Jisálamu 67 - O Mikanda Ikola

Nzambi Ni Ubhulukilu Uê A Mu Ijiie Ku Miji Ioso

Ua Mesene Ngimba; ua kuxikila ku jimbànza ja jingoji. Mukumbi, Muimbu.

¹ Nzambi a tu lendukile, a tu bhane o dibesá, a bhangese pholo iê ku tu muikina; (Selah.)

² phala njila iê aʼijiie mu ngongo, ku jixi joso ejiie o ubhulukilu uê.

³ Ifuẋi ia athu a ku ximane, Ngana Nzambi; ifuẋi ioso muene mu ngongo a ku ximane.

⁴ Akua jixi joso a tane, a ku imbile ni ngalasa; kuma eie Ngana, hinu u fúndisa o ifuẋi ioso mu kidi kié, hé u tumina o jixi joso mu ngongo. (Selah.)

⁵ Ifuẋi ia athu a ku ximane, Ngana Nzambi; ifuẋi ioso muene mungongo a ku ximane.

⁶ Phala o mavu ende ni kubhana dingi o idima iê; o Nzambi, Nzambi ietu muene, a tu bhane o kuzediua.

⁷ Xi, Nzambi u tu bhana muene dibesá; mbé ene oso, katé ku maẋokololo, a mu kale ni uoma.