Jisálamu 7 - O Mikanda Ikola

Kudikola kua Muthu a mu Bhondeleka

Shingaione ia Davidi; muimbu uembila Jihova mukonda dia maka ma Kuxi, mukua Bejamí.

¹ Jihova, tata! Nzambi iami, nga lengela ko kué; ngi bhulule kua ió oso ala ku ngi kaia, u ngi kudile.

² Kuma a hamena o muenhu uami kala hoje ia bhindamena ku ngi dia; a mesena a ngi sanujuna ku idiandu, sé muthu ku ngi bhângela.

³ Jihova, Nzambi iami, se kidi muene eme nga ki bhange, se ua ngi mono ni lufuku bhu maku mami,

⁴ se ngaii mu lokalala ió ua di xibhê, ki tu di kuata; inda nga bhana muenhu kua uoso ua ngi zembe sé kikuma;

⁵ nguma ió-phe a ngi kaie, a ngi kuate; muenhu uami a u titidile muene bhoxi, o ujitu uami a u fufujule mu mavu. (Selah.)

⁶ Balumuka, u Jihova, mu njinda ié; imana mu bateka ió asaluka ni ku ngi seia; phaphumuka mu ku ngi zuelela, kuma mulonga uami eie-muène ua ku tokala.

⁷ Kionge kia mundu a ku bhongoloke muene; eie u xikame mu kaẋi kâ bhu ditala dia dikota.

⁸ Jihova mukua kufundisa o ifuẋi ioso, a dikola kokué, ngi fundise eme, u Jihova, kala kia tokala mu kulúnga kuami, ni mu kidi kiami ki ngala na-kiu moxi.

⁹ Mukua phulu, Ngana, mu lembuese o phulu iê; maji mukua kidi-phe mu kuatese bhu kididi, a tunge a some; mukonda eie u Nzambi ia kidi, u mukua kutungula o ilunji ni mixima.

¹⁰ Ngubu iami iala kua Nzambi, mukua kubhulula oso ala ni mixima iaiuka.

¹¹ Nzambi mufúndixi ua kidi, kuma u fúndisa mu uiukilu uê; Nzambi uene mu kuluuala izuua ioso.

¹² Se o muthu nguê kutunda ku njila iaiibha, Nzambi phe u zuika o mukuale uê; uta uê ua mufula ua u oleka, ua te kiá o misongo iê;

¹³ ua maneka kiá o ibhakatu iê ia ita; misongo iê iala kuasa ku jinguma i bambula túbhia.

¹⁴ Iala-ze, mukua phulu muenhó, mika ia mu kuata ia kuvuala, maji kingoho; uemita usuéia, u vuala makutu.

¹⁵ Ua j ikula diela, ua di kande muene, diazongo, iú uafu-mu muene, mu dikungu diê dia kande.

¹⁶ Ufe uê ua mu vutukila mu mútue uê muene, o kusuína kuê kua mu vundu muene ku dikoxi diê.

¹⁷ Eme-phe ngi sakidila jinga Jihova mu kutetuluka kuê; ngimba ni kuximana o dijina dia Jihova, Suke-ku.