Jisálamu 78 - O Mikanda Ikola

Izalaiele Ka Sakidila o Jimbote Ja Nzambi

Maxikile ma Asafo.

¹ Bhulakanenu, enu mu mundu uami, ngi mi bhane phangu; bhanenu mátui, ngi mi tela maka.

² Ngi jikula dikanu mu kuata kifika; ngi tanga nongonongo jami ja imbamba ia xahulu.

³ Ima i tuevua jinga, i tuejiia, ima ia tu tangela jinga adiʼetu.

⁴ Etu uetu ki tu i dingila anʼâ, tu tangela muiji uengi ueza-ku o fuma ia Jihova, ni uzonda uê ni madiuanu mê ma kalakala.

⁵ Kuma muene ua xi kijimbuete mua Jakobo, ua bhana kijila mua Izalaiele, kiene kia tendelela o jitata jetu phala ue a i longe jinge ku anʼâ.

⁶ Mbé o muiji ua bhingana-ku a ijiie, ni ana oso a-nda ku a vuala, hinu kia kula nʼa tangele dingi ue anʼâ.

⁷ Phala a kolokote kudielela kua Nzambi, mbé ka jimbe-ku dingi ku ikalakalu ia Nzambi, ka kambe kukuata ijila iê.

⁸ Ka soke dingi ni jitata jâ, muiji ua thathamana, ua xibhaka, muiji ua bhengalala o mixima, ku di tuma ni Nzambi a ki tokoka.

⁹ Kiala anʼa Ifalaíme, sumbala a maneka, a kuata mata a mifula, maji kizuua kia ita a lenga-ku, a vutuka kuema.

¹⁰ Kukuata o kikutu kia Nzambi, a ki lémbua, a di tunu kuenda mu ngonge iê.

¹¹ Imbamba ia bhanga jinga muene, ka i te dingi muẋima, ni isuma iê ioso ia edikiza, ka i lembalala dingi.

¹² Madiuanu muene a bhange bhu mesu a jitata jâ, mu mikáu ia Zouane, mʼoxi ia Ejito.

¹³ Kalunga ua ka batula muʼaxaxi, iú ua a bhitisa mu kaẋi kê; menha ma di lumala kala ditûmbu.

¹⁴ Mu muanha ua a songuela jinga mu dituta, o mu usuku uoso túbhia tua a muikina.

¹⁵ Mu kikangalakata o matadi ua a bulu mu kaẋi, iu ua a kumisa ni jingiji ja menha ma tundu muʼazongo.

¹⁶ Ua tundisa o menha mu ndanji, anga a kala mu kunguluka mukuâ ni jingiji.

¹⁷ Maji ene-phe hanji aia ni kuta ituxi kua muene, Suke-ku a mu bhukumukina mʼoxi iakukutʼomo.

¹⁸ Nzambi a mu lokalala mu mixima iâ, a bhinga kúdia kua jivondadi ja ene.

¹⁹ A nongena muene Nzambi, exi: Kífua Nzambi u tena ku tu tela meza, mu kikangalakata mu tualʼumu?

²⁰ Iala-ze! ndanji ua i bulu, hé mu fuafua o menha, a kala muene mu kunguluka jingiji; o kuila u tena ue kubhana mbolo? O mundu uê na a sotela xitu?

²¹ Jihova ua kʼivu, njinda hé i mu kuata; kua uama túbhia tua kuoha Jakobo, o kuluuala kuê ku xikita dixi dia kuaula Izalaiele.

²² Mukonda nguauâ kuxikana Nzambi, nguâ kudielela mu kubhanduluka kuê.

²³ Maji-phe ua tumu o matuta ku thandu, u jikula o mielu ia diulu;

²⁴ anga u a lalumuina o maná ia kúdia kuâ, u a bhanʼo masa ma tundu mu diulu.

²⁵ Athu mu ngongo hé a dia o mbolo ia ji-anjo; u a bhana kúdia katé kiekuta.

²⁶ U katula o kitembu kia thunda ki bhuke mu muthandu; o nguzu iê ia balumuna o kitembue kia sulu.

²⁷ U a nokesena o xitu i vula kala mavu, jinjila ja mabhabha mukuâ ni kisekele bhu ndundu ia kalunga.

²⁸ U a kuuila-ju mu kilômbo kiâ, mu jimbandu joso ja jifundu jâ.

²⁹ Anga a dia ekuta muene kiambote; kuma ua a bhana kia Seme o vondadi iâ. Edi a zubha ngó kutoualesa o hanji iâ,

³⁰ Kioso-phe kúdia kuala hanji mu kanu, kua a kumu kiá;

³¹ Njinda ia Nzambi ia a kuata, ni iá a disanze muene kiambote ia afua, minzangala ia Izalaiele ia a buila.

³² Ku thandu dia ima ioso iii, hanji a jijila kuta ituxi, nguauâ kuxikana o isuma iê.

³³ Izuua iâ anga i di bota mu kingoho, mivu iâ ia di bhange ia uíndua.

³⁴ Muene uila u a jibha, ene kiene kiua kia mu kenga; a diela hé a vutuka ni kusota Nzambi makidikidi.

³⁵ Kiene kiua kia ki lembalala kuma Nzambi muene ditadi diâ dia kulengela; o Nzambi, Suke-ku, muene o dilemba diâ.

³⁶ A mu hanza-phe ngoho ni dikanu diâ, aia ni ku mu tela makutu ni dimi diâ.

