Jisálamu 74 - O Mikanda Ikola

Dibhezelu Dia Jihova a Di Sengulula, Dia Tumbuluka

Maxikile ma Asafo.

¹ Eie Nzambi, tata, kífua ua tu ẋimbukilà-ku kiá? Njinda ié kífua iia ni kuxikita dixi, i ua kuatela o jimbudi ja makèla mé?

² Xinganeka o kifuẋi kié ki ua sumba tunde mʼokulu, eie muene ua a kula mu ku kala muiji ua undundu ué; ni mulundu ué ua Ziione ku ua te o dibhata.

³ Zanguka, Ngana, u tale kia di sengulula, dia di bhange ngùndu; ni phulu ioso ia bhange nguma mu dibhezelu dié.

⁴ A ku zembeʼó, ala kuzuma kala jihoje, bhu kididi kié kia kubhongolokela, a xikika-bhu isunji ia ijimbuete iâ ene.

⁵ Ejiie ni kuenda kala athu aia ni makuua mu kukoka miẋi mu kaxi ka muxitu ua vundu.

⁶ O imbamba ia ufunu uoso ua kuseta, a i bhasa-bhasa ni jingimbo ni jimalatelo.

⁷ Tembulu ié a i te mu túbhia; a ku fukuila o dibhata di ua tele o dijina dié mu ngongo; o dibhezelu dié ia a di sengulula muene katé bhoxi.

⁸ Ambe ku mixima iâ, exi: Tua muanga-muange muene, a bhue-bhu; o malombe oso a Nzambi, mʼoxi ioso a mʼoha.

⁹ Ki bhuala dingi ijimbuete ietu, kana-bhu dingi musèsedi; kana muthu mu dietu uejiia o uíndua iú, mba ua kà suka bhebhi.

¹⁰ Mbambe, bhebhi, Ngana Nzambi ni ku tu sebulula kiki kuala o nguma? Mbé o nguma kífua u ẋonguena o dijina dié sé dizubhilu?

¹¹ Lukuaku lué kifua ua lu sungu kiá muene, o lukuaku lué lua dilu? Katula-lu, Ngana, bhu homba; ki lu fule dingi ku a jikinisa.

¹² Né kienhiki, Nzambi-phe muene Sobha iami tunde mu xahulu; muene uene mu bhanga jinga o uzonda ua ku tu bhângela mu ngongo ioso.

¹³ Eie ua batula o kalunga mu kaxi ni nguzu ié; eie ua bulu o mítue ia midikixi mu menha.

¹⁴ Eie ua bulu Ó mútue ua ngàndu mu kaxi, eie ua mu bhana ku mu dia ku iama mu kikangalakata.

¹⁵ Eie ua jikula otho phala mu fuafue menha ma di bhange ngiji; eie ue ua kukutisa jihonga nuka mua kambele menha.

¹⁶ O muanha ué eie, o usuku ue ué; Eie ua iudika o mbeji ni dikumbi.

¹⁷ Ixi eie ua i xindi ni jimbambe jê ni mvula ni kixibhu eie-muène ua a bhanga.

¹⁸ Maji-phe xinganeka-kiu: Nguma ja ku lokalala eie u Jihova; mbutu ia jisemenhi a ẋonguena o dijina dié.

¹⁹ Kana kubhakula o muenhu ua diembe dié dia kinjimbe ku iama ia hame; o muenhu ua anʼé a a tatesa, kana ku u jimbilà-ku kiá.

²⁰ Ta-ku muẋima ku kikutu kié; kuma o jihota joso javundu mu ngongo, jezala usuéia ni kukaka.

²¹ Phulungu, ua bhondalala, Ngana, eie ku mu kakule dingi; ni ngadiama ni muthu ua tate, a ximane o dijina dié.

²² Balumuka, Ngana Nzambi, u funde o mulonga ué; xinganeka o kioua kiala ku ku tobhesa kumbi ni kumbi.

²³ Kana kukamba kuívua o dízui diodio dia jinguma jé; o kavanza kâ ka ku sange, kuma edi muene bulukutu mvengete.