Jisálamu 72 - O Mikanda Ikola

O Utuminu Ua Mexiia

Mukumbi ua Solomá.

¹ O muenexi mu bhane kutongoloka kué, Ngana Nzambi, o thungunu ue mu bhane o kutetuluka kué.

² Phala muene a fundise o mundu ué ni utuminu ua kidi, a batule kiambote o milonga ia jingadiama.

³ Ku milundu ku tunde kutululuka phala o mundu, ni ku mikáu ku kale o kutunga ni kusoma, mukonda dia ufundixilu ua kidi u tunda ku tumilundu tuofele.

⁴ Ngana hinu u fundisa o jingandiama, ku mundu, u bhulula anʼa jiphulungu a tate; o ngungu u mesena u bhûnda akuâ, a mu katule o mahanha.

⁵ Athu a ku kale ni uoma ku miji ni miji, kioso ki kukala hanjii o dikumbi ni mbeje.

⁶ Muene a tule kala mvula i noka mu dikèla, mukuâ ni isanga i tekela o mikáu.

⁷ Mu izuua iê athu aiuka à kala mu kuzanda, ku kala paze i nangenena kala ki nangenena o mbeje.

⁸ Utuminu uê u tunda ku musanza katé ku musanza ua mukuá, mbambe o ngiji ia dikota katé ku maẋokololo maʼxi.

⁹ Akua kikangalakata a kà mu diundila muene, o jinguma jê ji lesa mavu.

¹⁰ Jisobha ja Talxixi ni mu ikolo a kà mu bhana o lubhaku; o jisobha ja Xeba ni Saba ja kà mu bhekela maujitu.

¹¹ Katé ni jisobha joso ji diunda bhu pholo iê; ilômbo ia miji ioso i kala mu mu bhikila muene.

¹² Kuma muene u bindumuna o phulungu kioso kia dikola; ni ngadiama, ni uoso ua kambe o dilemba di mu kuatekesa.

¹³ U lendukila o ngadiama ni phulungu ua bhondalala, u kala kibhamuenhu kia iá atate.

¹⁴ U jituna o mienhu iâ ku ungungu ua kúdia mangonha o manhinga mâ ma kala ni valolo ia dikota ku mesu mê.

¹⁵ Mu kienhiki, a laie! Hé a mu bhakuila o ulu ua Xeba; athu a kale mu ku mu sambela sé kufula; a mu tanese kizuua ni kizuua.

¹⁶ Mu ngongo mu kale nzungule ia masa katé ni ku thandu dia milundu; ixina iê i kale mu lokosa kala muxitu ua Libano; athu mu jimbonge joso a kale mu fuafua kala iangu mu mukáu.

¹⁷ Dijina diê di nangenena katé ku hádia ni hádia; diia ni kusambuka muene ni ku mululu ni ku mulaula, kioso hanji ki kala mu nangenena o dikumbi; athu a kala mu ku a bhana dibesá mu dijina dia muene; o ifuẋi ioso mu ngongo a mu ixana kuma Mukua jimbote.

¹⁸ Jihova Nzambi a tane-ku! muene Nzambi ia Izalaiele; muene ngó ubheka uê uene mu bhanga o madiuanu!

¹⁹ A ximane dijina diê dikola, katé ku hádia ni hádia! o mu ngongo ioso mu izale ni kubenha kuê! Amén! ni Amén!

²⁰ Misambu ia Davidi dia monʼa Jese ia suku bhenhabha. Mahezu.