³⁷ Kuma o muẋima kala na-u ua ku di tuma ni muene, o kikutu kiê kala na-kiu ni ufiiele.

³⁸ Muene-phe mu kulenduka kuê, u a loloka o kubhukumuka kuâ, ka ẋikina ku a buikisa; u ki bhanga, u tona, kia kusosolola o njinda iê, né ua vunzuka ni kutema kuê, ka zubha.

³⁹ Ua lembalala kuma ene ala ngó xitu ia hatu; mulenge u bhita, uia, ki uiza dingi.

⁴⁰ Lukuxi luosʼulu lua mu kitukila mu kikangalakata; a mu nhemuna jinga mʼoxi ia kukuta i bhekela o ngunzu!

⁴¹ A tona dingi kulokalala Nzambi, a tobhesa o Dilemba Diangene dia Izalaiele.

⁴² Ka lembalala dingi o nguzu ia lukuaku luê, mba o kizuua kia a kudila ku nguma;

⁴³ Kiedikiza o ijimbuete iê mu Ejito, ni isuma iê mu mikáu ia Zouane.

⁴⁴ Ni kioso o jihonga jâ ua ji kitula manhinga, menha mu jingiji a lémbua ku a nua.

⁴⁵ Hé u tuma o jihamue muʼaxaxe kâ, jiia ni ku a numata; ni mazote a sengulula oʼxi iâ.

⁴⁶ Anga u tuma kihoho kudia idima iâ ni kujikinisa o milenga iâ.

⁴⁷ Mivide iâ ua i batujula ni matadi a mvula. O mikuzu iâ i humbuka jithangu ku jelu.

⁴⁸ O ibhaku iâ ue ua i buidisa ku matadi ma mvula, o ilunga u sanga iabhi ku nzaji.

⁴⁹ U a kuuila ku thandu diâ o njinda iê iatema, ni dibhebhu, ni uíndua, ni kibuika; kibuka kia ji-anjo a a tumu muene kubuidisa.

⁵⁰ O njinda iê kífua ua i senguluila kikoka; kalunga kâ ka ka fikisa ngoho, ua a bhakula muene ku kibuika.

⁵¹ U beta ana oso a phande-kumbi mu Ejito, ua tebhununa anʼa nguzu mu mabhata ma Hame.

⁵² Maji ua tubhula o mundu uê kala jimbudi, muene ua endesa mu mukáu ua kukuta mukuâ ni kilunga.

⁵³ U a songuela jinga mu iluezu, ene ka kala ngó ni hele; jinguma jâ-phe ua ji bobesa mu menha.

⁵⁴ Iu ua endesa ni ku mbambe iangene tulé, ku mulundu uê ukôla ua a tambula ku matumbu ni lukuaku luê lua dilu.

⁵⁵ Akuaʼxi momo ua a kaie bhu pholo iâ, oxi iâ ua a bhana-iu ene mu ibatu-ibatu, o mabhata mâ, Izalaiele muene ua bhingana mu kutunga-mu.

⁵⁶ Suke kiene, maji ene-phe hanji a thathamesa Sukè-ku Nzambi, hanji a mu bhumina, o umbangi uê ka u suu.

⁵⁷ A vutuka ku dima, a mu kakula kala kia bhange o jitata jâ; a dianguka kala mufula ua kulueza.

⁵⁸ A mu kuatesa njinda ni matala mâ ma kubheza mahamba, a mu bhekela difuba ni iteka iâ iósete.

⁵⁹ Nzambi kia kʼivu, njinda ia mu kuata, Izalaiele anga u mu iibhila kiavulu muene.

⁶⁰ Kibuta kiê mu Silo, nguê dingi kukala-mu, balaka iê ia tungisile ia muene kukala muʼaxaxi ka athu.

⁶¹ Alaka ia nguzu iê ua i ehela, a i bhûnda, a i ambata, kijimbuete kia fuma iê ki kala bhu maku a jinguma.

⁶² Mundu uê ua a bhakula ku xibhata; ua luuala, undundu uê ua mu kumu.

⁶³ Túbhia tua minha o minzangala iâ ia mala; o anʼâ a ilumba a xala sé muimbu ua ubhanga.

⁶⁴ Jinganga jâ a a buidisa ku xibhata, atudi â né ngó kudila jingololo ka tena.

⁶⁵ Bhenhobho Ngana u phaphumuka kala muthu uele ku kilu, kala dizonda di dikola, dia tundu ku vinhu.

⁶⁶ U di ta mu jinguma ni ku a batela bhoxi; a bhi-ku muene, ua a bhesa lusolo.

⁶⁷ Kuvutuka ku balaka ia Zuze nguê dingi, muiji ua Efalaíme ua ditunu-u.

⁶⁸ U sola kiá o muiji ua Juda, ni mulundu ua Ziione ua zolo kiavulu.

⁶⁹ U tungisa o tembulu iê kala kipena kia diulu, ia kuata kala oxi ki i sendumuka dingi.

⁷⁰ U sola ue Davidi mù kala selevende iê, ua mu katula mu kuinga jimbudi.

⁷¹ Ua mu katula mu kuendesa jimama ja jimbudi ni tuana tuâ, phala kukala mubidi ua Jakobo, o mundu uê uangene, ni Izalaiele dia undundu uê.

⁷² Davidi anga u kala mubidi uâ, ni muẋima uatenena, ua endesa muene ni maku a hete.