Jisálamu 79 - O Mikanda Ikola

Mundu A Bhinga Nzambi Kutata Phonzo Ku Jinguma

Mukumbi ua Asafo.

¹ Ngana Nzambi matumbu a bokona mu undundu ué; o Tembulu ié ikôla a i fukula; Jeluzaleme a i bhange ibhela-ibhela ia jindunji ja matadi.

² O imbi ia jiselevende jé jafu, a i bhana jinjila ji bhita bhulu ku i dia; o xitu ia athu é akôla a i texila iama mu iangu.

³ Manhinga mâ a ma ẋamuna kala menha mu jimbandu ja Jeluzaleme, ki bhuala ngó ua tena ku a funda.

⁴ Tua lebhuka kiavulu muʼaxaxi ka akua jixi u tua zukama-nâ; a tu sekalesa, a tu tobhesa, mu madiembu a tu kala mu jimbandu.

⁵ Ngana, tata, mbambe bhebhi, bhu u suka ni njinda ié? Difuba dié di uama kala túbhia, kifua ki di jimi dingi?

⁶ O kutema kué, Ngana, lunduiula-ku ku thandu dia jixi ja kambe ku ku ijiia, ku thandu dia ifuẋi i fula o kudikola ko kué.

⁷ Kuma Jakobo enhó a mu di, (a mu bomona); o dibhata diê dia xala dia budika.

⁸ Kana kuta mu konda ietu o ituxi ia jitata jetu; jihenda jé jendelè-ku mu ku tu sanga, kuma tua sebuluka kiavulu ki tualʼiki!

⁹ Tu bhandulule, eie u Nzambi ietu ia Kibhamuenhu, mukonda dia fuma ia dijina dié; mu dijina dié tu kudile, o ituxi ietu u i loloke.

¹⁰ Phalahi o matumbu a kala mu kuila, exi: Nzambi iâ iú kuebhi? A vutuile o ditota dia manhinga ma ẋamuna ma jiselevende jé, o matumbu a kʼijiie, etu ue tu ki mone ni mesu.

¹¹ O kudila kua ió a a kuika, ku bhixile ko kué; a jitune ni nguzu ia lukuaku lué, oso a a xindi kiá ku a jibha.

¹² Athu engiʼó u tua zukama-nâ a fute lusambuadi bhu homba iâ, o kusebha kuâ kua ku ku tobhesa eie u Ngana.

¹³ Phala etu, Ngana, tu povo ié, tu jimbudi jé ja kilunga, tu kale mu ku ku sakidila jinga, ni kutumbula o diximanu dié ku miji ioso.