Jisálamu 77 - O Mikanda Ikola

Mu Lamba Diami Ngi Samba Kua Nzambi

Ua Mesene Ngimba; utelu ua Jedutunu, Mukumbi ua Asafo.

¹ Meia! u Nzambi, nga dikola! Nga suína o dízui diami, Nzambi phala a ngʼivue.

² Bhu kizuua kiami kia kubhondalala, nga soto Ngana; mu usuku maku mami ma sununuka kua muene sé ngó kusuka; muenhu uami moxi ki ua xikina kutululuka.

³ Mu kuxinganeka Nzambi, ngi kuata kukema; kioso ki ngi kuata kubanza, nga-lu sota kusenduka. (Selah.)

⁴ Ua ngi kuata mesu, kilu ki nga ki mono; nga tandanganha kiavulu, ni kuzuela ki ngi tena.

⁵ Ngi kuata ku xinganeka o izuua iókulu, ngi banza muene o mivu ia xahulu, ngixi:

⁶ Ngi lembalala hanji o mukumbi uami, mu usuku ngi kunzama ni kuxinganeka, ngʼibhula maka, ngixi:

⁷ Manhi Ngana ua tu texila-ku kiá? Mbé ka xikina dingi ku mu bhomba?

⁸ Henda iê, kifua, iaia muene nzaká? O plomesa iê ki iala dingi ni ku i kumbidila ku miji ni miji?

⁹ Nzambi o kuila kejidila dingi kulenduka? kifua o kiadi kiê ua ki jikila kiá mu njinda? (Selah.)

¹⁰ Ngixi-phe: Kiki kia ngi bhonzo! maji-phe nga lembalala o mivu ia lukuaku lua dilu lua Suke-ku.

¹¹ Ngi tanga o iphata ia bhanga jinga Jihova; ngi kuata ku madiuanu mé ma xahulu.

¹² Ngi xinganeka ue ku ima ioso i uene kuiudika, ngi ta muẋima ku ukalakelu ué ua madiuanu!

¹³ Uendelu ué, u Nzambi, ua kuzela uoso; nzambi uebhi dingi uala-ku u kôla kala Nzambi ietu?

¹⁴ Eie eie Nzambi ia kubhanga o madiuanu; ifuẋi ia athu ua idikiza o nguzu ié.

¹⁵ Povo ié i ua kula ni lukuaku lué, ene anʼa Jakobo ni Zuze. (Selah.)

¹⁶ Menha ma ku mono, eie u Nzambi; menha ma ku mono, uôma ua a kuata; katé ni koxi kuazongo kua teketa.

¹⁷ Ni matuta a makota a biluka menha; ku diulu kua tundu mutendu; o misongo ié ia di asela ku mbandu joso.

¹⁸ Dízui dié dia kunumina a dʼivila mu kibhungu; kutelaka kué kuazelesa mu ngongo ioso; o ixi i zamba, i tunguta.

¹⁹ Uendelu ué, Ngana, ua bhiti mu musanza ua kalunga, njila jé ji tandula mu kaxi ka mabhuku, manhanhu mé ka tena ku a mona.

²⁰ Mundu ué-phe ua endesa kala kilunga kia jimbudi, abidi muene Mozé ni Alá.