Jisálamu 71 - O Mikanda Ikola

Kudionda kua kikulakaji Ua Tate

¹ Ko kué, u Jihova, ku nga lengela; ku ngehele kukakuka, sonhi ni ji ngi kuate.

² Ngi kudile mu kutetuluka kué, u ngi katule mu iluezu; ngi bhetamene o dítui dié, u ngi bhulule.

³ U ngi kale u ndánji iami ia kutungila, ia uabha o ku lengela jinga phala ngi bhuluke; mbata eie ua bhana kiá o kitumu kia ku ngi bhulula, kuma eie u ditadi diami dia kipena, u kimbaka kiami.

⁴ Eie u Nzambi iami, ngi tambule, bhu maku a kisuéia, bhu maku a muthu u dia mangonha, ua kake o muẋima!

⁵ Kuma eie-muène u kidielelu kiami, Ngana Nzambi; eie-muène nga ku te o muẋima, tunde mu undenge.

⁶ Kokué kuene ku nga xamenena, tunde mu ku ngi vuala; eie ua ngi katula muʼvumu dia mamʼetu; ngi ku tumbula mu ku ku ximana jinga muene sé kufula.

⁷ Athu avulu a ngi mono ngi kidiuanu; maji eie-phe u Dilengelu diami.

⁸ Dikanu diami dʼizale ni diximanu dié, ngi tumbula jinga o ujitu ué kumbi dioso dia kambamba.

⁹ Kana ku ngi kaia mu thembu iami ia kukuka; kana ku ngʼehelela ki u mona nguzu ií ngi bhua kiá!

¹⁰ Kuma, jinguma jami, a ngi kuata maka ma ufe; ió a batamena ku ngi bua o muenhu uami, ala mu ngi ta kikutu.

¹¹ Exi: Nzambi ua mu ehelela; enu, kalenu kiá mu mu kuate, mukonda ki bhuala dingi u mu kudila.

¹² Eie-phe, u Nzambi, kana ku ngi kala dikanga; Nzambi iami, endelà-ku mu ngi kuatekesa.

¹³ Enhó a kakule, Ngana, a buidise muene, oso ala ku ngi séia o muenhu uami a sebuluke, a jingunuke, ezale ni jisonhi, oso a mesena ku ngi bhanga o phulu.

¹⁴ Eme, bhabha-phe, ngi dielela jinga kokué sé kufula, ngi ku ximana jinga muene ngi tona, kizuua ni kizuua.

¹⁵ Dikanu diami di tanga jinga o kukumbidila kué, ni kubhulula kué, mu kumbi dioso dia kambàmba; sumbala o konda iê nga i lémbua ku ijiia.

¹⁶ Eme ngi ta jinga o dibete dia undanda ua Ngana Nzambi; ngi tumbula jinga o kukumbidila kua muene, ki kua muthu uengi díngi, kana.

¹⁷ Eie, Ngana Nzambi, ua ngi longo tunde mu undenge; katé bhu ngezʼabha, mukumbi uami u ngene mu tanga, o kukalakala kué kua madiuanu.

¹⁸ O ki nga kukʼiki, ngʼedi kiá bobòbo, ni jimvi mu mútue, kana dingi ku ngʼehelela, Ngana Nzambi; katé ki ngi longa o muiji iú ua lelu, kioso ki endesa o lukuaku lué, o oso ue a kèze-ku, nʼa kʼejiie ki kala o kutena kué.

¹⁹ O kukumbidila kué, Ngana Nzambi, ditala diê dia di leka kinéne; o imbamba i ua bhange, iene ioso iónene! Eie u Nzambi, mukuenu uebhi, soka-nê?

²⁰ Eie ua ngi bhitisa mu jiphaxi ni malamba a vula matelu, eie ua ngi zangumuna dingi, ua ngi bhe muenhu uobhe; ua ngi zaukisa muene mu bòmbo dia kalunga!

²¹ Ua ngi bandekeza dingi o kijingo, ua tona dingi ku ngi konda o malamba.

²² Bhabha eme ue, ngi kuata ku ku ximana jinga ni kakoxi, mbebhu o kidi kié, u Nzambi iami; ngi ku imbila jinga o mimbu ni mbànza, u Muthu Ukôla, Uangene ua Izalaiele.

²³ Mizumbu iami i kala jinga ni huii mu ku ku imbila eie; katé ni muẋima moxi, u sanguluka jinga, kuma ngi muthu ué ua ngi kula.

²⁴ Mu tanga jinga o kukumbidila kué, dimi diami di sakalala, né mu kumbi dia kambàmba; kuma enhó a lémbua-ku, a diuana, sonhi ja a kuata, oso a sotele ku ngi bhanga o phulu.