Jisálamu 75 - O Mikanda Ikola

Nzambi Muene Ngó Mufundixi ua Mundu

Ua Mesene Ngimba: mbimbi iê ia kuila ku i zange. Mukumbi ua Asafo, ua kuimba.

¹ Tua ku sakidila, eie u Nzambi, tua ku sakidila! Kuma dijina dié dia zukama; kia di monekena mu ikalakalu ié ia madiuanu!

² Eme kioso ki ngi bhixila bhu thembu iatokala, kiene ki ngi batula o milonga mu uiukilu uê.

³ Ixi né ia botomoka ni ene athuʼê a tungu momo, eme-phe eme-muène ngi kuatesa o jingunji jê. (Selah.)

⁴ Ngʼambela o malaji, ngixi: Kana ku di zangeleka. O akua-phulu ngʼa tangela, ngixi:

⁵ Kana kubhetuka o lumbinga lué; kana kubhetula pholo kua Suke-ku ni izala; kana kuzuela ima kua Nzambi ni xingu ia thathamana.

⁶ Kuma, né ku thunda, né ku luiji, né ku mikáu mba mu kikangalakata, ki kuene kutunda o kubhanduluka.

⁷ Mukonda Nzambi muene ngó o mufundixi u tetulula; u tulula o muthu iú, u tudika o muthu ua mukuá.

⁸ Mbata o lukuaku lua Jihova, lua kuata nganza ia vinhu i thuthuma kifulu; o uhôlua uê ua di lungu muene; u lundulula-ku, hé u nuisa o isuéia ioso mu ngongo, a i nua muene ni mavunze mê.

⁹ Eme bhabha-phe, ngi mu tumbula jinga muene sé kufula; ngimba jinga o diximanu dia Nzambi ia Jakobo.

¹⁰ Jimbinga ja isuéia ngi ji batula muene; maji o jimbinga ja iá aiuka-phe ji kala mu kuimana.