikodienu di kusanguluka kua Nzambi ia Jakobo.

² Tu kuatienu mukumbi, bekenu kangoma, ni mbànza iauabha dízui, ni kakoxi.

³ Xikenu o mbungu ia mbeje ia thathama, ni ia mbeje iaii kiá ku mulundu, kizuua kietu kia fesa, kieza-bhu!

⁴ Mbata kima kia lekelela mua Izalaiele, kijila kiangene kia Nzambi ia Jakobo.

⁵ Umbangi uê ua xia mua Zuze, ua thembu iná kia bhitile ku thandu dia ixi ia Ejito. Mu ngʼevile jinge o uzuelelu ua kambe ku ngi jimbulukila, kuma exi:

⁶ Kisuxi kiê nga ki katula ku kimbamba, o makuʼê nga ma tudisa kuambata o kinda.

⁷ Ki ua dikola mu lamba, nga ku kudila; nga ku itaiela mu kididi kiòsueke mu tunda o inuminu ia jinzaji; nga ku lola o muẋima bhu menha ma Medibah. (Selah.)

⁸ Ivenu, mu mundu uami, nga solo ku mi bazela; Izalaiele, tala, tamano mu ngʼívua!

⁹ Ki bhu kale nzambi iengi muʼaxaxi kenu, kana kufukamena nzambi ia matumbu.

¹⁰ Eme Jihova, ngi Nzambi ié, nga ku katula mʼoxi ia Ejito; jikula mu kanu dié kiambote, eme ngi ku izalese-mu.

¹¹ Maji o mundu uami-phe ka xikina ku ngʼivua dízui; Izalaiele ka ngʼindi! Nguê ku ngi tumaka!

¹² Eme ue kiene ki nga ehela, a kaiele o kuxibhaka kua muẋima uâ, aie kuoso kua a tumu o jivondadi jâ.

¹³ Uaué! Tamano o mundu uami a ẋikinine ku ngʼívua! tamano Izalaiele uendele mu njila jami!

¹⁴ Kindala muene ngeje kutolola o jinguma jâ, lukuaku luami lueje ku a bhângela mu jimvunda ni jinguma jâ.

¹⁵ Oso a zemba Jihova, eje kuiza kua muene ni kudiunda; ene-phe o thembu iâ ienhiʼii, ieje kunangenena.

¹⁶ Ngeje ku a disa ni tiliku ianete; o uiki u tunda mu ndanji, ueje ku a kuma.