Jisálamu 73 - O Mikanda Ikola

DIVULU III ( Jisálamu 73—89 ) O Kijinganu Kia Jimbote Ja Akua Mangonha

Mukumbi ua Asafo.

¹ Ni kidi kiene Nzambi u bhanga mbote kua Izalaiele, oso kiá a zele mu miẋima!

² Eme-phe kua ngi xedi ngó kuxia mu njila; makànda mami mandekele kiá kuẋangumuka.

³ Kuma phata ia ngi kuatele ia iá abhumu, mukonda dia kumona o isuéia kubhanduluka.

⁴ Kuma ni mu kúfua kuâ, kene ni misusu; o nguzu iâ-phe u sanga i-iê; o mikutu iâ iadisanze muene, ia nete kiambote.

⁵ Ka moneka mavuua kala athu amukuá; kene kutata kala ki tata akuá.

⁶ Ukumbu uâ-phe kifua lubhambu lua zuata mu xingu; a di futu ni kusuína kala dibeka dia zuata.

⁷ Mesuʼâ a tundu mu mútue mukonda dia kuneta; a fika nzungule ia imbamba ia ku di kaka mu miẋima iâ.

⁸ A bhanga kasekelu ku akuá; a kanena ku a bhanga ungungu; a zuela muene ni izala ioso.

⁹ Dikanu diâ dʼila kala diala kuzuelela ku diulu; o dimi diâ di nama kunu mu ngongo.

¹⁰ Mundu uangene-phe, kua ene kuene kuaia; a a kita iene o fiẋi iâ i tunda o menha a kunuina kubhindama.

¹¹ Exi; Nzambi-ze u kʼijiia kiebhi? o Suke-ku mbé imʼiii uala ku i tongolola muene?

¹² Talenu hanji kioso kiala! Ene-ze akua phuluʼá! Ki bhuala ngó kima ki a tatesa, o jimbongo jâ jivula.

¹³ Kifua-ze eme nga tale ngó hadi ia ku di zelesa o muẋima ni kusukula o makuʼami nʼa bhue o maxaka.

¹⁴ Kuma kumbi dioso dia kambàmba, o kuxixima kuami kua kalé; o kaxtiku kami kabasa kuaki.

¹⁵ Se ngedile ngixi ngi zuela kala ene, ngeju kala-ze ue ngi muthu uengi, kifua ngi kisuiéia mu muiji ua anʼé.

¹⁶ Anga ngi kala mu banza-phe, mba makʼama ma tokala kiebhi, phata ia ngi kuata, kia ngi tatesa muene kiavulu!

¹⁷ Katé ki nga bokona mu tembulu ia Nzambi, kiene kiua ki nga xinganeka sukilu diâ.

¹⁸ Kidi kiene, kuma eie ua emika ididi iaẋanana; uila u a lundumuna, endelela muene, ni mu bombo dia kalunga, nzaká!

¹⁹ Kindala muene athu bhua kexile a-bhu-bhu; a diuana kisuma, ajimuka ni kimbulambula.

²⁰ Mukuâ ni nzoji, ki u thathumuka ku kilu, kiene ue Ngana, ki u balumuka, eie u a kita mukuâ ni izuzúmbia ia hatu!

²¹ Kioso mu thulu ki mua ngi xitile, kia ngi katele ku muẋima kala songo ia ngi toma mu miongo.

²² Kutobha-phe ku nga kexe na-ku, kukamba ku kʼijiia; nga di bhangele kala ngi kiama bhu pholo ié.

²³ Suke kiene, hanji-phe izuua ioso ngi kala jingʼami nʼeie; mbata eie ua ngi kuata mu lukuaku lua kadilu.

²⁴ Eie u ngi bhana kaiula kioso ki ngenda jinga kunu, hádia u ngi tambule mu kibúta kibenha ni fuma.

²⁵ Ku diulu nanhi dingi ua ngi kala-ku, oko eie ngó? o mu ngongo ue kana-mu dingi nga mu indi, u ku tunda eie Ngana!

²⁶ Xitu jami ni muẋima moxi, né ji jila, Nzambi-phe muene nguzu ia muẋima uami, muene undundu uami u nangenena.

²⁷ Ió-ze a ku baluka eie u Ngana, a solo kutexika; a kà fua muene, oso a tunda bhu kinama kié mu sendukila ima iengi.

²⁸ Eme-phe kia ngi uabhela o kuzukama kua Nzambi; nga solo Ngana Nzambi, muene u kala kibúta kiami, phala ngende jinge ni kutumbula o ikalakalu ié ioso.