Jisálamu 69 - O Mikanda Ikola

Musambu Ua Muthu Ua Nzambi Ua Tate Kiavulu

Ua Mesene Ngimba; mbimbi ia Itulu. Mukumbi ua Davidi.

¹ Ngi bhulule, Ngana Nzambi, kuma menha a ngi bokona moxi,

² Nga kuzuka mu kizakazaka mua kambe o dimanenu; nga kutuka muʼjiia dia menha azongo a mesena ku ngʼambata ni hungulule.

³ Nguzu ia ngi bhu ni kudikola; o bhu xingu bhua ngi kukuta, ni bhene thokón! mesu ami kala kumona dingi kiambote, ngʼandeka okulu ni kubhinga Nzambi iami.

⁴ Iá a ngi zembe sé kikuma, kota mu kuvula, o jindemba mu mútue uami ndenge; jinguma jami, a ngi zembe mu makutu, a suína; a mesena muene ku ngi batula mu muiji, ima ki nga i di ngoho, ia ngi bhingi ku i futa.

⁵ Eie-phe, Ngana Nzambi, uejiia o uoua uami; ni ituxi iami ia vulumuka muene ku mesu mé

⁶ Ki ki bhite, Ngana, u Jihova dia ilômbo, kuila athu amukuá ala ku ku kinga, a kuata jisonhi mukonda diami eme; Ngana Nzambi, athu amukuá ala ku ku sota, ka sebuluke mukonda diami eme, u Nzambi ia Izalaiele, tata!

⁷ Mukonda eme nga bongo malebhu, mu ku ku dielela eie; nga sonoka muene pholo mukonda dia jisonhi.

⁸ Muʼaxaxe ka phange jami nga dí bhange ngi muthu uengi, nga kituka ngi nzuángiza ku anʼa mamʼetu.

⁹ Kuma o muanu uaʼnzo ié uene ua ngi di, o manongo a ió a ku nongena eie, a ngi tula eme ku thandu,

¹⁰ Nga didi, nga di talesa muene hadi ni kujila; maji o kienhiki ue, kia ngi bongesa malebhu!

¹¹ O ki ngedi ngi zuata mulele ua kidinhaji, a ngi ta kiá ku mukumbi, nga di bhange ngi Sabhu iâ.

¹² A xikama bhu njangu, eme muene ngi diba diâ dia maka; ngaii kiá ni mu muimbu ua jihôlua.

¹³ Eme-phe ki ngalʼiki, ngi samba ko kué u Jihova, kithangana kienhiki kia ku ngʼivua eie u Nzambi; mu kulenduka kué kuavulu, ngʼivue, u itaie mu kidi kié kia Kibhamuenhu.

¹⁴ Ngi sunge Ngana, mu kizakazaka, mbé ki ngi jikinine momo; u ngi kudile kua ió a ngi zembe, ni mu jiia dia menha azongo.

¹⁵ Kuehele hungulule ia menha ku ngi bhitula; ki ngi bobe mu jiia dia dikota; ka ngi minhe mu bombo dia kalunga.

¹⁶ Ngʼivue, Jihova, kuma o kulenduka kué kuauabha; mu jihenda jé javulu kinéne, ngi lunge mesu mé kunu ku ngala.

¹⁷ Mubhikʼé kana ku mu suekela o pholo ié; ngʼivue muene kindala, kuma nga bhondalala kiavulu!

¹⁸ Ngana, zukama ku muenhu uami, u ngi kudile; ngi kule, mukonda dia jinguma jamiʼojo.

¹⁹ Eie, Ngana, uejiia kiambote o kusekala kuami, ni kusebuluka ku nga sebuluka ni jisonhi, ni kubhuuama kuami; ió-phe ala ku ngi tobhesa, enhoso ala ku mesu mé.

²⁰ Malebhu a ngi tolola o muẋima moxi, kihongo kia ngi kuata kala kia kukata; nga tale uoso u ngi kuatela henda, maji ki bhuala muthu; o u ngi konda malamba, ki ngi mu mono.

²¹ Kúdia kuami a ngi bhana ndululu; kia ngi kuata o dinhota, a ngi nuisa mvindangele.

²² Enhó-phe, o meza mâ ma zale, ma kituke múkala; kia fika kukala kiambote, mubhetu u zabuke.

²³ Mesuʼâ a kale ni kavunda, mbé a lémbue kumona; o miongo iâ i kale jinge ni kuteketa a lémbue kuenda.

²⁴ Lundulula o njinda ié ku thandu diâ; a kaie ni túbhia tua kutema kué, u a kuate.

²⁵ Kilômbo kiâ ki xale ngùndu; ki bhu kale muthu u tunga mu balaka jâ.

²⁶ Kuma uoso eie ua mu beta, ene a ta-ku o ku mu zukutisa; o malamba a ió eie ua a kuama, ene a kala o maka a minangu iâ.

²⁷ Ku ikuma iâ, a bandekeze-ku dingi ikuma; a lémbue muene kulunga bhu pholo ié.

²⁸ A jimuene, Ngana, o majina mu divulu dia muenhu; ka a soneke dingi kumoxi ni athu a iuka.

²⁹ Eme-phe ki ngalʼiki nga bhondalala, lamba dia ngi kondo! Ki kale eie u Nzambi u ngi bhulula, ni u ngi bhake ditala.

³⁰ Hinu ngi ximana o dijina dia Nzambi ni kuimba, ngi mu jingisa muene ni kusakidila.

³¹ Kiene ki uabhela Jihovaʼiki, ki ki soko ni kubhana o ngombe; mba kubhana kibhaku kia sata, ki kala ni jingela ni ikoto.

³² Abelesela a kà ki mona, hé ki kala kia kutana; enu muala kuinda Nzambi, muẋima uenu u suíne dingi.

³³ Kuma Nzambi uívua o jiphulungu; ka tobhesa jihutile jala bhu mikolo.

³⁴ Ni diulu ni ngongo i mu ximane muene; ni kalunga kiá, ni ima ioso iala-mu.

³⁵ Mukonda Nzambi hinu u bhulula Ziione, u tunga dingi o mabhata ma Juda; u sanga athu a xikama, a vu dingi o jimbongo jâ.

³⁶ A di tuma ni muene, a xia luvalu lu lundula o mabhata enhó; oso a zola dijina diê, a tunga, a soma, muenhomo.