Jisálamu 68 - O Mikanda Ikola

Nzambi U Tolola Jinguma jê

Ua Mesene Ngimba. Mukumbi ua Davidi, Muimbu.

¹ Nzambi a balumuke, jinguma jê ji muangane; oso a mu zembe a a bhese lusolo bhu pholo iê.

² Mukuâ ni dixi kia di kaia kuala o kitembu, ene ue a a kaie; mukuâ ni sela ki i sangumuka ku túbhia, kiene ue isuéia i buile bhu pholo ia Nzambi.

³ Maji athu aiuka-phe a kale ni ngalasa; a sanguluke bhu pholo ia Nzambi; a sanguluke muene ni ngalasa iavulu!

⁴ Imbilenu Nzambi, xikenu mu kuximana o dijina diê; tumbilenu o ikoka iê, mu mikáu ia hatu mu bhitila o dikalu diê; muene dijina diê Jihova; tanenu buoso bhua mi tukulukila.

⁵ Tata ia jihukunhi, o dilemba dia ahatu a xala atudi, muene Nzambiʼó ku mbanza iê ikôla.

⁶ Phulungu ua xala ubheka, Nzambi u mu bhanga dibhata, anga u kala mu kulaiela mu nzungule ia akua dibhata diê; hutile a mu kutu, u mu katula mu kaleia, hé u mu bheka dingi mu kubhanduluka; maji oso-phe a xibhaka, a kà tunga mu ixi iakukuta.

⁷ Ngana Nzambi, kioso eie ki ua tuamenena jinga o mundu ué, ki ua bhiti-nâ mu kikangalakata; (Selah.)

⁸ Ixi i kala mu tunguta, ku diulu ku sonoka mvula, mu kumona Nzambi ua tukuluka; Sinai iú u teketa iuná mu kumona Nzambi, Nzambi ia Izalaiele.

⁹ Eie, Ngana, Nzambi, ua nokesa mvula iavulu, ua nhohesa o undundu ué ua kexe kiá ni kubhuila.

¹⁰ Kilunga kié ua a tungisa momo; eie Ngana Nzambi, ku mbote ié u mukua kudikila o jingadiama.

¹¹ Ngana muene ua bhana o kizuelu kiê; o ahatu a bhana jinga o jingolokela, a kexi kifuxi kia dikota.

¹² Jisobha ni ilómbo iâ, a a bhesa lusolo; o ndona ua xedi ku bhata, muene uala mù uana kiá imbamba ióbhunde.

¹³ Sumbala eie ua xikamene mu ibhanga ia ibhaku, u di fangana-phe kala mabhabha ma pomba ma di futu o phalata, mukuâ ni jisala jê, ja di kuu o ulu ua kífua kia malelo.

¹⁴ Muteni-a-ioso kia phephulula jisobha bhenhobho, kia soko ni ki phephuluka o neve mu mulundu ua Zalamone.

¹⁵ Mulundu ua Baxane mulundu ua dikota, mulundu ua Nzambi; mulundu ua Baxane uala ni jisungu jasongoloka.

¹⁶ Eie u mulundu-phe ua lebha o jisungu, uala mu ialela-hi ni dixinga o mulundu ua mukuá ua solo Nzambi kuta-mu dibhata diê? Jihova ua te muene dibhata diê momo, ka di sendumuna dingi, lémbua!

¹⁷ Makalu a Nzambi a ita makuinhi aiadi a midi, ni jimidi ja jimidi ja ndumba; o Ngana uala muʼaxaxi kâ, mukuâ ni mú Sinai, o kididi kiê kia isuma!

¹⁸ Eie ki ua bande bhuluʼèlele, ni mu diendu dié ubhika ua u katula-mu eie ua u ambata kuma hutile ié i ua kutu; ni mahitula mé, ua ma tambula muʼaxaxi ka athu; katé ni iá a xibhakele, a xikina kiá kuila, Jihova Nzambi a tunge muʼaxaxi kâ.

¹⁹ Ngana a tane-ku! mukua kuila izuua ioso u tu ahula o kimbamba kia tu xina, hé u tu izalesa ni mbote; muene Nzambi ietu ia Kibhamuenhu. (Selah.)

²⁰ Nzambi ietu, tua mu mono muene, kuma Nzambi ia kukudila mu iluezu; o jinjila ja kubhuluka mu kúfua, muene Jihova, Ngana ietu, uala na-ju.

²¹ Xi, Ngana Nzambi phe hinu u bula o mútue ua jinguma jê, u mu ṗhuṗha muene mu mútue mua safunukʼomo, uoso ua jijila jinga o ku mu lokalala ni kuenda mu kubhuma kuê.

²² Ngana uixi: Né ku Baxane ku uala, ngi ku takana-ku, né kia bhonzo, mundu uami ngʼa takana muene kʼoxiʼélele dia menhʼa kalunga.

²³ Phala u bonde o kinama kié mu manhinga ma jinguma jé; mbé o dimi dia jímbua jé di lese ue o manhinga mâ, ni di tambule ku jinguma o mbandu iê ioso ia mu tokala.

²⁴ Ene a u mono, Ngana Nzambi, o uendelu ué; o uendelu ua Nzambi iami, muenexi uami, mu kubokona mu kididi kiê kikôla.

²⁵ Akua kuimba a tuamena, akua kuxika a kaiela ku dima; a di ambatesa kumoxi ni ilumba a kuata kuxika o isaka.

²⁶ Tumbulenu Nzambi bhu kionge kia mundu, tumbulenu Ngana, enu mua tundu mbutu bhu otho ia Izalaiele!

²⁷ Kasule kâ, Bejamí, muene ua tuamena, o ilamba ia Juda ni makuenze mâ, a kaiela kuema, kumoxi ni ilamba ia Nzebulone, ilamba ia Nafitali.

²⁸ Tuma o nguzu ié, Ngana Nzambi, phala u tu bhângele dingi kala ki ua kalakala mʼokulu.

²⁹ Mukonda dia Tembulu ié mu Jeluzaleme, jisobha jenda ni ku ku bhakuila dingi o maujitu.

³⁰ Bazela, Ngana, o kiama kiókio kia suamena mu dibu, o jindumbe ni jingalote ku mundu ua matumbu, u titidile bhoxi o itadi iâ ia phalata; a muange muene, kifuxi kioso kiala ni vondadi ia ita.

³¹ Ku Ijitu hinu ku tunda ilamba eza mù dionda; o Itiópia kindala u sunununa o maku mê kua Nzambi.

³² Enu ilômbo ioso mu ngongo, imbilenu Nzambi; imbenu muene mu ximana Ngana. (Selah.)

³³ Mukua kuendela ku matuta ma diulu, o diulu diê-muène tunde mʼukulu-kulu; ivenu-ze o dízui diê, dízui diê di bhana mutendu ua suína.

³⁴ Ambenu-kiu kuma Nzambi ukôla, utuminu uê ua tambula konda ia Izalaiele, o unéne uê uenda ku madiulu oso a di leka ku matuta.

³⁵ Eie, Ngana Nzambi, u kuata uoma ku kididi kié kia isuma ku uala! Nzambi ia Izalaiele muene u bhana mundu uê o nguzu ni kutena. EʼDiebhe! diebhe! Ngana Nzambi!